Mika 2
2
Mika na wono wakwisumaniza nayo
1Woyi he, kuli wono wagonaga meso wakwihwesa zo wavu! Na lono wela hakali mitondo, kolo wakutuga cilejeho du, hodu wawa kwituma zizo zo wavu zono wali wazipanjile, hambi nha zili mu vilungo vyawo. 2Na lono wawe wakusaka migunda, hodu, wakuyisola kwa vilungo, na lono wakusaka zinyumba, nazo wakuzisola, hasina mhuga yo yose, hamba sawo, yono yisigaye yipolile.
3Holeka Muwaha Mulungu yakutya, “Nghwihwesa nimuletelenyi magazo, gono si mosuma kupona, langa mokwiwona mwenjila du mu wugaye, wono womunozenyi mulece kwilumba kanyhi hamba hadodo. 4Ne vilo vivyo, kolo vikuza, wanhu wolosimulila ze mikalile yenyu yo wugaye, ciwe colecezo, nawo wawe kwimba no lwimbo aluno lwe cililo, lono lukulajila zono zamutujenyi, wawe kutya,
‘Cakondya kuhodanjilwa lukulu!
Muwaha Mulungu yakondya kuyisola yisi yetu,
no kuwapela wono wacinozize mateka.’ ”
5Holeka i vilo vilawa kuza, vyo kugomolwa yisi kuli wanhu wo Muwaha Mulungu, kolowa kusina kanyhi yunji, mono kolowa yena lifungu muli'nye.
Wono wakwisumaniza no muwizi
6Nawo wanhu wakunganulila wakutya, “Wulece kuganula hali'se. Wulece kuganula muli zizi zose. Hambi Mulungu nha si kocikoza cevu. 7Wukwihwesa lo, vyono wanhu wa Isilayeli wali mu wulijitwe? Hamba Muwaha Mulungu yawutaga wukangalile wakwe? Hamba mbeka kokwituma zizi? Hamba mwene lo, si kalongaga ko wupolo kuli wose wono wakwituma ze ling'ani?”
8Nayo Muwaha Mulungu yakupitula yakutya, “Mukuwahoma wanhu wangu nha walugu. Lono wakulawa ku wulugu, wakuwuya ku zikaya, wakwihwesa vyono luno wapolile, ninga kumbe anye mukwihundika mu nzila, ho muwahizize i makoti gawo gono wavwalile mucanyha. 9Mukuwataga i wagolece we wanhu wangu, kudeha ye zinyumba zawo zono wazendile, kanyhi mukuwaboka i wana wawo wo wulugutwe wangu cibitilila. 10Muwuce mubite, hambi ahano nha hasina kanyhi wuceho. Hambi u wubi wenyu, nha wahaletela wufwe hanhu baha, hamonga no wongomezwe.
11“Wanhu awa, wakusaka muwizi mono yamemile wulambi no wukonji, mono yakutya ‘Nowila, divayi no wujimbi vilawile ko winji ku soko yenyu.’
12“Ninga ane nomukongholenyi kanyhi hamonga, anye nyo wanhu wa Isilayeli, mono musigaye. Nomukongholelenyi hamonga, kotya ngholo zono zikuwuya kwi'bululu. Kotya wudimo wono wumemile ngholo, ne yisi yenyu vyo yowa yimemile wanhu wenji muno.”
13Nayo Mulungu kowadigulila nzila, no kuwalongolela, wawuce mu wulawa mu yisi yo wujenzi. Wogabenanjiza malango ge likaya no kubita wapolile. No mutemi wawo, u Muwaha Mulungu mweneco, yo kolowatonga.
Chwazi Kounye ya:
Mika 2: LLKWW
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Cigogo Bible © Bible Society of Tanzania, 2002.