Utom Mme Abọsịd 23
23
1Pọọl amaawuuk anyen ase mbon esob Sanhidrin anyʌñ abo ammọ ate, “Nditọeka mmi, ami mmenam iso utom mmi nnọ Abasi ke eti esịd tutu usen mfịn ami.” 2Anye aketañ ntoro, ekamba aku Ananayas amaanọ uyio abo mbon e-ekedaaha ekpere Pọọl emia anye inua. 3Pọọl amaabo anye ate, “Abasi ayaumia fiin, afo udedeppe ndibene! Afo atie do adikpe ikpe innọ miin ke ido mbed, ado afo ke idem mfo abiat mbed ke adinọ uyio ibo emmia miin!”
4Mbon se ikida ikpere Pọọl emaebo, “Afo anam die asọñ ekamba aku Abasi anyen?”
5Pọọl amaabọọrọ ate, “Nditọeka mmi, ami ñkidiọọñọke ke anye ado ekamba aku, sia e-ewet ebo: ‘Kuutañ idiọọk ikọ ubaña andikara mbon ndufo.’ ”
6Ndin Pọọl, a-amaakediọọñọ ke usʌk ammọ edo mme Sadusi usʌk edo mme Farisi, anye amaakoot mbon esob Sanhidrin ke akpọsọñ uyio abo, “Nditọeka mmi, ami ndo Farisi, nto ubon Farisi ñko. Ami nda ke ikpe sia mmenie idodanyen ke adised mme akpañkpa.” 7Ke anye amaaketañ ami, ikọ amaasakka ke atu mme Farisi ye mme Sadusi ndin mbono amaabakka iba. 8(Mme Sadusi ebo ke adised ke ñkpa ibaaha, ñko ke mme enyere ye mme sịbidịd ibaaha, ado mme Farisi e-enịm afịd mme ñkpọ ami ke akpanikọ.)
9Akpọsọñ ntịme amaasakka, ndin usʌk mme andikpeeb mbed e-ekedoññoke mme Farisi emaedaaña eda enyʌñ efaaña ke akpọsọñ uyio ete, “Ñnyịn ikịtte ñkpọ se idiọọk ke awo ami. Akpedo anam anye ado sịbidịd me enyere atañ ikọ anọ anye-e?” 10Utọk amaakpon eti-eti, ndin adaiso ekọñ amaakop ndịk ke ammọ eyaewai Pọọl mbai-mbai. Anye amaanọ uyio abo mbon ekọñ eka ekeben anye ke adudu eka ekesịn ke badịk ekọñ.
11Ke akonayio ayọhọ usen iba, Abọọñ amaada akpere Pọọl anyʌñ abo anye, “Sọñ esịd! Naña nte afo amaaketie ntiense ambaña miin ke Yeruselem, ntoro ana afo atie ntiense ke Rom.”
Edioomo Adiwot Pọọl
12Ke ayio amaakesiere mme Yuu emaedʌk edioomo enyʌñ eta unwọñọ ete mmimọ idiidiaha ndidia inyʌññọ inwọñ mmọọñ tutu mmimọ iwot Pọọl. 13Mbon se ikisịne ke edioomo ami emaewak ekan ideen aba. 14Ammọ emaekaa ekebeeñe ñkpoon aku ye mme ñkpisọñ ebo, “Ñnyịn imidat ekamba unwọñọ ite ke ñnyịn idiidiaha ndidia tutu ñnyịn iwot Pọọl. 15Do ndin, ndufo ye mme esob Sanhidrin iwet ñwed inọ adaiso ekọñ nọ edat anye edi iso ndufo nọ atie nte eyem ibọ anye afịd akpanikọ ke abaña ikpe amọ. Ñnyịn imibeeñe idem adiwot anye mbemiso anye adiwuọ mi.”
16Ado ke ayịn ayịneka awonwaan Pọọl amaakekop edioomo ami, anye amaakaa badịk ekọñ akedọkkọ Pọọl.
17Ndin Pọọl amaakoot keed ke atu mme sentudiọn ate, “Ben akparawa ami kaa ke iso adaiso ekọñ sia anye a-anie ñkpọ aditañ nnọọ anye.” 18Anye amaaben anye akaa iso adaiso ekọñ.
Sentudiọn amaanyʌñ akebo ate, “Pọọl, awo ñkpakọb, akedọñ eñkoot, ndin abo yak mben akparawa ami usọk sia anye anie se ayem aditañ unọọ.”
19Adaiso ekọñ amaamʌm akparawa ami ke ubọk, adat anye asịkke akaa mbeñ keed akebịp abo, “Nsoo ke afo ayem aditañ innọ miin?”
20Anye amaabo ate, “Mme Yuu e-edioomo adubo fiin yak anọ Pọọl adi ke iso esob Sanhidrin ñkpọñ nọ aba nte ke a-aba ataa akpanikọ a-ammọ eyemme adikop nto Pọọl. 21Kuunyịmme unọọ ammọ sia e-ewak ekan awo aba ke atu ammọ e-edịbeke ke usʌñ ebet edimʌm anye. Ammọ emaeta unwọñọ ebo ke mmimọ idiidiaha ndidia, inyʌññọ inwọñ ñkpọ, tutu mmimọ iwot anye. Ammọ ebeeñe idem idahami, etie ebet afo adinyịmme ebeeñe ammọ.”
22Adaiso ekọñ amaasio anye unyọñ, anyʌñ adʌt anye utọñ ate, “Kuutañ unọọ awo ndomokeed ke afo ametañ ñkpọ ami annọ miin.”
Esio Pọọl Enọ Aka Siseria
23Ndin etubom ekọñ amaakoot sentudiọn iba anyʌñ anọ ammọ uyio ate, “Isio mbon ekọñ ikie iba, ye mbon ekọñ e-ewatta enañmbakara ata mme duob ye mme atobidañ ikie iba eka Siseria akonayio ami ke ñkanika usʌkkeed. 24Inọ mme enañmbakara nọ eben Pọọl enyʌñ ekpeme anye dek-dek ekenọ Feliks adaiwuod ukara.”
25Anye amaawet ñwedetob ntom:
26Klaudius Lisias,
anọ esọk ataa ekamba adaiwuod ukara, Feliks:
Mmukọọm-o!
27Mme Yuu ekemʌm awo ami ndin eyem adiwot anye, ado ami ye mbon ekọñ mmi imainyaaña anye sia mmaakediọọñọ ke anye ado amanaisọñ awo Rom. 28Ami ñkeyem adidiọọñọ se inam ammọ edot anye uyio. Ke ntak ado ami mmaaben anye ndi ke iso esob Sanhidrin ammọ. 29Ami ñkekop ke ndoduyio amọ akebaña ikọ mbed ammọ, ado ubiomikpe amọ ikidotto se ekpewowot me adisịn anye ke ñkpakọb. 30Ke ini ami mmaakekop idiọọk ndịbe edioomo a-ndusʌk ammọ ekenamma ebaña uwem ete ami, ami mmaanọ anye usọk fiin ini keed. Ami mmaanyʌñ mbo yak mbon e-edotto anye uyio editañ mfịna a-ammọ enieghe ye anye ke iso mfo.
31Ndin mbon ekọñ, ke adinam uyio ami, emaeben Pọọl ke akonayio ekesịm Antipatris. 32Edem usen ammọ emaebo mbon ekọñ enañmbakara edat Pọọl eka, ndin ammọ emaetịmme enyọñọ badịk ekọñ. 33Ke mbio ekọñ enañmbakara emaekekesịm Siseria, ammọ emaenọ adaiwuod ukara ñwedetob ado enyʌñ eyaak Pọọl esịn anye ke ubọk. 34Adaiwuod ukara amaakoot ñwedetob ado ndin amaabịp Pọọl ikpeghe abio a-anye aketooho. Ke anye adidiọọñọ ke anye ato Silisia, 35anye amaabo, “Ami ñyaakop ikpe mfo ke ini mbon u-udotto fiin uyio emaedisịm mi.” Ndin anye amaanọ uyio ate enịm Pọọl ke idak ukpeme ke akwere ufọk Herọd.
Chwazi Kounye ya:
Utom Mme Abọsịd 23: ICB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.