Ñwed Mbon Rom 6
6
Adikpa Ñwuọ ke Idiọọkñkpọ, Nnie Uwem ke Krais
1Nsoo ke ñnyịn idiitañ, ndin? Nte ana ñnyịn ika iso inam idiọọkñkpọ nọ ato do mfọn atọt? 2Nwaaña nsa-o! Die ke ñnyịn i-imaikikpañña inọ idiọọkñkpọ idiika iso inyịne ke idiọọkñkpọ ado? 3Nte ñnyịn idiọọñọke ke afịd ñnyịn i-imaikibọ uduọkmmọọñ ke Krais Yisọs imaibọ uduọkmmọọñ ñko idʌk ke ñkpa amọ? 4Emaibuuk ñnyịn ñko ye anye ato uduọkmmọọñ ke ñkpa nọ ato do, naña ekenam Krais aset ke ñkpa ato ke ubọọñ Ete amọ, ñnyịn ñko idiinyʌñ idu ufa uwem.
5Sia akpedo ñnyịn imidiana ye anye ke ukem ñkpa amọ, ñnyịn ñko idiitreke adidiana ye anye ke ukem adised ke ñkpa amọ. 6Sia ñnyịn imidiọọñọ ke emaekọñ akaan uduud ñnyịn ke krọs ye anye nọ idiọọkñkpọ abʌkidem aboiyo afep, mbaak ñnyịn idika iso isịne ke ufʌn idiọọkñkpọ. 7Sia awo keed akeedodo a-amaakekpa, abọkkọ idiọọkñkpọ.
8Do ndin adieke ñnyịn ikikpaaha ye Krais, ñnyịn iminịm ke ñnyịn ñko iyaidu uwem ye anye. 9Sia ñnyịn imidiọọñọ ke emaenam Krais aset ke ñkpa, anye ikemeke adikpa aba; ñkpa inieghe adudu ke idem amọ aba. 10Ñkpa a-anye akekpaaha, anye akekpa akañ keed anọ idiọọkñkpọ afịd awo; ado uwem a-anye aduuho, anye adu anọ Abasi.
11Kpa ke ukem usʌñ ado, ibat idem ndufo nte ke emaekpa enọ idiọọkñkpọ, ado edu uwem enọ Abasi ke Krais Yisọs. 12Ndin ikiiyak idiọọkñkpọ akara ikpọkidem ndufo mbaak ndufo idinam ndiọi udọñ amọ. 13Ikiiyaak itie ndomokeed ke idem ndufo inọọ idiọọkñkpọ, nte ñkpọutom ibak. Utu ke ado iyaak idem ndufo inọ Abasi, nte mbon e-emaekesio ke ñkpa esịn ke uwem. Ke ntoro iyaak afịd idem ndufo inọ anye nte ñkpọutom adinenido. 14Ndin idiọọkñkpọ idiidooho eteufọk ndufo aba, sia ndufo ibaaha ke idak mbed, ado eba ke idak mfọn.
Udʌk Ufʌn Nnọọ Adinenido
15Nsoo ndin ke ñnyịn idiinam? Ana nte ñnyịn inam idiọọkñkpọ sia ñnyịn imiibaaha ke idak mbed ado iba ke idak mfọn? Nwaaña nsa-o! 16Nte ndufo idiọọñọke ke imaiyaak idem ndufo inọ awo nte ifʌn, ndufo edo ifʌn enọ awo a-ndufo ekoppo uyio amọ, me ndufo edo ifʌn enọ idiọọkñkpọ, a-adatta aka ñkpa, me ñkobuyio, a-adatta aka adinenido? 17Ado mmekọọm Abasi ke akpesʌkado a-ndufo ekesidooho ifʌn enọọ idiọọkñkpọ, ndufo emaenam se ekikpeep ndufo ke afịd esịd ndin anye akappa ado usʌñ ñkobitem ndufo idahami. 18Emaifak ndufo esio ke abʌkidem idiọọkñkpọ ndin ndufo emekappa edo ifʌn enọ adinenido.
19Ami ntañ ami ñkene naña uwem aba ke usen ke usen, sia ndufo emenie mmemidem abʌkidem nte awo. Kpa naña ndufo ekesịyaak idem ndufo nte ifʌn enọọ mme ndedehe ñkpọ ye akpakʌb uwem ibak, idahami ana ekappa edo ifʌn enọ adinenido a-adatta aka adisana uwem. 20Ke ini ndufo ekedooho ifʌn enọọ idiọọkñkpọ, ndufo ikisịneke ke idak ukara adinenido. 21Nsoo ufọn ndin ke ndufo ekebọọ ke ini ado eto mme ñkpọ i-imʌmmọ ndufo abuud idahami? Mme ñkpọ ado edat eka ñkpa! 22Ado idahami emaisio ndufo ke idiọọkñkpọ, ndufo enyʌñ ekappa edo ifʌn Abasi. Ufọn a-ndufo ediaha eto ado adisana uwem, ndin utịb ado nsi-nsi uwem. 23Sia utịb idiọọkñkpọ ado ñkpa, ado enọ Abasi ado nsi-nsi uwem ke Krais Yisọs Abọọñ ñnyịn.
Chwazi Kounye ya:
Ñwed Mbon Rom 6: ICB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.