Wóɖómà 15
15
Ɓě mɛ ɓɔ́ ɓě mìɔùn hwòɖǒ dyi dèɛ̀, kɛɛ ɓě mɛ dè ɓě mǔè ɖòɛ̀ hwòɖǒ dyi
1À mɔ̀ nyɔ ɓě kuà dyiɛɛ, à ɓéɖé ɓɛ́ à ké à mǔè ɓě seà dyi kuɛɛ hwìɖǐi-poìn-ɖɛ̀ ɓěɔ̀ hwòɖǒ kùìn. À se ɓéɖé ɓɛ́ à ké à mìɔùn nììn hwòɖǒ dyi dè. 2À séín mɛ dè à mǔè ɖòɛ̀ hwòɖǒ dyi ɖé hwìè ɓɛ́ ɔ nɔ̀mɔ̀ dyíin ɓó ɔ bììɛɛ mú, ɓɛ́ ɔ kéɛ nyu ɓɛ́ ɔ ké dyi ku. 3Sepóɛɖé Kɛ́ɖɛ́ì se ma ɔ mìɔùn hwòɖǒ dyi dè, kɛɛ Gèɖèpɔ́ɔ̀-cèè-ɖɛ̀ɔ̀ ɖá, “Nì mú-nyɛ́-nyɔ̀ ɓěɔ̀ dyi m̀ wuɖuún ɖaɓa ní, nìí, mɔ̄ mɔ̀ nyɔ wa ɖaɓaà wuɖuún wɛ̃̀.” 4Sepóɛɖé ɖɛ séín ɓě ɓɛ́ wa ɖǎ zɔ̃̌ɔ̀ kà céè kĩ́ín nyɛɛ, ɔ mɔ̀ ɓɛ́ wa ké à ɖɛ tɛ̀mɛ̀ìn. Ɔ nì ma ná, ɓɛ́ à ké hwòɖǒ-kɔ̃-dè-ɖɛ̀ ɖò ɓéɖé dyììn ɖé hwòɖǒ-ku-ku ɔ kè kpéí-po-po ɓɛ́ Gèɖèpɔ́ɔ̀-cèè-ɖɛ̀ɔ̀ nyíà à kɛɛ mú. 5Ké Gèɖèpɔ́ɔ̀ mɔ̀ nyɔ ɓɛ́ ɔ nyíà nyɔǔn hwòɖǒ-ku-ku kè kpéí-po-poɛɛ mɛ nyuɛ ɓɛ́ ɓě ké hwòɖǒ dyúáɖò ɓéɖé kà Kɛ́ɖɛ́ì Jízɛ̀ nìà kɛ. 6Ɔ mɛ nyuɛ náa, ɓɛ́ ɓě ké Gèɖèpɔ́ɔ̀ mɔ̀à à Bounɓoɔ̀ Jízɛ̀ Kɛ́ɖɛ́ì Ɓǎ kɛɛ ɓàìn ɖé hwòɖǒ dyúáɖò kè wuɖu dyúáɖò mú.
Bɔ̃̌ nɔ̀mɔ̀ dyíinɔ̀ mu ɖé ɓóɖó-dù kà kò ɖò ɓěɛ̀ nyɔ ɓěɔ̀ gbo
7Ɖɛa jè ɓě mɛ kpɔ̃ìn kpɔ̃̀ìn jè dyi kà Kɛ́ɖɛ́ì ɖǎà à dyi kpɔ̃ɛ, ɓɛ́ Gèɖèpɔ́ɔ̀ ké ɓàìn-ɓàìn ɓéɖé. 8Ḿ cɛ̃ɛ náa, sepóɛɖé Kɛ́ɖɛ́ì mɔ̀ ma Júù-nyɔ̀ ɓěɔ̀ gbo-nì-nyɔ̀, ɓɛ́ ɔ kéɛ ma nyɔǔn dyí tɛ̀mɛ̀ìn kà ɓɛ́ Gèɖèpɔ́ɔ̀ mɔ̀ jǎà Gèɖèpɔ́ɔ̀ kɛ, ɔ kè ɓɛ́ ɔ ké ma nyɛ́nɛ́ín-ɖáìn-ɖɛ̀ ɓě ɓɛ́ Gèɖèpɔ́ɔ̀ nyí ma à ɓǎ nììn ɓǎ ɓěɛɛ nyu ɓɛ́ wa ké jǎà kpá, 9ɔ kè ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ ké Gèɖèpɔ́ɔ̀ ɓàìn ɓó ɔ nyɔǔn wìǐn dyé jè. Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá,
“Ní mu mɔ̀ mɔ̀à Bounɓoɔ̀ kɛɛ ɓàìn ɖé ɓóɖó-dù séín nyɔ ɓěɔ̀ hwìɛ̀,
ké ní mu nì nyɛ́nɛ́ɔ̀ mú ɓèɖèìn.”
