Mwamulizo 37
37
Ndoto za Yusufu
1Nayo Yakobo yakajendelela kwikala mu yisi ya Kanani, mumo mono yekala u sogwe nha mujenzi. 2Na azino ahano zo ndelo za Yakobo. Yusufu lono yali yakali muzelelo mudodo wa myaka yikumi na mupunghati, yadimaga zingholo ne zimhene, hamonga ne wanduguze i wana wa Biliha na Zilipa, i wagolece wo sogwe. Nayo Yusufu yakamuletela sogwe Yakobo nghani 'mbi za mu mikalile ye wanduguze. 3Nayo Isilayeli yakawa yamwendile muno muno yuyu mwanagwe Yusufu, si nha wanagwe wanji wose, vyono yali yo mwana wo wukombi wakwe. Holeka yakamuhonela Yusufu kanzo nhali. 4Ninga i wanduguze wali weza kuwona vyono sogo yawo yamwendile Yusufu si nha weneco, hodu wakamusula, hamba si walonganaga nayo kanyhi ko mulamu.
5Mwizuwa linji ne cilo, Yusufu yakalota ndoto, nayo yali yeza kuwalonjela wawahaze, oho! Wene nhondo ho wakacila kumusula muno muno. 6Mwene yakawalonjela yakutya, “Ta, muhulicize ndoto yono ndotile zuwali. 7Ane ndota vyono, wose cali cili ku mugunda cikuwopa madulu ga ngano, na lanje ta, niwa kuwona lidulu lyangu likwima wima. Ne madulu genyu, gawa kwikongholela hamonga gose, gawa kulizinga haciligati lidulu lyangu, gawa kulinamila.” 8Nawo wawahaze wakamuwuza wakatya, “Alu mwene, wukusaka kucilonjela vyono kowa mutemi wetu, hamba nhawule?” Na ku soko yiyo, wakacila kumusula muno muno ku soko ye zindoto zakwe hamonga ne zinghani zakwe. 9Yusufu yakalota ndoto yinji kanyhi, nayo yakawalonjela wawahaze, yakatya, “Ta muhulicize, ane ndota ndoto yinji kanyhi, niliwona lizuwa no mwezi, hamonga ne zinyelezi yikumi na monga vikunyinamila.” 10Ninga yali yeza kuwalonjela u sogwe hamonga ne wawahaze ze ndoto yiyo, u sogwe yakamukalipila muno muno, yakamutya, “Alu ndoto mucici yiyi yono wulotile? Alu, hongo mbeka, ane no sogo, hamonga no nyina yako, hamonga ne wawahazo, cokuza cikwinamile gwegwe sunga ho hasi?” 11Ale wanduguze wakamuwonela wivu, ninga u sogo yawo Yakobo, yakajendelela kuyihwesa muno nghani yiyo.
Yusufu yakuguzwa ne wanduguze no kutegulwa ku Misili
12Mwizuwa linji, lono wawahaze wa Yusufu, wali wabita kuwudima zimitugo zo sogo yawo Yakobo, behi na Shekemu. 13Isilayeli yakamulonjela Yusufu yakamutya, “Gwe Yusufu, si kotya wumanyile vyono wawahazo wali ku wudimizi ku Shekemu. Holeka ane nghusaka nghutume kuko kuli wene.” Nayo Yusufu yakatya, “Ane nili baha baba wunhumaje.” 14Nayo sogwe yakawa kumutya, “Ale, wubite wukawalanje wawahazo hamonga ne zimitugo, hono wawe wapolile, ale, wuze wunonjele nane manye.” Hodu Yakobo yakawa kumutuma Yusufu ku wulawa mwi'lolo lya Hebuloni, nayo yakawa kubita ku Shekemu. 15Munhu yunji yakawa kumwagana Yusufu mu nyika, nayo yuyo munhu yakamuwuza Yusufu yakutya, “Alu wukulondola cici?” 16Nayo Yusufu, yakamupitula, yakatya, “Ane nghulondola wawaha zangu. Holeka nghukunena wunonjele hanhu hono wakuzidimila zimitugo.” 17Nayo munhu yu yulya yakamutya, “Nitumbiye vyono kowa wakondya kuwuka ahano, ku soko nawahulika wakulonga wakutya, ‘Vyono wakubita ku Dotani.’ ” Hodu Yusufu yakawa kuwatyatya wawahaze, nayo yakawagana kuko ku Dotani.
