Máà 6
6
Wa se Jízɛ̀ jè dyi kpɔ̃ ɖé Názɛ̀ɖɛ̀-hwɔ̀ɖɔ̀ɔ̀ mú
(Máfíò 13:53-58; Ɖúù 4:16-30)
1Sɔ̀ìn ɓóɛ gboɛɛ, Jízɛ̀ sɔ̀ ma dyí, ké ɔ mu ma ɖé ɔ ɓíɖí-hwɔ̀ɖɔ̀ɔ̀ mú ɖe, ké ɔ ɖeín-nà-nyɔ̀ ɓěɔ̀ sí ma ɔ kíɖíí. 2Ti ɓɛ́ Gèɖèpɔ́ɔ̀ fɔ̀-wèɔ̀ dyi ma kɛɛ, ɔ ɖú ma nyɔ ɓěɔ̀ ɖɛ tɛ̀mɛ̀ìn kpàǐ ɖé Júù-nyɔ̀ ɓěɔ̀ cɔ́cì-gbòɔ̀ mú, ké nyɔ pàɖǎ ɓɛ́ wa wɔ̃́ ma wuɖuɔ̀ kɛɛ giniìn ma dyi, ké wa ɖá, “Dɛ̌ gàa nìà kɛ zà ɖɛ séín ɓěɛ̀ kɛ́? Dɛ̌ ɔ zà hwòɖǒ-fɔ̀nɔ̀-fɔ̀nɔ̀ kè zɛ̃̀ìn-ɖɛ̀ nyu-nyu nì kà ɓěɛ̀ kɛ́? 3Nyɔ nìà kɛɛ, ɔ se ɖɛ-kɔ-nyɔ̀ɔ̀? Má, ɔ ɖe mɔ̀à Meɖé kɛ̀e? Ké ɔ ɖíí-gàà ɓě se Jĩ́ìn kè Jòsé kè Júdà ɔ kè Sã́ɓòò? Ké ɔ ɖíí-màà ɓě seà dà nyɔ gbo nìɛ̀ɛ̀?” Ké wa se ma ɔ kpéín dyé.
4Ké Jízɛ̀ cɛ̃ɛ ma wa gbo, ké ɔ ɖá, “Wa dyé kpáá-ɖɛ̀-cɛ̃-nyɔ̀ kpéín dà séín, kɛɛ ɔ sèìn ɖé ɔ mìɔùn nììn nyɔ ɓěɔ̀ hwìɛ̀ kè ɖé ɔ ɓíɖí-hwɔɖɔún ɖòùn.” 5Jízɛ̀ se ma ɖé zɛ̃̀ìn-ɖɛ̀ ɖò nyuɛ ɓɛ́ìn, ɔ sèìn wɛ́-nyɔ̀ xwéɖé wè ɓɛ́ ɔ pɛ̃́ìn ma sɔ̃ kɔ̃, ké ɔ kánáìn ma wa dyiɛɛ ɖòùn. 6Ké Jízɛ̀ giniìn ma dyi, sepóɛɖé wa se ma ɔ hwìɖǐǐ taɓa jè.
Sɔ̀ìn ɓóɛ gboɛɛ, ɔ mu ma ɖé hwɔɖɔ-kpàǎ ɓěɔ̀ kɔ̃, ké ɔ nì ma nyɔ ɓěɔ̀ ɖɛ tɛ̀mɛ̀ǐn.
