Joira ja Anamarumiwa 21
21
APawulo kohodowa Jeruzalemu
1Nagamanle alanya afwihu, nohogwela mwadeya, hiyo dowaga vasuwa va Kosi nahaperuwile. Mmetcheloni muwa, nohofiya Rode, hiyo kwaranyavo ante Patara, 2hiyo tita. Nagafwannye mwadeya mmohiwa afuna dowa Fenisiya, nohogwela, nidowaga wewo. 3Nidowaga, nohoonaga suwa ya Xipire ikukuru ya muwononi oromana. Hiyo kwaranyavo, dowaga sidadi yeriwa Tiru muwari mwa porovinsiya ya Siriya, wewo wafuna aliba mwadeya titiha mitolro diwa.
4Nagatitile, nagaasakile anamamuhara a Nabwiya kafwanyeya Tiru, nohomalaga malambo matanu na menli vamohi na aliwa. Afwihu ale muwari mowandeliwa na Munemba Otchena,#21:4 mowandeliwa na Munemba Otchena, kohomuwandelaga Pawulo ira ahadowe Jeruzalemu: Afwase mazwala tapulela ira atwale kohowandeliwa na Munemba Otchena jengo jafuna muireyela Pawulo Jeruzalemu. Kagaiziwile jafuna nfwanya wewo, aliwa kohomuwandelaga Pawulo ira: <<Inafwanela wahadowe Jeruzalemu.>> kohomuwandelaga Pawulo ira ahadowe Jeruzalemu. Pawulo mbwenye karumenle. 5Tempu yagakwakwanne, hiyo nohomanga ulrendo wehu ira nidowege sogolro. Afwihu ale, alombwana, ahiyana vamohi na ahimiwa, atene kohonivelela kuma sidadi, dowa tcherela ya bara. Nagafiyile tcherela ya bara ule, nohokokora mutcherelani mule, hiyo lobela. 6Evale noholanyana, hiyo gwela mwadeya, afwihu ale aliwa welelaga mundulri, kadowaga mmavande muwa.
7Nagavennye Tiru, nohodowaga ante Petolemayida, hiyo alondjela abalihu kafwanyeya wewule, hiyo haya na aliwa siku nimohi. 8Mmetcheloni muwa nohokuma Petolemayida, hiyo dowa Sezariya. Nagadowile wewule, nohohaya vande va Filipi wenno ali mutu olaleya mazu eto ali mwa alombwana atanu na ambinli kasakulriwe malambo a mundulri ira kaagawelege amakwele udja. 9Liye ohakana anamwali annayi, atene adiye ve. Aliwa kali anamafiyiheda.
10Nagalive vande va Filipi vale, vagavirile malambo mangasi mangasi, ohoza namafiyiheda mmohi eriwa Agabu. Liye akumile porovinsiya ya Judeya. 11Agazile wa hiyo, ohotukula sintu na Pawulo, liye vimangana manda na manyalo, liye ira: <<Munemba Otchena gunawonga ira: <Mwinnya maliba sintu ni unafuna amangiwe na aJudewu a Jeruzalemu na makalelo anna. Kagamanle mmanga, anonvaheda mmandani mwa atu ohokala aJudewu.> >> 12Mulombwana Agabu agawongile eno, hiyo na atu omuroromela Yesu afwihu nofunafuna nnga nimuwelruze Pawulo ira ahadowe Jeruzalemu. 13Mbwenye Pawulo ohowakula eraga: <<Nyo munanlela nni? Munadikumbanyihela nni, mudititaga sogolro waga? Tchoira dihimala kozeya ira dimangiwe Jeruzalemu eto dihimala kozeya ira dikwe wewo zela nzina na Nabwiya Yesu.>> 14Voira mulombwana Pawulo olimba ngi ngi ngi, hiyo aliba muwelruza nohomiyala niiraga: <<Tabo. Ireye nnga munafunela Nabwiya.>> 15Nagamanlewo malambo mangasi mangasi, nohomanga jehu, hiyo gundeya, dowaga Jeruzalemu.
16Nidowaga Jeruzalemu, kohooneya eto anamamuhara Yesu angasi angasi a Sezariya kafuna kadowe vamohi na hiyo. Aliwa kohonivelela vande va mulombwana Mansoni ira nihaye vande vaye. Mulombwana Mansoni, waniwa ali suwa ya Xipire eto liye ali namamuhara wa Yesu romana wanle.
Aansiyawu kohomuwandela Pawulo zela jomunukeda javwile atu omuroromela Yesu afwaye
17Noira eno, hiyo fiya Jeruzalemu. Nagafiyile, abalihu omuroromela Yesu a Jeruzalemu, kagagumanne na hiyo, kohoniwatchela mwapama. 18Mmetcheloni muwa, Pawulo ohodowa vamohi na hiyo ira namuone mulombwana Tiyagu.#21:18 Tiyagu gu mundimuwa mmohive awandile wonga pama tempu yagaratenle atu muselu oira: <<Kodi inafwanela atu ohokala aJudewu katongiwe ira kaharege malamulo matene Mulugu amuwandenle liye Mozeji?>> (Joira ja Anamarumiwa 15:13-21) Nagadowile, nohafwanyaga aansiyawu atene kagali evo. 19Nagamanle alondjela atene, Pawulo ohoroma awandelamo jatene jene jairile Mulugu muwari mwa mabasa matene alabile liye muwari mwa atu ohokala aJudewu. 20Evale andimuwale kagavwile jowonga ja Pawulo jile, kohomutitimihaga Mulugu. Nomala eno, aansiyawu ale kohoroma muwandelamo Pawulo keraga: <<Mbalihu, hiyo nnafuna nuwandeleni ira muwari mwa aJudewu kohokalawo adjindjene anamuroromela Yesu. Eto atene na vanove anohidedela pama malamulo a Mozeji. 21Aliwa eto kohovwa mazu ounukedani ira: <Eni mulombwana Pawulo unaawandela aJudewu anafwanyeya vilambo da atu ohokala aJudewu ira kahiye mangano a Mozeji, kahaainelege ahimiwa eto kahawendegeve na mangano ehu.> 22Nnga nnafuna niire avi? Tchineneva afwihu anomala vwa ira muhuza.>>
23Vevale aansiyawale kohowongagave keraga: <<Inafwanela muirena inafuna hiyo wonga. Hiyo eva nihikana alombwana annayi kapanganne yopangana yewa na Mulugu. 24Hiyo nnafuna nyo mwaatukule aliwa, nyo mwatene muvisakanyede na makalelo vinera hiyo.#21:24 muvisakanyede: AJudewu kohokana sanganiko diwa kavirihamo atu kahanavelele mikuto diwa Nyumba ya Yehova. Mwamala, nyo mukumihe kobiri ira alombwana annayi ala kaingiwe mpalra. Evale atu atene kauonani muiragana ejo vamohi na atwala, anokana ibaribari ira jejo javwile atu zela nyo jali jonama. Eto anokana ibaribari ira na nyenne munoharihamo malamulo.
25<<Mbwenye zela nkani wa atu ohokala aJudewu omuroromela Yesu, hiyo nihimala lremba karta naawandelaga onelramo wehu ira inafwanela atu ohokala aJudewu katunde jodja jikuteliwe ikwamutu yosema na sangiri na mwanainyama opiwa moxekiwa vammelo eto kiraruwege.>>
26Mmetcheloni muwa, mulombwana Pawulo ohadowagana afwaye annayi ale, aliwa roma visakanyeda na makalelo kaiziwile atu. Nomala eno, aliwa dowa Nyumba ya Yehova, awandela andimuwa kali wewo siku nafuna atu mariha mabasiwa ovisakanyeda ira kada mutu avelele yovelela yaye.#21:26 kada mutu avelele yovelela yaye: Malambo a mundulrimu aJudewu kohokana jovelela javelela atu momutamalela Mulugu nari mokwakwaneliheda mapangano kapanganne atu na Mulugu. Ku wonga ira alombwana annayi ale tchadowa Nyumba ya Yehova na muselu oira: <<Nnafuna nileveleliwe jotega jehu.>> Aliwa kohokanamo ira: <<Ndoweni nivelele yovelela yehu muwari mokwakwaneliheda mapangano napanganne hiyo na Mulugu.>>
Pawulo ohindiwa vatando va Nyumba ya Yehova
27Malambo matanu na menli ovisakanyeda kafunaga kwakwana, aJudewu kakumilege ilambo ya Aziya kohomuona mulombwana Pawulo vatando va Nyumba ya Yehova. Evale kohoroma atuja atu kafwanyeya vevale, aliwa muhinda Pawulo, 28roma kuwa keraga: <<Alombwana aIzarayeli, muze munikamihede mutula! Mwasiwa mutula muwari mwa jofundjiha jaye, unanipeta hiyo aJudewu eto unapeta malamulo eto unapeta Nyumba ya Yehova ila. Gwenna eto aazilenavo aGerego Nyumba ya Yehova ila, atakalihaga nimburo notchena ni.>> 29Aliwa kawongela eno mwasiwa malambo a mundulri kohomuona Pawulo awendaga muwari mwa Jeruzalemu na mulombwana mmohi eriwa Torofimu wa Efezo. AJudewu ale kaza kamuhindaga Pawulo, kesaga Pawulo ohomuzana Torofimu vatando va Nyumba ya Yehova.#21:29 kesaga Pawulo ohomuzana Torofimu vatando va Nyumba ya Yehova: Voira Torofimu kaali muJudewu, kawanda volowa vatando va Nyumba ya Yehova. Tchoira atu ohokala aJudewu tchavolowa Nyumba ya Yehova mbwenye kagomela nnga ha vale.
30Mulombwana Pawulo agahindiwe, madugudugu kalivo kohomala gaweya muJeruzalemu mwatene emule. AJudewu kohotamanga, za gumana vamohi, aliwa muhinda Pawulo, mburulelaga unde olapela wene na Nyumba ya Yehova, aliwa funga misuwo mobaranya. 31Kafunaga kampe, mundimuwa wa nikuru nindimuwa na anyakondo ohovwa ira: <<Madugudugu kali musidadi mwatene kahi a masika.>> 32Mobaranya mwene, ndimuwole ohatukula anyakondo na asogolrelri a anyakondo 100, liye tamanga adowaga wewule wali madugudugu ule. AJudewu kagamuonne ndimuwole azaga na anyakondwayene, aliwa kohiya mbubuda wambubuda atu Pawulo. 33Evale ndimuwole oharuma anyakondwaye ale ira kamuhinde Pawulo, kammange na makurenti menli. Vevale ohafuka atwale eraga: <<Kodi mutula bani? Udawile nni?>> 34Madugudugu kafwanyeyaga nimburo nenne tchaligi a masika, tchoira mutu mmohi akuwa awongaga ji, mmohiwa akuwa awongaga jimohi jiwa. Na mwasa wa madugudugu ale, ndimuwole kawandile iziwa ibaribari iwa. Evale oharuma anyakondwaye ira kanvolotchihe muwari mwa bazi ya anyakondo. 35Kamudowagana nyumbani ule, kanfiyagana masikada a bazi ile ira kavolowe, anyakondo ale kohomutemba mwasiwa kohoona ira atwale kafuna kamuirele yabure. 36Tchoira anamwindjale komuharaga Pawulo kakuwaga vamohi keraga: <<Kampeni! Kampeni!>>
Pawulo ohovepa ira awonge na anamwindji
37Pawulo afunaga tukuleliwa muwari mwa bazi, ohonvepa ndimuwole eraga: <<Dihikana inafuna miyo wonga na nyo.>> Awongaga eno, Pawulo awonga na iGerego. Evale ndimuwole ohonfuka eraga: <<Weyo unawanda avi wonga iGerego? 38Weyo kuli muIjipitu wenno malambo a mundulrimu awana ira avitongege, aasogolrelraga apanga 4.000 muisalesaleni?>> 39Pawulo ohowongaga ira: <<Nari, miyo dili muJudewu, dibaliwe sidadi yoiziweya pama ya Tarisu muwari mwa ilambo ya Silisiya. Dafuna divepe ira diwonge na anamwindjala.>>
40Evale mundimuwole agamurumelihile, Pawulo ohovaha ionihedo na ndanda naye vazulu va masikada vali liye evale ira atwale kamiyale. Atu atene kagamiyanle, Pawulo ohotchindja iwongelo, liye roma wonga na iEberewu.#21:40 iEberewu owu hehi iAramayiku.
Chwazi Kounye ya:
Joira ja Anamarumiwa 21: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral