EFETIKILO 34
34
1Dina, omõla ukãi Lea a cita la Yakoba, wa tunda oku ka vanja omãla vakãi vofeka. 2Eci Sekeme, omõla ulume wa Hamore u Hivi, ombiali yofeka, wo mõla. Oco wo kuata, wa pekela laye, kuenje wo nyõla. 3Utima waye wa leñelẽla Dina omõla a Yakoba; wa sola ufeko waco kuenje wo lembeleka. 4Oco Sekeme wa popia la isiaye Hamore hati, Ñuelele ufeko u, a linge ukãi wange. 5Yakoba wa yeva okuti wa nyõla omõlaye ukãi Dina; puãi omãla vaye valume va kala vusenge lolongombe viaye; oco Yakoba wõha ño toke veya. 6Hamore, isia ya Sekeme, weya ku Yakoba, wa vangula laye. 7Eci omãla valume va Yakoba va ci yeva va tunda vusenge, veya. Oco vamume va ci suvuka, va tema ca lua, vati, Wa linga uveke ku Isareli oku pekela lomõla a Yakoba; oco ka ci lingaiwa.
8Puãi Hamore wa popia lavo hati, Omõlange Sekeme utima waye wa livela omõlove ukãi; vo wihe, a linge ukãi waye. 9Tu likuẽleli, tu ihi omãla vene vakãi; tambulivo omãla vetu vakãi. 10Oco vu tunge pokati ketu, ofeka yi kalavo yene; tungi ño, fũlĩlimo, fukilimo. 11Sekeme wa popiavo la isia yufeko kuenda vamume vaye, hati, Va ndinge ohenda, cosi vu nukuila ngeca. 12Nukuili ño ovilombo, lociveleko, ame ngeca cosi vu nukuila. Cinene vu nyiha ufeko ha lingi ukãi wange.
13Omãla va Yakoba va tambulula Sekeme la isiaye Hamore lelimbi, omo wa nyõla manjavo Dina. 14Va popia lavo vati, Ka tu tẽla oku linga ocina eci okuti tu eca manjetu kulume ka seviwile evamba, momo nda ca tu kutisa osõi. 15Tu tava lika kokuene nda vu lisoka letu, okuti alume vene vosi va seviwa evamba. 16Oco tu eca omãla vetu vakãi kokuene kuenje tu tambulavo omãla vene vakãi. Tu tunga pokati kene ha tu lingi ofeka yimosi. 17Puãi nda ko tava kokuetu okuti vu seviwa evamba, etu tu tambula omõletu kuenje tuenda.
18Olondaka viavo via sanjuisa Hamore la Sekeme omõla a Hamore. 19Ukuenje ka livalele oku ci linga, momo wa sola omõla a Yakoba. Eye wa kemãla ca velapo pokati kepata liavo. 20Oco Hamore lomõlaye Sekeme veyilila kombundi yimbo liavo, va vangula lalume vakuimbo liavo vati, 21Ovalume va kasi letu vakuambembua, va tunge ño vofeka, va fũlilemo, momo ofeka yinene, yi va tẽla ciwa. Tu tambuli omãla vavo vakãi, va linge akãi vetu, kuenje tu va ĩha omãla vetu vakãi. 22Puãi osimbu ka va tavele oku tunga letu loku kala letu ndepata limosi, cimosi lika va tu kisika, ceci: oku lisevisa evamba, okuti alume vetu vosi va sevisua evamba ndalume vavo. 23Oviunda viavo, lukuasi wavo, lovinyama viavo viosi ka vi lingi vietu hẽ? Tu tavi kokuavo oco va tunge letu. 24Kuenje vosi va tundila kombundi yimbo liaye va tava ku Hamore lomõlaye Sekeme. Alume vosi va tundila kombundi yimbo liaye va lisevisa evamba.
25Keteke liatatu, osimbu va kala loku vela apute aco, oco omãla vavali va Yakoba, Simeone la Lewi, vamume va Dina, va kuata, u osipata yaye, u osipata yaye, veya vimbo lutõi, va ponda ovalume vosi. 26Va ponda Hamore lomõlaye Sekeme; vopa Dina vonjo ya Sekeme, kuenje va tunda. 27Omãla va Yakoba volumuhĩla ovivimbi viaco, va punda imbo liavo momo va nyõla manjavo. 28Va punda olomeme viavo lolongombe lovimbulu viavo; cosi ca kala vimbo, la cosi ca kala kovapia, cosi va cambata. 29Va kuata ukuasi wavo wosi, lotumãla tuavo, lakãi vavo va va pandeka, va punda cosi ca kala volonjo. 30Yakoba yu wa popia Simeone la Lewi hati, Wa ndingi lãvi, omo wa suvukisi la vakuafeka okuti va Kanana la va Perisi. Olohoka viange vitito. Nda va liñongiliyila oku yaka lame, ame lonjo yange yosi tu nyoleha. 31Ovo puãi va popia vati, Ca sunguluka nga ndomo a sokisa manjetu ndocipuepue?
Chwazi Kounye ya:
EFETIKILO 34: EMB63
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Umbundu Bible © United Bible Societies, 1963.