Jízɛ̀ ɖoɓo ɖeín-nà-nyɔ̀ ɓaɖa-bùè sè sɔ̃́ ɓěɔ̀
(Máfíò 10:5-15; Ɖúù 9:1-6)
7Hwɛ̀ ké Jízɛ̀ ɖá ma ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀, ké ɔ toìn ma wa dyi sɔ̃́-sɔ̃́, ké ɔ nyí ma wa kpé, ɓɛ́ wa ké zùù gbà ɓě nyɔǔn ɓě mú zà. 8Ké ɔ cɛ̃ɛ ma wa gbo, ké ɔ ɖá, “Ɓě dyi muɛń nìǐn, ɓěǐn ɖá ɓɛ́ ɓě ké ɖɛ ɖò kpa. Ɓě ní kpa bɛɖɛɛ̀ ɖò mɔɔ ɓɔ̀ɔ̌ ɖò mɔɔ ɓɛ́ ɓě ké wíɖí ɖò ɖé kúɖúù-kpã̀ ɓě ɓɛ́ ɓě poà gboɛɛ mú po. Ɓě mɛ kpa ɓěɛ̀ kùì-kpàɔ̀ ɖòùn, 9ké ɓě mɛ po bǎ ɓoún. Ɓě ní ɖá ɓɛ́ ɓě ké wáɖá-ɖɔ̀ kà kò ɖò ɓě mìɔùn gbo ɓéɖé.” 10Ké ɔ kpa wuɖu dyúa, ké ɔ ɖá, “Wa dyi ɓě jè dyi kpɔ̃ ɖé gbǒ ɖò mú ní, nìí, ɓě mɛ gã̀ ɖé dyi tee ɓɛ́ ɓě ké hwɔɖɔɔ̀ mú sɔ̀ hwɛ̀. 11Dɛ̀ wa se ɓě jè dyi kpɔ̃ɔ́ mu, ɓɛ́ wa ké ɓěɛ̀ wuɖuɔ̀ ɖùǔ gbo tòɛɛ, ɓě dyiá ɓó sɔ̀ǔn nìǐn, nìí, ɓě mɛ ɓaɖa ɓoún, ɓóɖó nì ɓě ɓo xwíɖíiɛɛ ké dyi wáɖáìn, ɓɛ́ ɔ ké wa zaa kpɔ̃̀ìn.”
12Ké ɖeín-nà-nyɔ̀ ɓěɔ̀ mu ma, ké wa po zio, ké wa ɖá, “Ɓě táà ɓěɛ̀ nàmàǔn-kpèɖèɔ̀ dyi.” 13Ké wa zà zùù gbà pàɖǎ nyɔǔn ɓě mú, ké wa po wɛ́-nyɔ̀ kúɖúú cáná bũ̌, ké wa kánáìn ma wa dyi.
Jɔ̃́ɔ́ nyɔ-níɔ-po-nyɔ̀ɔ̀ mɛ́ jè
(Máfíò 14:1-12; Ɖúù 9:7-9)
14Ɓó tia ɓaɖaa, Hɛ́wɔ̀ɖɔ̀ mɔ̀à Gáɖàɖíì-ɓòɖòɔ̀ nàìn-nyɔ̀ɔ̀ kɛɛ wɔ̃́ ma Jízɛ̀ jè, sepóɛɖé ɔ bɔ̃̌ ɖǎ dyi ɓeìn. Nyɔ ɖíɛ́ ɓě nìɛ̀ ma cɛ̃iń, ké wa ɖá, “Jɔ̃́ɔ́ nyɔ-níɔ-po-nyɔ̀ɔ̀ ɖǎ gĩɔ wóɖó. Ɔ jèɛɛ, ɔ ɓéɖéà zɛ̃̀ìn-ɖɛ̀-nyu-kpè kɛ̀.”
15Ké ɖíɛ́ ɓě ɖá, “Ɔ mɔ̀ Ìɖáájɔ̀.”
Ké ɖíɛ́ ɓě mɔ̀ùn ɖá, “Ɔ mɔ̀ kpáá-ɖɛ̀-cɛ̃-nyɔ̀ ɓě nìǒ zɔ̃̌ɔ̀ kɛɛ ɖò.”
16Ké ti ɓɛ́ Hɛ́wɔ̀ɖɔ̀ wɔ̃́ ma ɖɛ Jízɛ̀ nì ma nyuɛń nyɛ jèɛɛ, ɔ ɖá, “Jɔ̃́ɔ́ ɓɛ́ ḿ zà ma dúíɛɛ, ɔ ɖǎ gĩɔ wóɖó.” 17Kĩ́ín-kĩ́ín nyɛɛ, Hɛ́wɔ̀ɖɔ̀ ɖǎ ma wuɖu tò, ɓɛ́ wa ké Jɔ̃́ɔ́ kpɔ̃, ɓɛ́ wa ké ɔ kpɔɖɔ ɖeín po ɓó Hɛ̀wóɖóɖìà jè. Hɛ̀wóɖóɖìà mɔ̀ ma Hɛ́wɔ̀ɖɔ̀ɛ̀ ɖíí-gàà mɔ̀ Féɖò kɛɛ gmàà, kɛɛ Hɛ́wɔ̀ɖɔ̀ kpɔ̃ ma Hɛ̀wóɖóɖìà dyi, ɓɛ́ ɔ ké ɔ gmàà jǔ. 18Ɔ jèɛɛ, Jɔ̃́ɔ́ cɛ̃ɛ ma ɔ gbo, ké ɔ ɖá, “Ɔ se dyíin nɔ̀mɔ̀ ɓɛ́ m̀ ké m̀ ɖíí-gààɔ̀ gmàà dyi kpɔ̃, ɓɛ́ ɔ ké nì gmàà jǔ.”
