Joira ja Anamarumiwa 22
22
Yowonga ya Pawulo vamentoni va anamwindji
1Mulombwana Pawulo ohoroma wonga eraga: <<Nyo abalaga atene vamohi na ababa atene, muvuruwane mbalume yaga inafuna miyo wonga na nyo.>> 2Kaganvwile awongaga na iwongelo yewa iEberewu, kohomiyalaga noo. Evale liye ohowongaga eraga: 3<<Miyo vano dili muJudewu, dibaliwe sidadi ya Tarisu, muwari mwa ilambo ya Silisiya. Ulukula, diulukunle muJeruzalemu emuno. Dili mutu ufundjihiwe na mundimuwa Gamaliyeli malamulo matene ohiyana-hiyana kahara andimuwihu eto dali mutu ozuzumela ja Mulugu nnga vini nyo peno va. 4Wanle doaharahara atu ohara Ndila ya Yesu ira kakwe. Doahindetcha alombwana nari ahiyana, miyo afungelihaga mukadeya. 5Jatene eji jinawonga miyo ji, mundimuwa wa anamakuta na andimuwa atene otonga anowanda dihidedela umboni. Tchoira aliwa badivahile madugumento ira didowena Damaxiku, daavahe abalihu aJudewu kafwanyeya wewule ira daahindege atu atene omuroromela Yesu, daamangege, daazegena Jeruzalemu uno ira katongiwe.>>
6<<Mbwenye dagavennye, didowaga mundila na afwaga, nagali vakwikwive na Damaxiku, nzuwa nitamangelaga vari na vari, wohozaga moneya undimuwa wokumela zulu, za jerimelaga vali miyo. 7Mwa enne dohogwa vati. Dagagwile vati, dohovwaga nizu nidifukaga ira: <Sawulo, Sawulo kodi unadiharaharela nni?> 8Evale dohofukaga ira: <Nabwiya, nyo muli aniya?> Liye ohodiwakulaga ira: <Miyo dili Yesu wa Nazareti, wenno unamuharahara we.> 9Mwa tempu yenne, ale kafwanyeya na miyo kohoona moneya mbwenye tchawandile vwa mazu a mutu wenno awonga na miyo. 10Evale dohofukaga ira: <Nabwiya, nnga miyo dire avi?> Nabwiya ohodiwakulaga ira: <Uvenye, udowe sidadi ya Damaxiku. Wafiya wewo, unowandeliwa mabasa matene disakunlre miyo ira we ulabege.> 11Evale na mwasa omoneya undimuwa ule, miyo kadawanda ona. Afwaga kohotukula ndanda naga, aliwa dimeza ante miyo fiyeda volowa sidadi ya Damaxiku.>>
12<<Dagafiyile wewule, adifwannye ali mulombwana mmohi omuriheda Mulugu, oharihamo malamulo eto oteteliwa mwa aJudewu atene kakala wewo eriwa Ananiya. 13Ananiya agafiyile, ohoimela vali miyo, liye diwandela ira: <Mbalaga Sawulo, kaonaga akoka.> Agairile eno, ora imohive dohoroma ona akoka, miyo muona. 14Mulombwana Ananiya ohoiraga: <Mulugu wa makolo ehu guusakunlre ira uiziwege jofuna jaye eto umuone Mutu Wapama waye eto uvwe mazu aye awongaga na weyo. 15Weyo gunafuna kala mboni vamentoni va atu atene zela jionne we eto jivwile we. 16Unadibeliwela nni? Kavenya udowe wabatiziwe. Uvepe na nzina naye ira jotega jawo jihuwiwe.> >>#22:16 Uvepe na nzina naye ira jotega jawo jihuwiwe. Ku wonga Ananiya ohomuwandela Pawulo ira: <<Kavepa na nzina naye ira jotega jawo jihuwiwe, amala uvenye, udowe wabatiziwe.>> Kaali ira liye afuna arome batiziwa, amala anvepe Yesu ira amukurumuwele.
17<<Dagawelenle muJeruzalemu muno akoka, siku nimohi dilobelaga Nyumba ya Yehova, morurumutcha dokalaga nnga nnaaroha eto dahairaga roha. 18Dohomuona Nabwiya awongaga na miyo ira: <Uvenye Jeruzalemu uli we mobaranya mwasiwa aliwa kinafuna vwa umboni wawo zela miyo.> 19Miyo mbwenye dohoira: <Nabwiya, aliwa kohoiziwa pama makalelo aira miyo diwendawendaga nyumba dofundjamo Mazu didjindji dene daahelihaga mukadeya no abubuda ale kauroromelani. 20Sangiri na mboni wenyu Estevawu nitatiyaga molaleya mazwinyu, na miyene daimenle evo, diziveliwaga ukwa waye. Miyo eto daing'anela kapa da ale kampile Estevawu.> 21Nabwiya mbwenye ohoira: <Kadowa. Miyo nnouruma ira udowe olapa wene waalaleyege atu ohokala aJudewu a wewo.> >>
AJudewu kohomugwada Pawulo mazu
22Atwale konvuruwanagave Pawulo ante liye fiyeda wonga mazu oira: <<Nabwiya gudirumile ira didowe daalaleyege atu ohokala aJudewu.>> Mbwenye agawongile mazu anne, kohoromaga kuwa keraga: <<Kahi mutu ofwanela kalawo mwilamboni ya vati!>> 23Muwari mokuwa mule, kohowungula kapa diwa, aliwa bubudagana vati, ponyedagana tumbulru zulu. 24Vevale mundimuwa wa anyakondo ule ohoiraga: <<Kanvolotchiheni bazini, mwamuwaxule ira niiziwe muselu unakuwela atu.>> 25Mbwenye kagamanle mmanga ira awaxuliwe, Pawulo ohowonga na musogolrelri mmohi wa anyakondo 100 aimenle evale, liye nfuka eraga: <<Kodi zela malamulo a aRoma jinawandeya avi nyo diwaxula miyo dagali musidadawu wa Roma dahanagwena mulandu?>> 26Evale musogolrelri afuna mbubuda Pawulo ule agavwile mazu anne, ohoviraga, dowa wonga na ndimuwole eraga: <<Mutule gu musidadawu wa Roma. Kodi munafuna nnga niire avi?>> 27Ndimuwole agavwile eno, ohozaga wali Pawulo anfukaga ira: <<Katiye, weyo uli musidadawu wa Roma?>> Pawulo kwi: <<He, dili musidadawu wa Roma.>> 28Ndimuwole ohowonga ira: <<Ira miyo dikale musidadawu wa Roma, dere gula usidadawu waga na kobiri didjindji.>> Pawulo ohowonga ira: <<Miyo mbwenye usidadawu waga gobaliwana.>> 29Vevale kagavwile eno, ale kafuna kambubude ira kanfuke muselu wanna liye, tchambubudile. Mobaranya aliwa kere muhiya wene. Eto ndimuwole ohokagana yoova ira: <<Miyo dihimmangiha mulombwana Pawulo ula agali liye gu musidadawu wa Roma.>>
Pawulo agali vamentoni va andimuwa a aJudewu
30Mmetcheloni muwa, ndimuwole ofuna aiziwe na ibaribari kodi muselu guvi aJudewu kafuna atu kamugwihede mulombwana Pawulo. Evale liye ohorumiha milanyo ira andimuwa a anamakuta na andimuwa atene otonga ja Mulugu kagumane. Oharuma eto anyakondwaye ira kadowe kamutapule mulombwana Pawulo. Evale ndimuwole ohomutukula mulombwana Pawulo, liye mudowana vamentoni vewa.
Chwazi Kounye ya:
Joira ja Anamarumiwa 22: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral