ISAYA 56
56
Lilakano ni lia Vandu Voosi Vasuuvilanga
1Mwami Nyasaye avoolanga,
“Mutsililile khukhola katoto,
khandi mukhole likhola liu vulunji,
shichila nzitsanga khumuhonyinya vwangu yuvu
khandi likuura lianje liliitsa khumanyinywa.
2Ali ni khaavi mundu wu kholanga kenako,
mundu ulondelelanga kenako,
uheetsanga litukhu li Lisabato luyali,
khandi yiyikalila khukhola vindu vitamanu.”
3Mucheni wamanya inzi Mwami Nyasaye avuli khuvoolakhu,
“Ni likali, Mwami Nyasaye alanzahula haluveka
khurula khu vandu veve,”
khandi shitsili shivoole,
“Inzi nakwa vutswa khuli musala muumu.”
4Shichila inzi Mwami Nyasaye mbolelanga mundu shitsili uheetsanga litukhu lianje li Lisabato luyali,
shikholanga kanyanzitsanga
nu khumenya khulondokhana khu lilakano lianje,
5ndi shilitsa khunyola khurula khwinzi shindu shilahi
khuvira vaana vi shiyayi nende vi shikhana
shindu shia shilitsa khwitsushitsilakhu
khandi lira mu Litempeli lianje nende mu masisi kalio.
Niitsa khushiha lira li mihika ni mihika liliitsa khuvula khwivililwa.
6“Niitsa khukhola vandu vacheni vasuuvilanga mwinzi Mwami Nyasaye,
vandumishilanga,
vanyanza khandi vasaalanga khwinzi,
voosi vaheetsanga litukhu li Lisabato luyali
khandi vamenya khulondokhana khu lilakano lianje --
7khutsia khumenya mu shikulu shianje shitakatifu,
khandi njili vave nu vuyaanzi mu inzu yanje yi lisaala.
Niitsa khuhuchilila vihanwa viavo viu khusambwa nende misango chiavo khu vwaali vwanje;
shichila inzu yanje iliitsa khulaangwa
inzu yi lisaala khu vandu voosi.
8Niinzi Mwami Nyasaye,
warulitsa vandu veve mu vuhaambe,
mbolanga havulavu ndi niitsa khulera khandi halala
vandi khwiyunga na yavo valerwa khale halala.”
Khuli Vamihi va Israeli Vakoyana
9Munyi tsinyama tsiumbulimu tsiosi
hambi mulumakanyinyi,
munyi tsinyama tsiosi tsiu mu muliru!
10Shichila valindi va Israeli ni vavekhu,
voosi vavula vucheli;
voosi vali khuli tsisiimbwa tsiahonjela,
tsinyala khuvula khusama;
vakonanga hasi mavaloora,
vayaanza khukona tsindolo.
11Tsimbwa tsili nu luusa lu khulia lunyala khuvula khuvwa;
khali tsiliitsanga shiukhulia khuvira shichelo.
Khali vayi vavula limanya khandi;
voosi vakoyana;
shia mulala akholanga ka muyaanzitsanga mwene.
12Vavoolelananga, “Hambi,
chendi khutsi khukhava idivai!
Hambi khung'wi malwa khutukha khwikuri!
Kaliitsa khuva malala mele mukamba khuli nunundi
inoho khali malahi muno!”
© The Bible Society of Kenya, 2013