19Ɓó ɖɛ nìà kɛ jèɛɛ, Jɔ̃́ɔ́ hwɛ̀nɛ̌-hwòɖò nì ma Hɛ̀wóɖóɖìà xwíníín, ké ɔ mɔ́ ɓɛ́ ɔ ké ma Jɔ̃́ɔ́ ɖáɓá, kɛɛ ɔ seɛ ma nyuɛ ɓɛ́ìn, 20sepóɛɖé Hɛ́wɔ̀ɖɔ̀ dyé ma Jɔ̃́ɔ́ kpéín mìɔ. Ɔ dyuòɛ̀ ma kà Jɔ̃́ɔ́ mɔ̀ ma dyí-sɛ́ɖɛ́ìn-nyɔ̀ kè Gèɖèpɔ́ɔ̀-nyɔ̀ kɛ. Ɔ jèɛɛ, ɔ gmɔ̀ ma ɔ dyí. Jɔ̃́ɔ́ wuɖuɔ̀ gbǎìn ma ɔ hwòɖǒ dyií mìɔ, kɛɛ ɔ ɖɛ̀ɓɛ̀ ɓɛ́ ɔ ké ma Jɔ̃́ɔ́ wuɖu ɖùǔ gbo tò.
21Púɛɛ, ti ɓɛ́ Hɛ̀wóɖóɖìà fòìn ma ɓó Jɔ̃́ɔ́ kpa dyí zàìn jèɛɛ dyi ma ní. Ɔ mɔ̀ ma Hɛ́wɔ̀ɖɔ̀ɛ̀ wóɖó-wè. Hɛ́wɔ̀ɖɔ̀ pa hwɔ ɖò ɓó ɓóɖóɔ̀ nyɔ vɛ̀nɛ̀ ɓěɔ̀ kè sójà-nàìn-nyɔ̀ ɓěɔ̀ ɔ kè ɓóɖóɔ̀ cu-kpà ɓě nì ma ɖé Gáɖàɖíì-ɓòɖòɔ̀ kɔ̃ɛɛ bìì. 22Ké Hɛ̀wóɖóɖìàà dyú-màà dyi ma hwɔɔ̀ kɔ̃, ké ɔ dye ma, ké ɔ dè ma Hɛ́wɔ̀ɖɔ̀ kè nyɔ ɓě nì ma kà hwɔɔ̀ kɔ̃ kɛɛ hwìɖǐi. Ké Kã́á Hɛ́wɔ̀ɖɔ̀ cɛ̃ɛ ma màa-dyùɔ̀ gbo, ké ɔ ɖá, “Ní mu ɖɛ séín nì mu ḿ zɔ̀ìn nyɛɛ m̀ nyíìn.” 23Ké kã́áɔ̀ ɖììn ma ɔ wuɖu dyéɖéín, ké ɔ ɖá, “Ɖɛ nì mu ḿ zɔ̀ìn nyɛɛ, ní muɛ m̀ nyíìn, kɛbì ɔ mɛ mɔ̀ ní ɓóɖóɛ̀ fáún-fáún wɛ̃.”
24Ké màa-dyùɔ̀ mu ɖé ɔ ɖe gbo, ké ɔ ɖá, “Ɖɛ́ ḿ mɛ zɔ̀ kɛ́?”
Ké ɔ ɖe ɖá, “Zɔ̀ Jɔ̃́ɔ́ nyɔ-níɔ-po-nyɔ̀ɔ̀ dú-ɓòɔ̀.”
25Ké màa-dyùɔ̀ dyà ma peɖeɛ wàɖà ɖé Hɛ́wɔ̀ɖɔ̀ gbo, ké ɔ ɖá, “Ḿ mɔ́ ɓɛ́ m̀ ké Jɔ̃́ɔ́ nyɔ-níɔ-po-nyɔ̀ɔ̀ dú-ɓò tɛ́nɛ́ɛ̀ mú dè, ɓɛ́ m̀ kéɛ ḿ nyí kàà-ɖɛ̀ǐn.”
26Wìì nyu ma Kã́á Hɛ́wɔ̀ɖɔ̀ mìɔ dyɛo, kɛɛ ɔ se mɔ́ ɓɛ́ ɔ ké ma ɔ wuɖuɔ̀ dyí zàìn ɓó ɖéè ɓěɔ̀ dyúa. 27Wàɖà kɛɛ, kã́áɔ̀ cɛ̃ɛ ma sójà ɓě ɓɛ́ wa mɔ̀ ma Jɔ̃́ɔ́ dyí-gmɔ̀-nyɔ̀ kɛɛ ɖò gbo, ɓɛ́ ɔ ké Jɔ̃́ɔ́ dú-ɓòɔ̀ dyà. Ké sójàɔ̀ mu ma, ké ɔ zà Jɔ̃́ɔ́ dúí ɖé kpɔɖɔɔ̀ ɖeín, 28ké ɔ dyàìn dú-ɓòɔ̀ tɛ́nɛ́ɛ̀ ɖò mú, ké ɔ tòɛ̀ màa-dyùɔ̀ dyí. Ké màa-dyùɔ̀ mɔ̀ùn tòɛ̀ ma ɔ ɖe dyí. 29Ti ɓɛ́ Jɔ̃́ɔ́ɛ̀ ɖeín-nà-nyɔ̀ ɓěɔ̀ wɔ̃́ɔ ma kɛɛ, wa dyi, ké wa kpa ɔ xwɛ́ɔ̀, ké wa zàà dyóɖóún.
Jízɛ̀ nyí gàa táázĩ̀ìn hm̀m̌ ɖii-ɖɛ̀
(Máfíò 14:13-21; Ɖúù 9:10-17; Jɔ̃́ɔ́ 6:1-14)
30Ti ɓɛ́ àpɔ́sò ɓěɔ̀ dyi ma Jízɛ̀ gbo ɖeɛɛ, wa zaìn ma ɖɛ séín ɓě ɓɛ́ wa nyu kɛ kè ɖɛ ɓě ɓɛ́ wa tɛ̀mɛ̀ìn ma nyɔǔn wɛ̃ɛ Jízɛ̀ gbo kɔ̃in. 31Ké Jízɛ̀ cɛ̃ɛ ma wa gbo, ké ɔ ɖá, “Ɓě dyi, ɓɛ́ ḿ kè ɓě ké dà kpái-kpái ɖò mu, ɓɛ́ ɓě ké fɔ̀ ɖɛ wè.” Jízɛ̀ cɛ̃ɛ ma náa, sepóɛɖé nyɔǔn kúɖúú nì ma wa dyí wáɖáuń mìɔ, ké wa se ma ti ɖò ɓéɖé ɓɛ́ wa ké ɖɛ ɖi fóɖóún. 32Ké wa kpá ma ɓáɖáà ɖò mú, ké wa mu ma dà kpái-kpái ɖò.
33Ti ɓɛ́ wa nì ma muɛń nyɛɛ, nyɔ kúɖúú dyé ma wa muɛ, ké wa dyuò nyɔ wa jǔ ma kɛ. Nyɔ ɓěɔ̀ sɔ̀ìn ma ɖé hwɔɖɔ séín múin, ké wa kpa ma peɖeɛ ɖé dòùnɓìǎɔ̀ kpóóɔ̀ kɔ̃, ké wa cɛ̃ ma wa nya, dɛ̀ ɓɛ́ ɓáɖáàɔ̀ nì ma kà muɛń nyɛ. 34Ti ɓɛ́ Jízɛ̀ sɔ̀ ma ɖé ɓáɖáàɔ̀ múɛɛ, ɔ dyé ma nyɔ kúɖúú ɓěɔ̀, ké wa jè nyùìn ma ɔ wìì, sepóɛɖé wa nì ma kà ɓáɖáá ɓě se dyí-gmɔ̀-nyɔ̀ ɖò kɔ̃̀ɛɛ nìà kɛ. Ké ɔ ɖú ma wa ɖɛ kúɖúú tɛ̀mɛ̀ìn kpàǐ. 35Ti ɓɛ́ dyóɖóɔ̀ nìǎ ma ziɛń nyɛɛ, ɔ ɖeín-nà-nyɔ̀ ɓěɔ̀ dyi ma ɔ gbo, ké wa ɖá, “Nɔ̄ ɖé mɔ̀ dà kpái-kpái, ké dyóɖó ɖǎ zi. 36Ɖoɓo nyɔ ɓěɛ̀ ɖe, ɓɛ́ wa ké hwɔɖɔ ɓě kè hwɔɖɔ-kpàǎ ɓě nìà à ɖeiɛɛ mú mu, ɓɛ́ wa ké waà ɖii-ɖɛ̀ dɔ̃.”
