Joira ja Anamarumiwa 8
8
Harahariwa woroma wa atu omuroromela Yesu
1Eto Sawulo na liyene ohoziveliwa mapiwelo a mulombwana Estevawu. Siku nimohive nenne, atu omuroromela Yesu kafwanyeya Jeruzalemu kohoroma harahariwa na makalelo ohokala a masika. Mwa enne atene kohobalaleya, aliwa roma tawela maporovinsiya a Judeya na Samariya. So mbwenye ahanle muJeruzalemu mule ali anamarumiwa bahi. 2Eto kohokalawo alombwana a vang'ono, atu omuriheda Mulugu, kavenyilege, aliwa dowa mukoya Estevawu, kamutomolelaga kuto dilukulu. 3Mbwenye mulombwana Sawulo ule, ohoroma wana kondo na nikuru na atu omuroromela Yesu, liye roma wendawenda vande na vande, avolowaga mmamba, mutu uli watene omuroromela Yesu anfwanya liye, mulombwana nari muhiyana, oahinda aamburulaga, dowa atatilelaga mukadeya.
4Mwa atu omuroromela Yesu kagabalaletchiwe muwari motawa mule, kada mutu olaleya wadowa liye. 5Mulombwana Filipi agafiyile sidadi ya Samariya, ohoroma alaleya atu a wewule ira Yesu gu Namatikeliwa. 6Muwari mwa jolaleya jaye na jionihedo jaira liye, atu oindjiva a Samariya kohoroma muhara, kanvuruwanaga pama jalaleya liye. 7Tchoira mulombwana Filipi okumihamo minemba dotakala mwa atwale. Minemba dile dakumaga mwa atu aavulumutcha liye, dokuwa na mazu olimbiha. Eto kohokalawo aliba hawenda na aliba rangala adjindjene kavulumutchiwe. 8Atu a sidadi ya Samariya kagaonne jatene jaira mulombwana Filipi, kohagalala.
Muselu wa ng'anga okwima aroromenle mazu alaleya Filipi
9MuSamariya mule ohokalamo mulombwana mmohi eriwa Simawu. Simawu ule aromile kala ng'anga osaka mirombwe dokwima eto oatikinihetcha atu na jengo jaira liye. Liye eto ovioniheda nnga mutu ohokala wa masika. 10Atu atene a wewule kamuona nnga ng'anga ohokala wa masika ante kamuona nnga: <<Kopolo dinna liye, nnakumela wa Mulugu wenno unaitaniwa Mulugu wa Kopolo.>> 11Atu kombalra mwasiwa roma wanle, oatikinihetcha atu na jengo jaira liye muwari mwa mirombwe daye dokwima. 12Mbwenye atu a Samariya, kagavwile Filipi alaleyaga Muselu Wapama wa Umwene wa Mulugu, kagavwile muselu wa Yesu Kiristu, kohororomela jawonga Filipi, aliwa batiziwa, alombwana vamohi na ahiyana. 13Mwa enne ng'angole Simawu na liyene ohororomela mazu awonga Filipi, liye batiziwa, roma muhara Filipi. Agaonne jionihedo na jotikiniha johokala ja masika jaira Filipi, mulombwana Simawu ali otikiniheyene.
ASamariya kohozeliwa Munemba Otchena muwari mwa Peduru na Juwawu
14Vevale anamarumiwa kahanle Jeruzalemu kohovwaga ira atu a Samariya kohororomela mazu a Mulugu. Mwa enne aliwa kohomuruma Peduru na Juwawu. 15Kagafiyile Samariya, kagaonne ira atwala eni kinamuwatchele Munemba Otchena, kohalobelela ira kamuwatchele Munemba Otchena. 16Tchoira ora yenno Munemba Otchena ali ahanaamorele aSamariya. So aliwa kabatiziwa na nzina na Nabwiya Yesu bahi. 17Evale aPeduru kohoroma muhindaga kada mutu na mandiwa, aliwa muwatchelaga Munemba Otchena.#8:17 Peduru na Juwawu kadowile Samariya kahaiziwile ira aSamariya kinamutambilre Munemba Otchena. Mbwenye kagafiyile Samariya, kagaonne ira atwala eni kinamutambilre Munemba Otchena, aPeduru kohoroma muhindaga kada mutu na mandiwa, aliwa muwatchelaga Munemba Otchena. Kahi ira jaireya eno fendo datene, nari. Tchoira kohokalawo atu amohiwa kawandile moreliwa Munemba Otchena kahanabatiziwe eto kahalobeleliwe. (Joira ja Anamarumiwa 10:44-48)
Ng'anga Simawu afuna agule kopolo da Mulugu
18Ng'angole Simawu agaonne ira anamarumiwa kaahinda atu kozeliwa Munemba Otchena, ohotukula kobiri, dowa wonga na aliwa, 19liye ira: <<Nnafuna mudigulihede kopolo munna nyo ira na miyene damuhinda mutu, amuwatchelege Munemba Otchena.>> 20Mbwenye Peduru ohomuwakulaga, liye ira: <<Mulugu autolotche weyo vamohi na kobiri dawo do, mwasiwa weyo unatukula kobiri we funaga ira ugulena yenno inavaha Mulugu. 21Weyo kuli ofwanela ira ulabe mabasa vamohi na hiyo, tchoira murima wawo kali pama vamentoni va Mulugu. 22Utwaruwe mwa yengo yotakala iirile we, unvepe Nabwiya ira yawandeya, uwande kurumuweliwa zela yengo yotakala yaumbuwenle we mmirimani mwawo. 23Tchoira nnaona ira weyo uzaleliwa makalelo onyunya, ulive omangeyene na jofuna jawo johokala pama.>> 24Vevale Simawu ohomuwakula ira: <<Dera mulobele wa Nabwiya, munvepe ira jabure jatene jiwongile nyo jahadiireyele.>>
25Noira eno, Peduru na Juwawu kohidedela umboni eto kohalaleya aSamariya mazu a Nabwiya. Evale kohoroma welela Jeruzalemu akoka. Kadowaga, kowenda kalaleyaga Muselu Wapama tatamo didjindji muwari mwa Samariya.
Mulugu ohomuruma Filipi ira adowe amulaleye muEtiyopiya mmohi
26Evale mungelro wa Nabwiya ohoza wonga na mulombwana Filipi ira: <<Venya, udowe ikukuru ya wu.#8:26 Owu hehi ikukuru ya suli. Ku wonga mavirelo wa nzuwa muwononi oromana. Uharege rampa neno nnakuma Jeruzalemu niyaga sidadi ya Gaza.>> Rampa awonga mungelrole ali rampa nnavira muisalesaleni. 27Agawandeliwe eno, Filipi ohovenya, liye dowaga. Murampani mule mohokala mulombwana mmohi ohoya mmba.#8:27 mulombwana mmohi ohoya mmba: Zela mazu ira mulombwanole ali mulombwana ohoya mmba, ora yenno kohokalawo amwene amohi kaafuna alombwana ohoya mmba ira kasogolrelrege mabasa amohiwa kaumbuwelaga ira: <<Mulombwana ohoya mmba kanatamangela ja ahiyana. Unerege hinda mabasaye bahi.>> (2 Amwene 9:32-33; Estere 2:3; Jeremiya 38:7; Daniyeli 1:3) Ali muEtiyopiya, mundimuwa mmohi asogolrelra jorayela jatene ja muhiyana mmohi, wenno ali mwene wa ilambo ya Etiyopiya, eriwa Kandase. Ndimuwole akumile ilambo ya waniwa, Etiyopiya, liye dowa Jeruzalemu ira amutamalele Mulugu, nomala liye manga ulrendo owelela waniwa. 28Adowaga waniwa, ali ogaratene muatereladoni mwaye,#8:28 muatereladoni mwaye: Aterelado ali tchova atutumuliwa na ng'ombe nari kavalo. Mutu owanda gwela mukarasariyani mule, liye garati nnga uli mukaroni enne. So motori omuwendiha ali inyama yenno yamangiha atu sogolro. Do dali karo da andimuwa a wanle. Ali karo dawendetchana amwene owu hehi anyakondo, owu hehi mutu orayela. ailerigi mazu kalrembiwe na namafiyiheda Izaiya. 29Munemba Otchena ohomuruma Filipi eraga: <<Kadowa wakale vamohi na aterelado ule.>>
30Evale Filipi ohovenya, amutamangelaga. Evale ohonfwanyaga ndimuwole ailerigi movweya mazu kalrembiwe na namafiyiheda Izaiya. Mwa enne ohonfuka, liye ira: <<Andimuwa, jejo jinaileri nyo jo, munowanda onelramo?>> 31Ndimuwole ohowakula ira: <<Miyo kadinna mutu ofuna dionihedamo. Nnga jeji meka nnowanda?>> Vevale ndimuwole ohomuwongana Filipi ira agwele muatereladoni mule. 32Mazu a Izaiya ailerigi ndimuwole, kawonga ira:
<<Mutule ohomiyala jaye. Liye kawongileve yengo, kalaga nnga miyala wa nibila nameziwaga ira nipiwe eto kalaga nnga miyala wa nibila nasatiwaga. # 8:32 nibila nasatiwaga : Malambo a mundulrimu nari malambwala atu okana mabila anosatetcha mawoyiwa, aliwa gulihaga. Tchoira mawoya a mabila analaba ira mutu asakanyena nguwo yapama. Nguwo yosakanyiwa na mawoya a mabila inakala yapama kwaranya nguwo yosakanyiwa na ntondje. Eto mutu asataga nibila, nibila nne nnakala novuta nene. Kannairave yengo. 33Mutule, hiya mutonga na ibaribari, kere mpeta bahi. Kalivo unafuna wongaga zela ahimaye mwasiwa liye ohokumihiwa mwilamboni ya vati ahambanle mwana.>>
34Vevale ndimuwole ohonfukaga Filipi ira: <<Miyo nnafuna dufukeni. Namafiyiheda ula awongaga mazwala, kodi unaviwonga liye mwinnya, owu hehi, unamuwonga mutu mmohiwa?>> 35Vevale Filipi oholanda mazu anno ailerile ndimuwole, roma mulaleyaga Muselu Wapama wa Yesu.
Batiziwa wa muEtiyopiya
36Kadowagave mundila, kohofiya nimburo eni nannaga mahindje. Evale ndimuwole ohowongaga, liye ira: <<Kaing'anani. Mahindje banna! Nnga va ihala yengo imohiwa ira miyo dahabatiziwe?>> 37Filipi kwi: <<Akala nyo munomuroromela Yesu na mmirimani mwenyu mwatene munobatiziwa.>> Ndimuwole ohowongaga ira: <<Miyo nnomuroromela Yesu Kiristu ira gu Mwana Mulugu.>> 38Evale ndimuwole ohoimeliha aterelado waye, ambinlene kohotita muatereladoni, aliwa dowa bwina mwiko mule, Filipi liye mbatiza ndimuwole. 39Ndimuwole agamanle batiziwa, kagakumile mmahindjeni mule, Munemba wa Nabwiya ohozaga, mutukula Filipi, liye mudowagana. Eto ndimuwole kamuonne akoka. Masiki eno, ndimuwole ohodowaga muulrendoni mwaye ohagalalene. 40Mwa enne mobaranya mulombwana Filipi afwanyeya Azoto.#8:40 mobaranya mulombwana Filipi afwanyeya Azoto. Ku wonga Mulugu ohomutukula Filipi na makalelo aiziwile liye, dowa muhiya ilambo imohiwene olapela wene na wali liye vamohi na mundimuwa wenno awenda na aterelado, wenno ambatizile liye. Kahi ira liye era wenda dowaga wewule na mendo daye, nari. So aonne agafiyile wewule bahi, liye ahaiziwile yaireyile. Evale liye ohoroma wendawenda, alaleyaga Muselu Wapama tatamo datene kuma Azoto wewo waligi liye, dowa ante sidadi ya Sezariya.
Chwazi Kounye ya:
Joira ja Anamarumiwa 8: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral