Joira ja Anamarumiwa 6
6
Atu omuroromela Yesu kohasakulra andimuwa ira kasogolrelrege mabasa ogawa udja
1Malambo anne anamamuhara Yesu koindjivave. Muwari mwa aliwa, ale kawonga iGerego kohoroma kana makani na ale kawonga iEberewu tchoira amakwele a ahiyana owonga iGerego ale kolramwisiwa, tchavahiwa yengo kada siku nnga afwiwa.#6:1 ale kawonga iGerego kohoroma kana makani na ale kawonga iEberewu: Muwari mwa atu omuroromela Yesu oroma, atene kafwanyeya kagali aJudewu mobaliwa owu hehi atu ohara sanganiko da aJudewu. Muwari mwa atwale, kohokalawo amohiwa owonga iGerego eto kohokalawo kawonga iEberewu. Ale kawonga iGerego kafwanyeya kagali atu oza. Ale kawonga iEberewu kafwanyeya kagali anamurala a Jeruzalemu. Afwase atu omuroromela Yesu owonga iEberewu tchaaona afwiwa owonga iGerego nnga yengo. Kalaga nnga kohokana nsakulro. Afwase atu omuroromela Yesu owonga iEberewu kabalra ira: <<Unaguliha fwaramento ira naagawelege atu osimela gu hiyene anamurala. Nona, ndoweni naagawelege afwihu a muJeruzalemu muno bahi.>> 2Na mwasa wa makani anne, anamarumiwa kumi na ambinli kohagumaniha anamamuhara atene a Yesu. Atu kwi: <<Ira hiyo nihiye mabasihu olaleya mazu a Mulugu, nifutukuwe nigawege udja, kinakala. 3Nona abalihu, inafwanela mwaasakulre alombwana atanu na ambinli oiziwa wenda na atu, atu ozaleliwa Munemba Otchena eto atu a toto. Nyo mwaasakulra, hiyo nnafuna naahambihe ira kalabege mabasa ogawa udja. 4Mbwenye hiyo mabasihu kakale lobela no fundjiha Mazu.>>#6:4 Mogwada mwene, mabasa a andimuwa muwari mwa atu omuroromela Yesu ku lobela no fundjiha Mazu. 5Yawongile atu ile, atu atene kohoziveliwa. Vevale atu omuroromela Yesu kohasakulra alombwana atanu na ambinli ala: Mmohi ali Estevawu. Liye ali mulombwana wa nroromelo nlukulu, mutu ozaleliwa Munemba Otchena. Kohomusakulra eto Filipi, Porokoro, Nikanori, Timawu, Parimena, na Nikolawu wa Antiyokiya. (Liye eto muwari mobaliwa kaali muJudewu, mbwenye ahanakale namamuhara wa Yesu, aromile hara ja aJudewu.) 6Alombwana atanu na ambinli ale kohoveleliwa wa anamarumiwa. Vevale anamarumiwa koholobela, aliwa ahela manda, kaahambihaga ira kasogolrelrege jodja jile. 7Vevale mazu a Mulugu komwadeya eto anamamuhara Yesu koindjivave na makalelo ohokala a masika muJeruzalemu. Kohokalawo eto anamakuta adjindji karomile rumela Muselu Wapama wa Yesu.
Hindiwa wa Estevawu
8Mulombwana Estevawu ali mutu osogolrelriwa na sayi na kopolo da Mulugu. Liye oirana jotikiniha na jionihedo johokala ja masika vamentoni va atu. 9Evale Estevawu alaleyaga vatando, kohooneya aJudewu angasi angasi kavenda joruniha jawonga liye. Amohiwa kalobeletcha nyumba yofundjamo Mazu#6:9 nyumba yofundjamo Mazu yali nyumba aJudewu mwafundja atu mazu wanle. Tchoira aJudewu kohovahiwa malamulo madjindji a Mulugu na sanganiko didjindji. Evale aliwa kohokana nyumba yagumanetcha atu kafundjagamo jatene ejo. Kada vatatamoni kohokana nyumba yewa yofundjamo mazu nnga vinaireya na maigereja malambwala. Ku wonga nyumba dofundjamo Mazu mwilamboni yatene kahi ira yali nyumba imohive nari. Dohokalamo didjindji dene. So mbwenye Nyumba ya Yehova yali imohive ilambo yatene ya vati. Yesu agali mwilamboni ya vati, ovolowetcha nyumba dofundjamo Mazu dile. yeriwa Nyumba ya Azari Okutchiwa. Amohiwa kakumile Sirene, amohi kakumile Alexandiriya. Kohokalawo eto aJudewu amohi okuma vilambo da Silisiya na Aziya. Atene anno kagavwile jolaleya ja Estevawu, kohogumanela ira karunihe jawonga liye. 10Voira mulombwana Estevawu ali mutu wa toto eto mutu ozaleliwa Munemba Otchena, aliwa tchawanda runiha jalaleya liye jile. 11Evale kohovenya mozemba, aliwa dowa avenda amboni onama ira kaze, kamunukedege mulombwana Estevawu. Kohowonga aliwa ira: <<Hiyo nihivwa mulombwana Estevawu awongaga mazu omululuviha Mozeji na Mulugu.>>
12Muwari momunukeda mule, aliba namale kohowanda atuja atu adjindji na andimuwa a aJudewu na anamafundjiha malamulo. Kohofiyeda mwezo ovenya, dowa muhinda, aliwa mudowana ira kamusumele wa anamatonga. 13Muwari momusumela mule, kohaitaniha aliba nama ira kaze, kamuwendjede Estevawu ira kamugwihena mulandu. Anamanamale kohorumelela ira: <<Mutula kanavuma wonga mazu oluluviha Nyumba ya Yehova Yotchena ila na mazu oluluviha malamulo. 14Nihivwa liye awongaga ira Yesu wa Nazareti unafuna atolotche Nyumba ya Yehova ila eto unotchindja mangano matene Mozeji anivahile liye, anivahe mangano maxa.>> 15Kagavwile mazu anne, anamatonga atene kagaratile mwemule kagamuing'anne Estevawu, kohoona kove yaye yagali nnga kove ya mungelro.
Chwazi Kounye ya:
Joira ja Anamarumiwa 6: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral