Utom Mme Abọsịd 26
26
1Ndin Adidem Akrippa amaabo Pọọl ate, “Mmunọ ufañ aditañ ñkpọ mbaña idem mfo.”
Pọọl amaasio ubọk anyan ndin atọọñọ adikañ idem amọ ate, 2“Adidem Akrippa, ñkere ke ami mmenie ataa mfọniso adida ke iso mfo mfịn ami adifaaña mbaña afịd ndoduyio a-mme Yuu endotto miin, 3akpan-akpan ke ntak a-adooho afo amenekke adiọọñọ eduuwem ye ndukpakka mfaaña mme Yuu. Ke ntoro, ami mmubeeñe fiin mbo yak anie ime akpañ utọñ annọ miin.
4“Afịd mme Yuu e-ediọọñọ usʌñ naña ami ndʌñ ye ammọ tọọñọ ke uyịn mmi, ke ntọọñọ uwem mmi ke idịd ñnyịn ye ke Yeruselem. 5Ammọ endiọọñọ miin ekpeene, ekpaenyʌñ etie ntiense, adieke ammọ emaaha, ebo ke ami mmaanekke mbre ñka edu ukpono Abasi ñnyịn ke adidu uwem nte Farisi. 6Idahami, akeene ntak idodanyen a-ami nnieghe ke se Abasi amaakenwọñọ anọ mme eteete ñnyịn ke ami nda ke ikpe mfịn ami. 7Ami ado enwọñọ e-esiin duob mme iba ñnyịn enieghe idodanyen adibọ naña ammọ ekpono Abasi ke eti esịd uweemeayio ye akonayio. Adidem Akrippa, ato ke idodanyen ami ke mme Yuu endot miin ikọ. 8Ntak a-awo ndomokeed ke atu ndufo akpekereke ke idooho akpanikọ ke Abasi a-anam awo aset ke ñkpa-a?
9“Ami ñko mmaabiide nte ke akpena nnam afịd se akpena enam adibiọọñọ anyịñ Yisọs, awo Nasared. 10Ami ado se ami ñkenam ke Yeruselem. Ke adudu mme ikpọ aku ami mmaamuum uwak ndisana ikọd Abasi ndọñ ke ufọk ñkpakọb ndin ke ini ekebiireke ñkpa enọ ammọ, ami mmaanyịmme mbo ewoot ammọ. 11Uwak ini, ami mmaasaña ke mme sinakọk adinọ ammọ ufen, ñnyʌñ ñyem usʌñ naña ammọ ekpemiom Yisọs. Ato akpọsọñ usua añkenieghe mbaña ammọ, mmaakọbọ ammọ tutu ñkewuọ mme asen abio.
12“Ke usʌñ isañ mmi keed, ami ñkeka Damaskọs ke adudu ye uyio ñkpoon aku. 13O Adidem Akrippa, ke ufọọd uweemeayio ñkanika duob mme iba, ke ini ami ñkesʌkkọ nsaña ke usʌñ, ami mmaakịt unwana a-aketooho hefịn, ayamma akan utịn, añkanna miin ye mme nsaña mmi akʌk. 14Afịd ñnyịn imaiduọññọ ke isọñ, ndin ami mmaakop uyio a-akembooho miin ke usem Aramaik#26:14 Me ke Hibru ate, ‘Sọọl, Sọọl, nsoo ido ntak a-afo añkọbọke miin? Asọsọñ afo aditịgha eto nsọọbọ ñkukịm.’
15“Ndin mmaabịp nte, ‘Afo ado anie, Abọọñ?’
“Abọọñ amaabọọrọ ate, ‘Ami ndo Yisọs a-afo akọbọke. 16Idahami, dakka da ke ukod mfo. Ami mmeyaara idem uwọt fiin adumek fiin nte asañautom ye ntiense ke se afo akịt ambaña miin ye se ami nduuwọt fiin. 17Ami ñyaunyaaña fiin nsio ke ubọk mbon ndufo ye ke ubọk mme Gentile. Ami ñyem adudọñ fiin nnọọ ammọ, 18nọ aketat ammọ anyen anyʌñ anam ammọ ekappa ekpọñ ekịm ebịne unwana, ekpọñ adudu Setan, ebịne Abasi, nọ ammọ ebọ adifeen ke mme idiọọkñkpọ enyʌñ enie itie ke atu mbon e-emaenam esana ato ke mbuọdidem ke idem mmi.’
19“Ke ntak ami, Adidem Akrippa, ñkisọññọ iwuod ke ntak ñkukịd a-aketooho hefịn. 20Akpa, tọọñọ ye mbon e-ebaaha ke Damaskọs ye ke Yeruselem ye ke afịd Yudia, ye mme Gentile ñko, ñkekwọrọ mbo ammọ ekappa esịd ekeene Abasi enyʌñ ewọt ke mmimọ imikappa esịd ato ke mme adinam ammọ. 21Ke ntak ami ke mme Yuu ekemmʌm miin ke akwere tembịd eyem adiñwot. 22Ado mmenie unwam Abasi tutu asịm mfịn ami; ke ntoro ami mmeda mi aditañ ke esịd akpanikọ nnọ etək-etək ye ekamba ukem-ukem. Ntañña ñkpọ ndomokeed ñwuọ ñkpọñ se Moses ye mme prọfed emaeketatañ ke ayaatịppe, 23ke Krais ayaabọ ufen, ndin nte akpa awo a-adiiset ke ñkpa, ayaadat etob unwana asọk mbon amọ ye mme Gentile.”
24Naña Pọọl akesʌkkọ atañ ikọ afaaña idem amọ, Festus amaabọñ ñkpo ate, “Pọọl, afo amedamma! Akpọsọñ ifiọk ukpeeb mfo a-anam nọ afo adamma.”
25Pọọl amaabọọrọ ate, “Ataa eti adaiwuod ukara Festus, ami ndammake. Se ami ntañ ado akpanikọ anyʌñ asaña ye eti akikere. 26Adidem ameghe ye mme ñkpọ ami, ndin mmekeme itañ ikọ nnọ anye uko-uko. Mmenịm mbo ke ibaaha ñkpọ ami ndomokeed a-afeppe anye ke anyen sia ibaaha se ekenam ndịbe-ndịbe. 27Adidem Akrippa, nte afo amenịm mme prọfed ke akpanikọ? Mmediọọñọ ke amenịm.”
28Ndin Akrippa amaabịp Pọọl abo, “Afo amekere abo ke utọ etək ini ntom ke akpaakan añkappa miin esịd nọ ndo Kristian?”
29Pọọl amaabọọrọ anye ate, “Me etək me anyan ini, ami mbọñ akam mbo Abasi akpekap anam, idooho afo ikpọọñ, ado afịd mbon e-ekpañña utọñ ennọọ miin mfịn, ekpekap eba nte ami ke esioho mme akpọnọ ami efep.”
30Adidem, adaiwuod ukara, Benis ye mbon e-eketieghe ye ammọ emaedaaña eda. 31Ammọ emaekpọñ ubeed ado ndin ke ini ammọ enemeke ye emọ-emọ, ndin emaebo ete, “Awo ami inamma ñkpọ ndomokeed a-adotto ñkpa me ñkpakọb.”
32Ndin Akrippa amaabo Festus ate, “Ekpaekesaana awo ami eyaak akpedo anye ikibeeñeke ibo esio ikpe eka iso Sisa.”
Chwazi Kounye ya:
Utom Mme Abọsịd 26: ICB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.