MOSIS KƐŊ IZIRAL TƖŊŊAA LƖƖ 21
21
1Wombiee deemba nɛ ŋ jaŋ daga pɩ Iziral tɩŋŋaa dɩ ba tuto:
Hiburu tɩŋŋaa sɩ ŋaa yosuŋ
2Dɩ nʋʋ nɛ yɔɔ yoŋ-baal dɩ ʋ ŋaa Hiburu tɩɩna, ʋ maga dɩ yomo-la tɩma pɩ tɩɩna jɩsɩŋ balɩdʋ nɛ. Jɩ-pɛmɩŋ lɛ, ʋ maga dɩ ʋ joŋ yomo-la ta. Ʋ bɩ maga dɩ yomo-la tiŋ kʋŋkala aŋ laa ʋ tɩtɩa. 3Dɩ ʋ nɛ pɛ kɛŋ haala kɔ bʋa-la lɛ ba sɩ yɔbʋ, ʋ maga dɩ ʋ pɛ kɛŋ ʋ haala viiri, ka dɩ ʋ nɛ bɩ haala kɛnɛ, ʋ dʋndʋŋa maga dɩ ʋ mʋ. 4Dɩ nɩɩ-la sɩ yɔbʋ nɛ jaa haala pʋ dɩ ʋ kaa lʋl biiriŋ, dɩ yomo-la nɩɩ viiru, ʋ tɩɩna nɛ jaŋ tɩɩ haal-la arɩ biiriŋ. Yomo-la dʋndʋŋa nɛ jaŋ viiri.
5Ama dɩ yomo-la nɛ sɩ, ‘Mɩ cho nɩɩ-la sɩ yɔɔmɛ nɛ, arɩ mɩ haala arɩ mɩ biiriŋ, mɩ bɩ chɛ dɩ ʋ jommi ta,’ 6ŋɩɩ-na nɩɩ-la sɩ yɔbʋ maga dɩ ʋ kɛnʋ kaa mʋ sarɩya diiree leriŋ. Ʋ jaŋ kɛŋ ʋ dɩgɩlɩŋ mɛrɛ boro lɛ, aŋ tɔ luri arɩ luro, ka dɩ ʋ ŋaa ʋ tɩntɩnnʋ a kaa mʋ wuu see ʋ sɩ sʋba.
7Dɩ nʋʋ nɛ kɛŋ ʋ tolo a yallɛ dɩ ʋ ŋaa yomo, ʋ bɩ maga dɩ ba joŋ tolo-la ta arɩ ba sɩ yie joŋ yoŋ-baala ta ŋɩɩ. 8Dɩ nɩɩ-la sɩ yɔbʋ nɛ faa chɛ dɩ ʋ kɛŋ tolo-la ŋaa ʋ haala aŋ bɩra bɩ tolo-la cho, ʋ maga dɩ tolo-la nyɩmma time laa ʋ tolo, bɛɛ wɩaa nɩɩ-la sɩ yɔbʋ nyɩsɛ tolo-la nɛ. Ʋ bɩ wombiiŋ kɛnɛ dɩ ʋ joŋu yalla pɩ nʋʋ sɩ bɩ Iziral tɩɩna ŋaa. 9Dɩ ʋ nɛ joŋ tolo-la pɩ ʋ nanʋala dɩ ʋ ŋaa ʋ haal, ʋ maga dɩ ʋ kɛnʋ a nagɛ ʋ tolo nɛ. 10Dɩ ʋ tɩtɩa ma nɛ jaa tolo aŋ bɩra jaa haal dɔŋ a pɛ, ʋ bɩ maga dɩ ʋ keri ʋ ha-bumbuŋ-la sɩ ŋaa yomo kʋdiilee, ʋ gɛnnɩŋ arɩ ʋ bɔsɔ jʋʋnʋŋ ta. 11Dɩ ʋ nɛ bɩ wɩaa deemba batori wuo ŋaa pɩpɩ haal-la, haal-la jaŋ wuo viiri. Dɩ ʋ nɩɩ viiru, ʋ bɩ maga dɩ ʋ tiŋ kʋŋkala.
Wɩɩ-la sɩ maga ba joŋo ŋaa nʋʋ lɛ dɩ ʋ nɛ ŋaa wʋbɔŋ
12Dɩ nʋʋkala nɛ ŋmoo ʋ dɔŋɔ tɩɩna dɩ ʋ sʋʋ, ʋ maga dɩ ma kpʋ ʋ ma nɛ. 13Ama dɩ nʋʋ nɛ bɩ sɛnɛ aŋ kpʋ ʋ dɔŋɔ tɩɩna, ka dɩ Wɩa nɛ daga, leriŋ hɛ nɩmɛ ʋ sɩ jaŋ fá mʋ yuori. 14Ama dɩ nʋʋ nɛ sɛnɛ aŋ kpʋ ʋ dɔŋɔ tɩɩna, dɩ tɩɩna nɛ paala fá mʋ yuori mɩ koru-la ma, ʋ maga dɩ ba lɛrʋ lɩɩ a kpʋʋ.
