Mwamulizo 35
35
U Mulungu yakumulugutiza Yakobo ku Beteli
1Mulungu yakamulonjela Yakobo, yakamutya, “Ale wuwuce bahano, wuhamile ku Beteli ko wukekale kuko. Na lono kowa wuli kuko, ale wunzenjelaje wukumbicilo nene no Mulungu mono nakulawila mwi'daha lono wamutizaga muwahawo Esawu.” 2Hodu Yakobo yakawa kuwalonjela mhuga yakwe na wose wono yali yena nawo, yakawatya, “Ale, mutajile lukulu kutali vihwani vye milungu mijenzi vyono mwina navyo, mwiyeze, kanyhi mukawanize ne vivwalo vyenyu. 3Hanyuma cibite ku Beteli, nghamuzenjele wukumbicilo Mulungu mono yanhaza lono nali nili mu wugaye, kanyhi yakawa yali hamonga nane hanhu hose hono nabitaga.” 4Hodu, wakawa kumupela Yakobo vihwani vyose vye milungu mijenzi vyono wali wena navyo, hamonga ne viheleni vyono wali wavwalile mu makutu gawo, nayo yakavifuciliza he'sina lyo mubici wo Munghola wono wali wuli behi na Shekemu.
5Nayo Yakobo hamonga ne wanagwe lono wali wali mu muhinzo, Mulungu yakawogofya wanya wusi we makaya gose ge behi behi, hamba siwejelela kuwatyatilila. 6Nayo Yakobo yakafika ku Luzu, wo wutya ku Beteli, mu yisi ya Kanani, hamonga ne wanhu wose wono yali yena nawo. 7Yakazenga baho wukumbicilo, yakahacema Eli-beteli, vyono ho baho hono Mulungu yelajilila kuli Yakobo, mwi'daha lono Yakobo yamutizaga muwahawe Esawu. 8Nayo Debola mono yamukocaga Labeka, yakafwa, yakazikwa he'sina lyo mubici wo Munghola lubavu lwe takama ya Beteli. 9Na lono Yakobo yali yakondya kuwuya ku wulawa ku Padani-alamu, Mulungu kanyhi yakamulawila, yakamulugutiza. 10Mulungu yakamulonjela Yakobo yakamutya, “Litagwa lyako Yakobo, ninga alu sikocemwa kanyhi Yakobo, langa ku wulawa lulu, litagwa lyako kocemwa Isilayeli.” Holeka Yakobo yakacemwa mweneco Isilayeli. 11Mulungu yakamulonjela Yakobo kanyhi, yakatya, “Ane yo nene Mulungu u Mudaha Vyose, holeka wulele wonjelezece. Na muli gwegwe, mono nozeza likungugo, sunga ne makungugo, sunga ne watemi wose wolawilila muli gwegwe. 12Ne yisi yono nawapela wa Abulahamu na Isaka, ale, nokupela gwegwe yiwe yako hamonga no lulelo lwako.” 13Hodu Mulungu yakawa kuwuka i hanhu baho hono vyalonganilaga na Yakobo. 14Nayo Yakobo yakawa kusimya wima lisumbili lye libwe liwe cikumbucizo, vyono baho ho Mulungu yalonganila nayo. Yakobo yakalijidila mafuta mucanyha yayo, hamonga ne ving'wegwa, yakalisiwanula. 15Ale, Yakobo yakawa kuhacema Beteli, baho hanhu hono vyalonganila no Mulungu.
Wufwe wa Laheli
16Nayo Yakobo hamonga ne mhuga yakwe yose, wakajendelela no muhinzo wawo ku wulawa ku Beteli, na lono wali wasigala cihinzo cidodo vivi du wafice ku Efulata, hodu Laheli yakawa kwibatwa no wusungu wuwaha muno muno wo kusawa. 17Nayo lono yali yali mu wusungu wuwo wuwaha, u mudala mono yamulanjililaga yakamutya, “Gwe Laheli, wulece kugopa, hambi nha watuga mwana yunji wa cilume.” 18Nayo Laheli lono yali yali mu wufwe, yakamucemela mwana yuyo litagwa lya Benoni. Ninga sogwe yakamucemela mwana yuyo litagwa lya Benyamini. 19Hodu Laheli hobaho yakawa kufwa, wakawa kumuzika ha mhelo ye nzila yono yibitile ku Efulata, wo wutya Betelehemu. 20Yakobo yakasimya yibwe mucanyha ye citenjelo ca Laheli ho liwe cikumbucizo, nalyo lili baho sunga nalu. 21Nayo Isilayeli yakajendelela no muhinzo wakwe, yakasimya nghambi yakwe lono yali yakondya kuwupuluta munala wa Edeli.
22Na lono Isilayeli yekalaga mu yisi yiyo, mwanagwe Lubeni, yakamwinjilila Biliha u mujitulwa wo sogwe, yakagona nayo. Nayo Isilayeli yali yeza kuzihulika zizo, yakakolwa ne likuwo muno muno.
Wana wa Yakobo
(1Zin 2:1-2)
Yakobo yali yena wana yikumi na wejete. 23Nawo wana wa Leya wali wo awano, Lubeni u mulelwa mulongozi wa Yakobo, Simiyoni, Lawi, Yuda, Isakali, na Zabuloni. 24Nawo wana wa Laheli wali wo awano, Yusufu, na Benyamini. 25Ne wana wono walelwa na Biliha u mwitumami wa Laheli, wali Dani na Nafutali. 26Na wono walelwa na Zilipa u mwitumami wa Leya, wali Gadi na Asheli. Wawo wo wana wa Yakobo wono walelelwa ku Padani-alamu.
Wufwe wa Isaka
27Yakobo yakabita kuli sogwe Isaka, ku yisi ya Mamule, likaya lya Alaba, nha cinji Hebuloni, hanhu hono Abulahamu na Isaka wekala kotya wajenzi. 28Isaka yekala mono'nze myaka yigana limonga na makumi munana. 29Isaka yakafwa, yaweza mukombi muno muno. Wa Esawu na Yakobo wanagwe wakamuzika.
Chwazi Kounye ya:
Mwamulizo 35: LLKWW
Pati Souliye
Pataje
Konpare
Kopye
Ou vle gen souliye ou yo sere sou tout aparèy ou yo? Enskri oswa konekte
Cigogo Bible © Bible Society of Tanzania, 2002.