37Kɛɛ Jízɛ̀ cɛ̃ɛ ma wa gbo, ké ɔ ɖá, “Ɓě nyí wa ɖɛ ɖò, ɓɛ́ wa kéɛ ɖi.”
Ké wa diè ma ɔ dyi, ké wa ɖá, “Nì mɔ́ ɓɛ́ à ké nyɔ jĩ̀ kà nìà kɛɛ bɛɖɛɛ̀ dɔ̃ cáe?”
38Ké Jízɛ̀ diè wa dyi, ké ɔ ɖá, “Bɛɖɛɛ̀-kpò jĩ̀ xwɛ̌ ɓě ɓéɖé kɛ́? Ɓě mu, ɓɛ́ ɓě ké dyi gmɔìn.”
Ti wa ɖǎ ma dyi gmɔìn nyɛɛ, wa ɖá, “À ɓéɖé bɛɖɛɛ̀-kpò hm̀m̌ kè zimii-dyù sɔ̃́.”
39Ké Jízɛ̀ cɛ̃ɛ ma nyɔ ɓěɔ̀ gbo, ɓɛ́ wa ké kpoo mú kpá, ɓɛ́ wa ké dyi koìn ɓó pìǐɔ̀ kɔ̃. 40Ɔ jèɛɛ, nyɔ ɓěɔ̀ kpá ma kpoo mú, ké wa kò dyi. Kpooɔ̀ ɖíɛ́ ɓě ɓéɖé ma nyɔ-kpò hɔ̃dɛ̀ɖɛ̀ dyúáɖò, ké ɖíɛ́ ɓě ɓéɖé ma nyɔ-kpò kpáɖá-nyɔ sɔ̃́ ɓaɖa-bùè. 41Hwɛ̀ ké Jízɛ̀ ɖú ma bɛɖɛɛ̀-kpò hm̀m̌ɔ̀ kè zimii-dyù sɔ̃́ɔ̀ dyí, ké ɔ gmɔ̀ ma ɖé dyií, ké ɔ po Gèɖèpɔ́ɔ̀ zùo ɓó ɖii-ɖɛ̀ɔ̀ jè. Ké ɔ jaɖaìn bɛɖɛɛ̀-kpò ɓěɔ̀ kpói, ké ɔ nyíɛ ɖeín-nà-nyɔ̀ ɓěɔ̀ xwa, ɓɛ́ wa kéɛ ma nyɔ ɓěɔ̀ múin geìn. Ké Jízɛ̀ geìn ma zimiiɔ̀, ké nyɔ séín ɓěɔ̀ dyé ma. 42Ké nyɔ ɓěɔ̀ séín ɖi ma ɖɛ, ké wa ɖoɓo ma. 43Ké wa poìn ma bɛɖɛɛ̀ɔ̀ kè zimiiɔ̀ nyɔ sè dyiɛɛ dyí, ké ɔ nyu ma tìě-wè ɓaɖa-bùè sè sɔ̃́. 44Nyɔ ɓě ɓɛ́ wa ɖi ma kà ɖii-ɖɛ̀ɔ̀ kɛɛ mɔ̀ ma gàa táázĩ̀ìn hm̀m̌.