10Ké ɔ ɖǎ céè ɖe, ké ɔ ɖá,
“Ɓóɖó-dù ɓěo, ɓě kè Bounɓoɔ̀ nyɔ ɓěɔ̀ mɛ nyu múà.”
11Ké ɔ céè ɖe, ké ɔ ɖá,
“Ɓě mɔ̀ ɓóɖó-dù séín ɓěɛɛ, ɓě ɓàìn Bounɓoɔ̀.
Ɓě mɔ̀ toɖo-kɔ̃-nyɔ̀ séín ɓěɛɛ, ɓě ɓàìn Bounɓoɔ̀.”
12Ké Àzédyà cɛ̃ɛ ɖe, ké ɔ ɖá,
“Jɛséɛ̀ nyúà-dyú ɓěɔ̀ ɖò mu dyiìn.
Ɔ mɔ̀ nyɔ mu dyí sɔ̀ùn, ɓɛ́ ɔ ké ɓóɖó-dù kà kò ɖò ɓěɛ̀ nyɔ ɓěɔ̀ wuɖuí kɔ̃̀.
Ɔ mɔ̀ nyɔ ɓóɖó-dù kà kò ɖò ɓěɛ̀ nyɔ ɓěɔ̀ mu hwòɖǒ kɔ̃ dèìn.”
13Gèɖèpɔ́ɔ̀ mɔ̀ nyɔ ɓɛ́ ɔ nyíà nyɔǔn hwòɖǒ-kɔ̃-dè-ɖɛ̀ kɛɛ mɛ dyíìn ɓě múà kè gìɖìǐ múin dyììn ɖé ɓěɛ̀ hwìɖǐǐ-taɓa-taɓaɔ̀ mú, ɓɛ́ Zùù Hwɛ̀ǐn-hwɛ̀ǐnɔ̀ kpéɔ̀ kéɛ nyu ɓɛ́ ɓěɛ̀ hwòɖǒ-kɔ̃-dè-ɖɛ̀ɔ̀ ké dyí vò.
Ɖɛ kɔ̃̀ jè Pɔ́ɔ̀ wùɖùà hwòɖǒ-ku-kà ɖé ɔ céè-ɖɛ̀ɔ̀ múɛ
14Ḿ ɖíí ɓě, ɖɛ nɔ̀mɔ̀ dyíin nyu-nyu bã ɓě mú, ké ḿ se kɛɛ ɖò ɓéɖé ɓóɛ jè. Fɔ̀nɔ̀-hwòɖǒ kò-kò ɓě dyí ɓě mú, ké ɓě ɓéɖé kpé, ɓɛ́ ɓě ké náún poìn pòìn. 15Ḿ ɖǎ céè-ɖɛ̀ nìà kɛ wáká ɖíɛ́ ɓě mú wùɖù gana-kà. Ḿ nyuɛ náa, ɓɛ́ ḿ ké ɓě ɖɛ hwìɖǐi dyà ɓó ɖɛ ɓɛ́ Gèɖèpɔ́ɔ̀ ɖǎà ḿ nyíɛɛ jè. 16Ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ ɖǎa nyu ké ḿ mɔ̀ǎ kà Kɛ́ɖɛ́ì Jízɛ̀ɛ̀ gbo-nì-nyɔ̀ ɖé ɓóɖó-dù kà kò ɖò ɓěɛ̀ nyɔ ɓěɔ̀ hwìɛ̀ kɛ̀. Ní sáa-zà-kũ̀àɔ̀ mɔ̀ bɔ̃̌ nɔ̀mɔ̀ dyíin ɓɛ́ ɔ sɔ̀ìn kà ɖé Gèɖèpɔ́ɔ̀ gboɛɛ cɛ̃-cɛ̃, ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ ké nyíí-ɖɛ̀ ɓɛ́ Gèɖèpɔ́ɔ̀ ɓɛ́ìn dyi kpɔ̃ɔ kɛɛ jǔ. Zùù Hwɛ̀ǐn-hwɛ̀ǐnɔ̀ nyuɛ ké bɛ̃̌ ɖò se wa bũ̌ nì. 17Ɖɛa kɔ̃̀ jè, ɖé Kɛ́ɖɛ́ì Jízɛ̀ mú, ɖé ḿ ɖǎ ɖɛ kɔ̃̀ jè ɓɛ́ ḿ ké ɓɔ́ɖɔ́ ɓó ní Gèɖèpɔ́ɔ̀ kũ̀à nyu jèɛɛ ɓéɖé. 18Ḿ se ɖɛ ɖò jè wùɖùɛ̀ ɓɛ́ìn fóɖóún, ɔ sèìn ɖɛ ɓɛ́ Kɛ́ɖɛ́ì nyùìn ma ɖé ḿ múɛ. Ɔ nyùɛ̀n ma ɖéɛ ḿ mú, ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ ké ɔ wuɖu nyu. Ɔ nyùɛ̀n ma ɖéɛ wuɖu kè nyuu-ɖɛ̀ mú, 19dyììn ɖé kpé ɓɛ́ ɔ tɛ̀mɛ̀ìn ma kà nyɔǔn dyí ɖé ɖàɓàìn-ɖɛ̀ kè ɖɛ dĩ́ín-dĩ̀ìn ɓě múɛɛ mú, ɖé Zùù Hwɛ̀ǐn-hwɛ̀ǐnɔ̀ kpé mú. Ɖɛa nyuɛ ké sɔ̀ìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kéà ɖé Ìɖèwíɖíkà-ɓòɖòɔ̀ kɔ̃ muɛɛ, ḿ ɖǎ ɖé bɔ̃̌ nɔ̀mɔ̀ dyíin ɓá Kɛ́ɖɛ́ì dyíɛɛ cɛ̃ɛ hwɔ. 20Ḿ nì ma vɔ̃uń cá, ɓɛ́ ḿ ké dɛ̀ wa séèà Kɛ́ɖɛ́ì nyɛ́nɛ́ɔ̀ wɔ̃́ keɛɛ bɔ̃̌ nɔ̀mɔ̀ dyíinɔ̀ cɛ̃. Ḿ se mɔ́ ɓɛ́ ḿ ké dɛ̀ ɓɛ́ nyɔ ɖò mɔ̀ùn ɖǎ gbǒ poɛ gbɔ dèɛɛ gbǒ po. 21Kɛɛ ɖɛ Gèɖèpɔ́ɔ̀-cèè-ɖɛ̀ɔ̀ cɛ̃ɛ, ɔ kɛ̀. Ɔ ɖá,
“Nyɔ ɓě séèà ɔ bɔ̃̌ wɔ̃́ ɖòɛɛ, wa mu ɔ dyéìn.
Ké nyɔ ɓě séèà ɔ jè wɔ̃́ ɖòɛɛ, wa mu ɔ jè múin wɔ̃́ùn.”