18Nawo i wawahaze wali weza kumuwonela kutali yakuza, hodu wakawa kwilumbaniza wamuwulaje. 19Wakalongana weneco wose, wakutya, “Ale, ayulya mulota zindoto yakuza. 20Alenyi cimuwulaje, ciwutaje muwili wakwe mwi'kombo linji. Hanyuma ase cotya vyono, lilimu lya mu mbago limuwulaga. Na hanyuma ho cowona zizo zindoto zakwe vyono zowa.” 21Ninga Lubeni yali yeza kuzihulika zinghani zizo, yakasaka yamuponye Yusufu, holeka yakawatya wanduguze, “Dedede cilece kumuwulaga. 22Mulecele lukulu kuyimwaga sakami. Langa ane nghuwona, yili ciba hono mumugwilize mwi'kombo alino ahano hono nyika, ninga mulecele lukulu kumutamisa.” Nayo yalonga nhavivyo, ho yasume kumuponya Yusufu mu miwoko yawo, hanyuma ho yamugomole ku kaya ko sogwe. 23Nayo Yusufu yali yeza kufika kuli wawahaze, hodu wene wakamuwopola kanzo yakwe. 24Hanyuma wakamusola, wakamugumila mwi'kombo. Ninga likombo lilyo nalyo lyali yikavu lisina malenga. 25Nawo lono wali wekala hasi wakulya zindigwa, wakawona Waishumayeli wapulutaga wali mu muhinzo wakulawa ku Gileyadi, wakubita ku Misili. Zingamiya zawo zali zidinghuye wuvumba, zeli na mane mane. 26Baho nayo Yuda yakawalonjela wanduguze yakatya, “Alu mwene nye, mwene ho cotuga cambuzici hono cimuwulaje yuyu mudodo wetu no kuhundika i cifwile cakwe?”
27“Ane nghuwona, yili ciba cimuguze kuli Waishumayeli wawano, ninga cilece kumutamisa yaye, hambi mwene nha mwanakwawetu, sakami monga na sese.” Nawo wanduguze vikelumbaniza nayo. 28Nawo Wamidiyani wasuluza wali weza kufika baho, wene wakawa kumukwega Yusufu ku wulawa mwi'kombo, wakamuguza kuli Waishumayeli kwa wuguzi wa fweza makumi mejete, nawo Waishumayeli wakamutegula Yusufu ku Misili. 29Nayo Lubeni yali yeza kubita ku kulya kwi'sima, hamba siyamwagana Yusufu mwi'sima. Hodu yakawa kuvidemulanga vivwalo vyakwe ko wukalale wuwaha muno muno. 30Yakawa kuwabitila wanduguze, yakawalonjela yakutya, “Nye, mwanakwetu, Yusufu yali musina mwi'sima, alu hamba nonoza nhawule?” 31Hodu wakasola mhene wakayiwulaga, wakasola kanzo ya Yusufu, wakayizabika mu sakami ye mhene yiyo. 32Wakawa kuyisola kanzo yiyo, wakamutegulila u sogo yawo, wakamutya, “Kanzo ayi ase ciyikuga, ale ta wuyilangaje wuyimanye hono yowa yo kanzo yo mwanago Yusufu hamba ng'o.” 33Nayo sogo yawo yakayimanya kanzo yiyo, hodu yakatya, “Heya yo yeneco! Ane nghuwona vyono kowa lilimu lya mu mbago limuwulaga, liwa kumulya. Mbeka Yusufu yilimu limuhawanga.” 34Baho Yakobo yakavidemula vivwalo vyakwe ko wukalale muno muno, yakawa kuvwala ligunila mu ciwino. Yakamulilila mwanagwe Yusufu vilo vinji muno. 35Nawo wanagwe hamonga ne wanagwe we cicekulu, wose wakamuziza ho wamusindamice, ninga mwene Yakobo siyasaka kusindamikwa, yakatya, “Nye wanangu, ane mundekaje ye, ane nojendelela kumulilila mwanangu Yusufu, sunga kono nobitila nane kuko ku yisi ye wafu kono koyuli mwanangu.” Nhavivi vyo Yakobo yamulilila u mwanagwe Yusufu. 36Nawo wawalya Wamidiyani, wakamuguza Yusufu kuko ku Misili, kuli munhu yunji litagwa lyakwe Potifa u mwitumami muwaha wa Falawo, mono yali yo muwaha we walindilizi.
Chwazi Kounye ya:
Mwamulizo 37: LLKWW
Pati Souliye
Pataje
Konpare
Kopye
Ou vle gen souliye ou yo sere sou tout aparèy ou yo? Enskri oswa konekte
Cigogo Bible © Bible Society of Tanzania, 2002.