Ta je Vejec 11
11
1IKIKI kö Iehova tulut uhni ae iyawo;
Ke e ame senyinâ tulut ae ti wisa.
2E ka o but bi gan, me ame o but hmehma:
Ke e unyin tavat ae hnyikânâ bi, metâ.
3Ame he hwakecidra ae ba hnyikongon ka su tavat ae wisa:
Kʼ ame he hwakecin ae hwali ge tavat ae kong ka ohiʼ ödra.
4E ca ûnyi hnathu omjeû hnyi ûen hmonyin:
Ke haba hwakecin ae wisa me wale ûhomeli ûnyi hnyi hna mok.
5Ame he hwakecin at ae wisa ae ba hnyi kongon ka kû deny gethen:
Kʼ ame he at ae kong ka ta ge anyin bi hulo.
6Ame he hwakecin ae ba hnyikongon anyin tavat ae wisa ka omeli ödra:
Kʼ ame he ka hnok tavat adre me ânyâ iyawâ hnen hwakecidra ae hwali.
7E ka mokcu at ae kong, me ame hia but hnen hna gejon:
Kʼ ame he ka hia but gejon hwakecin ae kong.
8Adre me omelo at ae wisa ûnyi hnyi vec,
Kʼ ame o but at ae kong ka hnyi hnen bi.
9Haba hnyimen at ame ca ot, me ame okongoâ waeny:
Ke adre me he ka omelo tavat ae wisa ûnyi ge wâhmakhmeto.
10E ka sot at ae wisa, me ame senyin taun:
Ke ka mok at ae kong, me adre me kuku.
11Adre me ogöranyâ taun hnen hnahic anyin tavat ae wisa:
Kʼ adre me hagutâ e ge hnyimen tavat ae kong.
12Haba at ame hûkotiâ hanen, me ba metâ bi gan:
Ke ame laba hnyibû at ame wâ ûnykûme.
13Haba at ame hok hofuc, me ame omanenâ ta je ûnyi ae iyong;
Ke haba at ae hnathu hnyekon me ame ikhölö hofuc.
14E ka ba musi ae wisa ame he ka ta but aten hnyei:
Ke ame laba wia hnen tavat ha bongon ae se hia.
15Ame he ka vec at ame tot me hwaban atkanyua:
Ke haba at ame höcö ûkhöû hnyam me ame laba khötkic.
16Haba momo ae so me ame hom hmâ hna ogânâ:
Ke haba tavat hwege me adre me hok omjeû.
17Haba at ame betenge, me ame ânyâ hwakecin ae so bi kâu:
Ke haba at beovecâ me ame ovecâ unyin bi.
18Ame bi huliwa iyawo hnen at ae kong:
Ke haba at ame ta hwakecin ae wisa me hu hwaban ae hnathu.
19Haba at ame tethmâ hnyi hwakecin ae wisa me ame he ka hu möt:
Ke haba at ame hnu hoton hulo me ame hlingâ e bi.
20Hmiö Iehova ta je hnyok ae hwali:
Ke e ame senyin ge tavat ae wisa hwakecidra.
21Eja ke ne a ne ihok beny me ke at, ame ca he ka ba hwaban ka at ae kong:
Ke ame he ka möt ta je mâtrâniny tavat ae wisa.
22Otru gol hnyi hnyingöiny buaka,
Momo ae ba hna ûnykûme ae ûcû.
23E hake so thibi weny tavat ae wisa:
Ke haba ûlubahing anyin tavat ae kong me wale hmonyin.
24E hu at ame oveseâ anyin ta ûnyi, me ame gan tot anyin ta ûnyi;
Ke e hu tavat adre behânâ ûnyi ae ûcû, ke adre me he bala ka theduoc.
25Ame he ka pipikhenya at ame ham baûâ:
Ke adre me he ka hû at ame ûöhûö.
26Haba at ame behânâ hwit, ame he tavat ka hangâ e:
Ke ame he hnahic ka laba hon ban at ame ûco e ka tavat.
27Haba at ame elâm hwegiâ so, me ame elâm ibetengiö:
Ke haba at ame elâm ûkonguny me ame he ka o kâu.
28Haba at ame labageju ka tang omjeû me ame he ka ta:
Ke ame he tavat ae wisa ka hlau helâ me lan ûö ae hât.
29Haba at ame bwebwelâ anyin lap, me ame he ka hu ang hnân jekhon:
Kʼ ame he at ae monu ka bi athnyabainy at ame hnyok metâ.
30Haba wan at ae wisa me ûöiny möt,
Ke haba at ae metâ, me ame ohmehmela ta je hanu.
31Wâ bi adre me he ka bi hwaban eang hmeledrany ka at ae wisa:
Ke hawa bi ge at ae monu me at ae kong!
maintained by the British and Foreign Bible Society