ISAYA 57
57
Misambwa chia Israeli ni chi Shikhaya
1Vandu vi likhola liu vulunji vakhutsanga,
navutswa mundu avulakhuho uheendanga mwoyo;
lwa mundu mulahi akhutsanga,
mundu avulakhuho wamanya shindu khulondokhana khuye.
Vandu vi likhola liu vulunji varulitswangwa mu matiinyu,
2khu vamenye mu milembe.
Vandu valondanga injila yatoto
valiitsa khuva ni milembe nu khuhulukha.
3Navutswa Mwami Nyasaye avoolanga,
“Hambi hanu, munyi vaana va valoochi;
munyi vaana vivulwa khu mukhali muheeyi
nende mukhali mulaaya!
4Ni viina wamukholanga shihenye henye?
Ni viina wa mukhomolanga nu mung'ong'olitsa?
Munyi munyala khuva shituma shia vahingani,
vaana vivulwa khurulana khu vukaati?
5Munyi muhulilanga likomba lilulu muno
liu khukona mu misala chi miseno,
khandi shia havundu hosi ha musala kwameela;
mukholanga mu luhoongo misango chia vaana venyu,
khali hasi mumatiivo ki tsinyanda.
6Muvukulanga machina malahi kaswelelekha khurulayo
mamusaala khuko khuli ni vanyasaye venyu.
Musuundulanga hasi idivai
khuli ni shihanwa khuvo ma muvaha vihanwa vi imu.
Mukanakananga ka mukholanga kanyanzitsanga?
7Mwalomba vitali vienyu hikulu wi shikulu shiaraambiha muno;
naho ha mwatikuulukha numutsia khukholela misango chienyu.
8Inyuma wi miliango chi tsinzu tsienyu
nende mu vwinjililu vwi miliango
mwavikhamu shimanyilu shienyu;
shichila lwa mwambakhana inzi,
kali vutswa khuli shiumwayalula vitali vienyu tawe;
mwanina khuvio manuvikalihitsa;
mwakhola lilakano na yavo vamwayaanza
khukonanga khu vitali viavo,
manuvalola ni vali shekenye.
9Mwasimukha numuchinji makura ku musayituni
nende makura ku khwivekha lukanu nu lukanu
manumutsia khusaala khu Moleki.
Mwaruma varumwa venyu ihale wene;
khali khutsia hasi mu vilindwa.
10Mwateteshela shichila tsinjendo tsienyu tsindambi,
khali ndio, mwali numushili khukhutsa mwoyo;
mwalolanga munyoli tsingulu vuyia,
numuvula khushiinda.
11Ni viina wachila numuria khandi numutechela,
wachila numungaata, khali numunzivilila,
vuchila khukanakanakhu shindu khwinzi?
Kanyala khuva ndi muhonjelu khuluhono,
khali ka mukholanga khuvula khumba luyali?
12Mukanakananga mukholanga likhola liu vulunji,
navutswa nzitsanga khura mwiima kwenyu havulavu,
nende misambwa chienyu chi shikhaya
chiliitsa khuvula khumukhonya.
13Lwa mulilanga tsikhwili nu mwenya khukhonywa,
reevi misambwa chienyu chia mwinyolela chimuhonyinyi!
Vushindu vuliitsa khuchihilana,
muya kwonyene nakwo kuliitsa khuchihuutsanyinya.
Navutswa mundu wilushilanga mwinzi neye uliitsa khuvukula shivala,
nu khumenya mu shikulu shitakatifu shianje.”
14Mwami Nyasaye avoolanga,
“Yumbashi! Yumbashi! Recheshitsi injila!
Rulitsi shia shindu shiosi shichilanga vandu vaanje nivisikarila mu injila.
15“Ninzi Nyasaye uli ikulu muno,
uli mwoyo mihika ni mihika, ulaangwangwa Mutakatifu;
menyanga ikulu muno, Havundu Hatakatifu.
Menyanga khandi na yavo vanyashitswangwa khandi vichehitsanga,
khutinyilitsa vandu vanyashitswangwa nu khuha vandu vichehitsanga tsingulu.
16Nzitsanga khulekha khumuyaala mihika ni mihika,
inoho khumuvukulila vurima shia khase khosi;
shichila nikava ni kario mundu aliitsa khukhutsa mwoyo shichila inzi --
nu kuli muya kwa navikha mu mundu wa naloonga.
17Navukulila vandu vurima shichila vwoni vwa vakholanga nende vung'wang'wa vwavo,
ninzi wavasalilitsa, ninzivisa khandi nivavukulila vurima;
navutswa vatsililila khulonda ka vene valolanga ni malahi.
18Mali khulola mwiima kwavo, navutswa niitsa khuvahonyinya;
niitsa khuvimilila nu khukalushila khuvaleminya mwoyo,
khutukha lwa vandu vikhulanga mu Israeli varaanga khwimba
tsinyimbo tsiu khwitsominya.
19Niitsa khuchila vamenye mu milembe,
milembe khu vandu vamenyanga ihale wene khandi khu vali himbi;
niitsa khuvahonyinya.
Inzi Mwami Nyasaye mali khuvoola.”
20Navutswa vandu vatamanu vali khuli inyanza ya imbuutsa ihuutsanyinyanga,
inyanza inyala khuvula khuhonjela,
ya matsi kayo kachinganga malova nende indakala.
21Nyasaye wanje avoolanga,
“Vandu vatamanu valiitsa khuvula khumenya mu milembe.”
© The Bible Society of Kenya, 2013