Jízɛ̀ nà ní kɔ̃in
(Máfíò 14:22-33; Jɔ̃́ɔ́ 6:15-21)
45Sɔ̀ìn ɓóɛ gboɛɛ, Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ɓɛ́ wa ké ma ɓáɖáàɔ̀ mú kpá, ɓɛ́ wa ké ma dyúa mu ɖé níɔ̀ kpóó tɔ̀ɔ̀ kɔ̃, hwɔ ɖé Bɛ̀séɖà-hwɔ̀ɖɔ̀ɔ̀ gbo dyí. Ké ɔ cɛ̃ɛ ma nyɔ ɓěɔ̀ gbo, ɓɛ́ wa ké ma wa ɓíɖí-taún ɖe kɔ́ìn. 46Ti ɓɛ́ Jízɛ̀ ɖǎ ma nyɔ ɓěɔ̀ hwuɖu ɖǎ hwɔ poɛ hwɔɛɛ, ɔ mu ma ɖé toɖo ɖò dya, ɓɛ́ ɔ ké ɓaà. 47Ti ɓɛ́ tíe ɖǎ ma kpɔ̃ɛɛ, ɖeín-nà-nyɔ̀ ɓěɔ̀ nì ma ɓáɖáàɔ̀ mú ɖé dòùnɓìǎɔ̀ hwòɖǒǔn, ké Jízɛ̀ ɖòùn sè ma ɖé dòùnɓìǎɔ̀ ɖeín. 48Ɔ dyéɛ ma kà ɓìɖì-ɓìɖì nì ma ɔ ɖeín-nà-nyɔ̀ ɓěɔ̀ wĩin kpɔ̃uń wɛ̃, sepóɛɖé dììɔ̀ dè ma wa dyí mìɔ. Ɓó zɔ̃ wĩín vɛ̀nɛ̀ kɛɛ, Jízɛ̀ dyà ma níɔ̀ kɔ̃in nàà, ké ɔ nìǎ ma wa dyíin ziɛń. 49Kɛɛ ti ɓɛ́ wa dyé ma ɔ níɔ̀ kɔ̃in nàà kɛɛ, wa hwòɖǒ ɖá ɔ mɔ̀ ma gĩɔ-nyɔ̀, ké wa páná ma mú. 50Wa séín dyé ma ɔ, ké díɖí taɓa ma wa.
Kɛɛ Jízɛ̀ wùɖù ma wa gbo wàɖà, ké ɔ ɖá, “Ɓěɛ̀ hwòɖǒ mɛ ɓɔ́ ɓaɖaa. Ɔ mɔ̀ mɔ̄. Ɓě ɓɔ́ fɛ̃̀ìn.” 51Ké ɔ dyá ma ɖé wa gbo, ɖé ɓáɖáàɔ̀ mú, ké dììɔ̀ kpá ma ɓɔ́í. Ké wa giniìn ma dyi mìɔ cá, 52sepóɛɖé wa se bɛɖɛɛ̀ɔ̀ jè múin wɔ̃́, ké wa kàmà ɖɛín dyi wɔ̃́uń.
Jízɛ̀ kánáìn wɛ́-nyɔ̀ ɓě dyi ɖé Gɛ̀nɛ́sɛ́wɛ̀ɖɛ̀-hwɔ̀ɖɔ̀ɔ̀ mú
(Máfíò 14:34-36)
53Ti ɓɛ́ wa ɖǎ ma dòùnɓìǎɔ̀ péɖéɛɛ, wa dyi ma Gɛ̀nɛ́sɛ́wɛ̀ɖɛ̀-hwɔ̀ɖɔ̀ɔ̀ mú, ké wa wã̀ìn ma waà ɓáɖáàɔ̀ dyi. 54Ti ɓɛ́ wa sɔ̀ ma ɖé ɓáɖáàɔ̀ múɛɛ, nyɔ ɓě nì ma ɓóɛɛ dyuò ma Jízɛ̀ dyí, 55ké wa kpa ma peɖeɛ ɖé hwɔɖɔ ɓě nì ma wa ɖeiɛɛ mú, ké wa nì ma wɛ́-nyɔ̀ ɓě kpéɖé mú dyàǐn, dɛ̀ ɓɛ́ wa wɔ̃́ìn ma Jízɛ̀ɛ̀ bɔ̃̌ kɛ. 56Ké hwɔɖɔ séín kè hwɔɖɔ-kpàǎ séín ɓɛ́ ɔ mu kɔ̃ɛɛ, wa pɛ̃́ìn ma wɛ́-nyɔ̀ ɓě ɖé píé hwòɖǒǔn dyi, ké wa ɓaà Jízɛ̀, ɓɛ́ ɔ ké wɔ̃́ ɓɛ́ wɛ́-nyɔ̀ ɓěɔ̀ ké ɔ mú-po-ɖɔ̀ɔ̀ wɔ̃ɔ̀ dyi tìnììn ɖòùn pū. Ké nyɔ séín ɓě ɓɛ́ wa tìnììn ma ɔ ɖɔɔ̀ dyiɛɛ káná ma dyi.
Chwazi Kounye ya:
Máà 6: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.