Bambata Pai 44
44
Pa ga Yosefa inga
1Yosefa ki rugu buruku gako kporo ki ya, “Oni hihisi ga akumba agbaguda ni riahe, ni bakere he a wa rengbe yo ka tinda ha, ki moi ga akumba marã ni ba sa sa ti ngba gayo agbaguda. 2Mo ki moi gi inga, nga inga feda, ku rogo ga kiaro gbaguda yo na gako marã zende ahe a.” Ko ki mangi he a wa Yosefa agumba pa ha. 3Ho rago agiri ni, i ki fu gene fu akumba na gayo adongi. 4Ho i aguari ni bakporo yo, ka i ata turã nga ya, Yosefa ki ya fu gako buruku, “Mo gúari ki do fuo agu akumba re. Ho mo ka gbia yo ni, mo ki ya fu yo, ‘Tipagine mangi oni gbegberẽpai ti ni ku ba wenepai? 5A nga gi he re ni rengo bairare nambira he rogo ho, ki nisoroka na ni te? Oni mangi gbegberẽpai ni manga wo.’ ”
6Ho ko agbia yo ni, ko ki gumba agi apai re fu yo. 7I ki ya fu ko, “Tipagine gumba bairarani agi apai ti ni re wa gure? Ka manga wa gure si ti gamo amoyambu tuturũ! 8Mo ngére, gu marã ani abi ti ngba gaani agbaguda ani aye na ni foro berewe ringara Kanana yo; ka ani wiri pa dĩ feda waĩ rogo ga bairaro bambu yo watadu dahabu? 9Gu ni i ka bi he be ni dagba gamo amoyambu, ni akpí akpi, ani ki du ni akanga fu bairarani a.” 10Ko ki ya, “Si adú a wa gumba oni he; gu ni i ka bi he be ni, ni adú ni gi kanga, ngbanga adú nga ku ri roni te.” 11Akumba ni ba sa sa ki zogo gayo agbaguda ni ipo ku sande i ki za ngba gayo agbaguda ni ba sa sa a. 12Ko ki tona ka ngera ku rogo ga unvuru, ki susi na ngera rogo ho kindi dati ga kiaro; ko ki bi inga rogo ga Benyamina gbaguda yo. 13I ki sipi gayo aroko, i ni ba sa sa ki tapa tindiro ku auru gayo adongi, ki karaga tiyo ku bakporo yo.
14Ho Yuda aye ni na awiribako ku tii ga Yosefa bambu, ko adu kina yo kindi. I ki titiwi ku sande bara bangiriko. 15Yosefa ki ya fu yo, “Gini pai nga gi mangi oni re? Oni aina nga ya kumba wa mi were rengbe na soroka te?” 16Yuda ki ya. “Ani aya waĩ fu bairare? Ani agúmba gini pai? Watadu ani ambákada gaani pai na gine? Mbori ima bi gu irairapai nga ga gamo amoyambu. Mo ngére, ani nga gamo akanga awere, ani na gu ko i nibi inga be ko re.” 17Ko ki ya, “Manga wa gure si ti re tuturu! Kina gu kumba i nibi gi inga be ko re nikadu ni gi kanga; ono gu yangara roni, oni ki ga koyo du baroni ni zezeredi.”
Pa zúngadi Yuda pai tipa Benyamina
18Yuda ki ye ki mbedi koyo du ko ni, ki ya. “Ako bairare, mi nazungadi ro, mo ídi he fu ga moyambu mi gumba pai fu bairare; ka ngbaduro ími nga kuti ga moyambu ya, bambiko mo wa kina Faro. 19Bairare asana gako amoyambu ya. ‘Baroni kina ho, watadu kura wiribaroni?’ 20Ani ki ya fu bairare, ‘Barani kina ho, ni gbinza kumba, na gako wiri gbinza ni toni ko. Wirinako aima kpi, kina ko vuru nako yo sa nanye, ko bako akpi nyemu ko.’ 21Mo ki ya fu gamo amoyambu, ‘Oni yé na ko kono du mi ni, ya mi úka bangire ti ko.’ 22Ani ki ya fu bairare, ‘Ka gude guari nga pati bako te, bambiko ka ko guari pati bako bako akpí akpi.’ 23Mo ki ya fu gamo amoyambu, ‘Oni abí nga kpakpure berewe te, kina gu ka oni yé na gaoni kiaro.’ 24Si ki ta du wa gere, ho ani aga ni koyo du ga moyambu ni nga barani, ani agumba sangba bairare fu ko. 25Barani ki ya, ‘Oni ndú berewe ka ngbeka bete riahe fu rani’, 26ani ki ya, ‘Ka ani ndú nga te, kina gu ka gaani kiaro dú na ani, si du ka ani ndú ti ni; bambiko ani abí nga kpakpu gu kumba te re, kina gu ka gaani kiaro du na ani.’ 27Buba ki ya fu rani nga ga moyambu, ‘Oni ini he ya diare abatika agude fere kina ue; 28gu ko ki guari pati re sa, mi ki berẽ he tigimi, Nya sipi ko ni rengo; ka mi abi nga ko fuo gure berewe ya. 29Ka oni dí gi ko re be re berewe, ka gbigbita pai mángi ko, oni akéda re na pusi mangerire ku murã yo na kina rungo.’ 30Si du, ka mi dá koyo du ga moyambu ni nga buba ka gude adú nga na ani ya, wa du mbisimo gude ti ko gbe, 31wo si ka du re, ho ko ka abí nga gude ni na ani ya, ko akpí akpi; si adú wa gamo amoyambu kedi ga moyambu nga barani na pusi mangeriko ku murã yo na kina rungo. 32Bambiko ga moyambu adu tipa gude fu buba ki ya, ‘Ka mi ayéga nga na ko foro ya, si ki du ku ri re bangiri buba kindi wa du mi ni ungare.’ 33Si du mi azungadi ro ti ni, mo ídi he ya ga moyambu nyé ku ba gude ni kanga fu bairare; gude ki ga na awirmako. 34Bambiko ka gude adú nga be re ya, mi wiri pa ndu koyo du buba ni waĩ? Mi nagunde ka bi gu gbigbitapai nikamanga buba.”
Chwazi Kounye ya:
Bambata Pai 44: ZB1978
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
La Sainte Bible en Zande © Alliance Biblique Universelle, 1978.