AGaratio 3
3
Rugute watadu idapase
1Ako airamungo aGaratio, da namangi roni, oni i ayugu Yesu Kristo ni wagiwagi ko ku bangironi gbayaga? 2Mi nakpi nyemu ka ina kina gi pai sa re be roni. Watadu manga rugute na gia pa idapase, gini gu oni adi Toro be he? 3Oni mungo wo? Wa oni atona pai rogo Toro yo, oni nikadu ni ziazia roni awere mbiko borose? 4Atika oni ahi apai ni dungu he were gbua? ka ngia gbua nadu rengo. 5Were gu ko nafu Toro fu roni, ki nimangi agu apai du na tandu dagba roni, watadu manga rugute na gia pa idapase, gini gu ko namanga ha be he?
6Kina wa Abarayama aidi pa Mbori, si du Mbori aya ti ko ruru boro nga ko 7Oni bí nga tie, agu yo idi pase, kina yo nga awiri Abarayama. 8Ziazia Kekeapai aini aina mbata ya Mbori asapa ngbanga fu aGendiria mbiko idapase, ki nitungusi wene pangbanga mbata fu Abarayama, niya, “Rogo ro yo i ka fu maku ni fu arika aboro dunduko.” 9Were agu yo idi pase i nga aboro maku na Abarayama tie naidi pase.
10Bambiko agu yo nga aboro rugute i du motiwa ri yo: bambiko si ni keke he, ya, “Tiwatiwa aboro nga agu yo dunduko aka nga kuti agu apai du ni keke he ti kitabu rugute dũ, ka amanga ha ya.” 11Were a nga boro sa i ka sara ngbanga fu ni ku bangiri Mbori mbiko rugute te, gere nga binibangirise; bambiko, “Ruru boro nara mbiko idapase.” 12Ono rugute ti idapase te; “Gu ni namanga ha ni adu ni ungani mbiko ho.” 13Kristo atumo rani be motiwa rugute, nisa tiko ni boro motiwa tipa rani ― bambiko si ni keke he ya, “Tiwatiwa aboro nga agu yo i aasa yo ti ngua dunduko”― 14ya gu maku ye i afu fu Abarayama ku ri aGendiria rogo Kristo Yesu yo; ani di gu kidohe nga ga Toro mbiko idapase.
Rugute na mokido
15Awirina, mi nagumba pai ni sino aboro: ka kina boro vura rú ndika si ki rengbe, a nga boro sa ka di he ba ha te, ka moi pai ku ri he a te. 16Were, i agumba pa mokido fu aAbarayama na titako. Ko agumba nga ya, “Fu ngbatungaro wa nge yo” te: ono wa ka ni du sa, “Fu ngbatungaro sa nga Kristo.” 17Were ya mi wẽ; gu ndika Mbori aringbisi mbata, gu rugute ye fuo ho garã nasaki 430, ka si ba nga ha ka sa mokido ni kungba he ya. 18Bambiko ka i di kumbo mbiko rugute, si wa si mbiko mokido te. Ono Mbori afu he fu Abarayama ni mokido.
19Gine nga rugute tie? I amoi he ku ri he mbiko yugo ingaapai, da kina ho gu ngbatunga ka ye ni i akido pa ko fu Abarayama. I afu rugute vurube amaraika ku ngba azarõ. 20Were azarõ adu nga fu kina gu boro sa te; ono Mbori adu sa ku bani.
Ndu gu pai i afu rugute ti ni
21Rugute nati kangu ga Mbori mokido tie? Wasate; bambiko ka i afu rugute si rengbe na fu unga, ka Mbori asa boro ni ruru ni mbiko rugute rengo. 22Ono Ziazia Kekeapai azi gbegberẽpai kuti ahe dú, i fu úmokido mbiko ida pa Yesu Kristo fu agu yo idi pa ko.
23Ono mbata idapase nikaye, i adika rani kuti rugute ni kisikisi rani sa gu idapase i aye ka yugo. 24Si du du rugute ti ni ni gaani bayugupai ka ye na ani koyo du Kristo ni, i sapu ngbanga fu rani mbiko idapase. 25Ono wa idapase aye awere, ani tii be bayugupai berewe te. 26Bambiko oni nga awiri Mbori dunduko, mbiko idapase, rogo Kristo Yesu yo. 27Bambiko agu roni dunduko i abapatizi roni ku rogo Kristo yo, oni aukadi tironi ni Kristo. 28A nga boro sa du ni Yudo ni Giriki te, du ni kanga ni gu boro ra ni rini a te, du ni kumba ni de a te: bambiko oni ni boro sa rogo Kristo Yesu yo. 29Si ngia ga Kristo yo nga oni, oni nga ngbatunga Abarayama tie, nga adikumbo mbiko mokido.
Chwazi Kounye ya:
AGaratio 3: ZB1978
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
La Sainte Bible en Zande © Alliance Biblique Universelle, 1978.