Pɔ́ɔ̀ poìn hwìɖǐi ɓɛ́ ɔ ké ɖé Wóɖóùn-hwɔ̀ɖɔ̀ɔ̀ mú mu
22Ɖɛa kɔ̃̀ jè, ḿ ké ɖé ɓě gbo dyiín, ɖɛ ɖò kpɔ̃à ḿ dyí teeɛ̀. 23Kɛɛ ɓó kàǔn wɛ̃ɛ, ḿ se kũ̀à-nyu-naín ɖò ɓéɖé nɔ̄ gbɛ̌ɛ̀ ɓěɛ̀ mú ɖe. Ɓě dyé-tò nyu ḿ ɓó zɔ̃ ɓáún-ɓáún xwíníín. 24Ɔ jèɛɛ, ti ḿ mu ɖé Sépéìn-ɓòɖòɔ̀ kɔ̃ muɛń nììn nyɛɛ, ní mu ɖé ɓě gbo pàìn. Ɔ jǔ ké à ɖǎ tó zaìn ɓó ti wè múín, ḿ dèɛ̀ hwòɖǒ kɔ̃ kà ɓɛ́ ti ḿ dyi muɛń nììn nyɛɛ, ɓě ké ḿ cuò. 25Kɛɛ ḿ nì Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń kàǔn, ɓɛ́ ḿ ké ɖɛ ɓě ḿ ké Gèɖèpɔ́ɔ̀-nyɔ̀ ɓěɔ̀ gbo kpáìn nyɛɛ kpa. 26Sepóɛɖé Màsèdónìà-ɓòɖòɔ̀ kè Àkédyà-ɓòɖòɔ̀ nyɔ ɓěɔ̀ poìn ma hwìɖǐi kà ɔ mu ma dyíin nɔ̀mɔ̀ùn, ɓɛ́ wa ké ma gǎ-dyé-nyɔ̀ ɓě ɓɛ́ wa nì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖé Gèɖèpɔ́ɔ̀-nyɔ̀ ɓěɔ̀ hwìɛ̀ kɛɛ ɖɛ ɖò kɔ́ìn nyɛ. 27Wa poìn ma hwìɖǐi kà ɔ mɔ̀ ma ɖɛ nɔ̀mɔ̀ dyíin nyɛ. Ké ɖeɛɛ, Jùɖúsɛ̀ɖɛ̀ìn-nyɔ̀ ɓěɔ̀ ɓéɖé ɓóɖó-dù kà kò ɖò ɓěɛ̀ nyɔ ɓěɔ̀ kpaún, sepóɛɖé ɓóɖó-dù kà kò ɖò ɓěɛ̀ nyɔ ɓěɔ̀ dyé ma Jùɖúsɛ̀ɖɛ̀ìn-nyɔ̀ ɓěɔ̀ Gèɖèpɔ́ɔ̀ xwaún-ɖɛ̀ ɓěɔ̀ ɖò. Ɔ jèɛɛ, ɓóɖó-dù kà kò ɖò ɓěɛ̀ nyɔ ɓěɔ̀ ɓéɖé ɓɛ́ wa ké waà ɓóɖóɔ̀ ɖɛ ɓě gbo kpáìn. 28Ḿ dyi ɖɛa hwɔ, ké ḿ dyi wa ɖɛ ɓěɔ̀ xwáɖáún zàìn ní, nìí, ní mu ɖé ɓě gbo zĩ̀ìn, ɓɛ́ ḿ ké ɖé Sépéìn-ɓòɖòɔ̀ kɔ̃ mu. 29Ké ḿ dyuòɛ̀ kà ḿ dyi ɖé ɓě gbo dyiín, ní mu Kɛ́ɖɛ́ì manaɔ̀ pàɖǎ dyàùn wɛ̃.
30Ḿ ɖíí ɓě, ḿ ɓaà ɓě ɓó à Bounɓo Jízɛ̀ Kɛ́ɖɛ́ì kè ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Zùùɔ̀ nyí nyɔǔn wɛ̃ɛ jè. Ɓě vɔ̃ ḿ bìì ɖé ɓěɛ̀ ɓaà-ɓaàɔ̀ mú, 31ɓɛ́ ḿ ké nyɔ ɓě se-Gèɖèpɔ́ɔ̀-wuɖu-nyu-nyɔ̀ ɓě nìà ɖé Júɖìà-ɓòɖòɔ̀ kɔ̃ kɛɛ xwaún pó, ɔ kè ɓɛ́ ɖɛ kɔ̃̀ jè ḿ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń nyɛɛ, Gèɖèpɔ́ɔ̀ nyɔ ɓěɔ̀ kéɛ ɖéɛ jè dyi kpɔ̃. 32Ɓě mɛ nyuɛ náa, ɔ jǔ ké Gèɖèpɔ́ɔ̀ dyi wɔ̃́ín, ḿ ké ɖé ɓě gbo dyi ɖé múà mú, ɓɛ́ ní dyɔɔ̀ ké mú zaìn ɖé ɓě gbo. 33Gèɖèpɔ́ɔ̀ mɔ̀ nyɔ tòà gìɖìǐɛɛ ké ɓó ɓě séín gbo nì. Kǎà ɔ mɛ nì.
Chwazi Kounye ya:
Wóɖómà 15: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.