Ta je Vejec 10
10
1TA je vejec anyi Solomona.
Haba nokon ae metâ ame osenyinâ kamen:
Ke haba nokon ae monu ame ovecâ hinyen.
2E ba troban uma omjeûiny hwakecin ae kong:
Ke haba hwakecin ae wisa, wale ûhomeli ûnyi hnyi hna mok.
3Ame ca he Iehova ka omekihnânemâ at ae wisa hwakecin:
Ke e ame hna degecâ weny at ae kong.
4Ame he ka ba ta ûnyi ge at ame huliwa me hnyam ae hwen höcö:
Ke haba hnyamen at ae hwege huliwa ame he ka tren omjeû.
5Nokon ae metâ at ame ûkhöûnâ hnyi honivakeny:
Ke haba at ame mokut hnyi ûen menu, me wale nokon at ame ohmehma.
6Ame laba je hnahic hon ban at ae wisa:
Ke haba hnyimen at ae kong ame ikhâlâ ûkongun.
7E so he ka ûnykûme ka at ae wisa:
Ke ame he ka bobot ien at ae kong.
8Ame he at ame hnyok metâ ka kap ta je hnanyibu:
Kʼ ame he ka ta at ae monu ifucin.
9Haba at ame vheno wisa, me ame he khötkic:
Ke ame he ka manen at ame ohwalö deny ta je gethen.
10Haba at ame ûatmemakö, me ame okûâ vec:
Kʼ ame he ka ta at ae monu ifucin.
11Pupuainy möt hnyimen at ae wisa:
Ke haba hnyimen at ae kong, me ame ikhâlâ ûkonguny.
12Haba hmonyin, me wale at ame okûâ iwatretra:
Ke ibetengiö ame tube ta je hulo hia.
13E manen dut metâ hnyi hnyimen at ame wâ ûnykûme:
Ke hu osö hobi kâu jon at ae ba hnyekon.
14Haba tavat ae metâ, adre me hitangen wâhmakhmeto:
Ke haba huyimen at ae monu ame hakekenyâ ûokonguny.
15Haba tang omjehen at ae tren omjeû, me, anyin taun ae hwege:
Ke haba ûokonguny anyin at ae ba ta ûnyi, me ba anyidra omjeû.
16Haba huliwa anyin at ae wisa, me ame oâ möt;
Ke haba troban at ae monu, me hulo.
17Haba at ame tuö hna nâ e, me ame laba hnyi gethen deny möt:
Ke haba at ame degec hna nâ e, me ame hâû bi.
18Haba at ame oiyongâ ûöhûköti, me ame thoi hnyimen;
Ke haba at bifuco, me wale at ae monu.
19E ka se hia hofuc, me ca ba hulo:
Ke metâ at ame noc bohmen.
20Sileva ae so li esongodiny at ae wisa:
Ke thatûnyi hnyekon tavat ae monu.
21Haba li esongodiny at ae wisa me ame hān tavat ae se:
Ke a mok ut tavat ae monu anyin ae ba hnyekudra.
22Haba hnahic ûnyi ga Iehova ame ohuâ omjeû,
Ke e ame ca vecâ.
23Helâke walak ka at ae monu he ka ânyâ hulo:
Ke helâe minya metâ ka at ame wâ ûnykûme.
24Haba hna outen hnen at ae kong, me ame he ka aat kâu:
Ke ame he ka ham weny at ae wisa.
25E ka o hou, me ame he ka hia at ae kong:
Ke hu taben nyiele balua at ae wisa.
26Haba at ae hwen höcö ka at ame kunâ e,
Me ûcû me vinega ka nyu, me hai ka li ecmak.
27Haba ot kö Iehova, ame osehia ta je bong:
Ke adre me he ka owakhaletâ ta je hunainy tavat ae kong.
28Hnân osenyinâ gejon anyin tavat ae wisa:
Ke ame he ka hia geju anyin tavat ae kong.
29Haba gethen de Iehova, wale hnabâ ka tavat ae wisa;
Ke ûokonguny bi ka tavat adre me ânyâ monu.
30Adre me ca hom degecâ at ae wisa nyiele balua;
Ke ame ca he bi tavat ae kong ka labâ hnyei.
31Haba hnyimen at ae wisa me ame oâ metâ:
Ke adre me he ka subâ degecâ bohmen at ae hwali.
32E khana but li esongodiny at ae wisa ûnyi ae ûcû;
Ke haba hnyimen at ae kong me ame ha hwali.
maintained by the British and Foreign Bible Society