15Nʋʋkala nɛ ŋmoo ʋ nyɩmma koo ʋ naaŋ, ʋ maga má kpʋʋ nɛ.
16Nʋʋkala nɛ gaa nʋʋ yallɛ, koo dɩ ʋ ha hɛ tɩɩna teeŋ nɛ, dɩ ba kɛnʋ, ʋ maga ma kpʋʋ nɛ.
17Nʋʋkala nɛ ŋmɩɛsa hɛ ʋ nyɩmma koo ʋ naaŋ lɛ, ʋ maga dɩ má kpʋʋ nɛ.
18Dɩ nɩaa nɛ yuo dɔŋɔ, dɩ dɔŋɔ bolimi dɔŋɔ arɩ nɩsɩŋ koo tabɩɩŋ, dɩ ʋ kaa pɩŋ dɩa lɛ, 19dɩ nɩɩ-la ʋ sɩ bolimo nɛ bɩ sʋba, ʋ bɩ maga dɩ ma ŋaa nɩɩ-la sɩ bolimu wɩɩkala. Ʋ wɩɩŋ nɛ dɩ ʋ tiŋ chɩŋ-la kala tɩɩna sɩ ŋmobo a beŋ ʋ tɩtɩa a duori.
20Dɩ nʋʋ nɛ ŋmoo ʋ yoŋ-baala koo yoŋ-haala arɩ daaŋ dɩ ʋ sʋʋ, ʋ maga dɩ má dɔgʋsʋ nɛ. 21Ama dɩ yomo-la nɛ bɩ sʋba tapʋlɩɩ-la, koo tapʋlaa balɩa pɛgɛ, yomo-la tɩɩna bɩ chɩŋ kala kɛnɛ, bɛɛ wɩaa ʋ nɛ tɩɩʋ.
22Dɩ nɩaa balɩa nɛ yuo dɔŋɔ a mʋ ŋmoo hapuugo dɩ ʋ chei ta, ka ʋ bɩ chaasa bolimi, nɩɩ-la sɩ yɩʋ jaŋ tiŋ chɩŋ-la kala haal-la bala sɩ daga, dɩ sarɩya diire nɛ sɛyɛ. 23Ama dɩ haal-la nɛ chaasa bolimi a sʋʋ, tɩɩna ma maga dɩ ma kpʋʋ nɛ. 24Dɩ nʋʋ nɛ tɔɔ ʋ dɔŋɔ sɩɩŋ pʋrɛ, ʋ maga ma tɔɔ ʋ ma sɩɩŋ pʋrɛ. Dɩ nʋʋ nɛ ŋmoo ʋ dɔŋɔ nyɩlɩŋ churi, ʋ maga dɩ ma ŋmoo ʋ ma nyɩlɩŋ churi. Dɩ nʋʋ nɛ ŋmoo ʋ dɔŋɔ nɩsɩŋ bori, ʋ maga dɩ ma bori ʋ ma nɩsɩŋ. Dɩ nʋʋ nɛ ŋmoo ʋ dɔŋɔ naachɛɛŋ lɩɩsɛ, ʋ maga dɩ ma ŋmoo ʋ ma naachɛɛŋ lɩɩsɛ. 25Dɩ nʋʋ nɛ ŋaa ʋ dɔŋɔ fol, ʋ maga dɩ má ŋaa ʋ ma fol. Dɩ nʋʋ nɛ hɛ ʋ dɔŋɔ nyɔɔ, ʋ maga dɩ má hɛ ʋ ma nyɔɔ. Dɩ nʋʋ nɛ firisi ʋ dɔŋɔ, ʋ maga dɩ má firisi ʋ ma nɛ.
26Dɩ nʋʋ nɛ ŋmoo ʋ yoŋ-baal koo yoŋ-haal sɩɩŋ yɛrɛ, ʋ maga dɩ ʋ joŋ yomo-la ta ʋ viiri nɛ a tɩŋ ʋ sɩɩ-la wɩaa. 27Dɩ ʋ nyɩlɩŋ ma nɛ ʋ ŋmoo churi, ʋ maga dɩ ʋ joŋu ta ʋ viiri nɛ a tɩŋ ʋ nyɩl-la wɩaa. 28Dɩ nɛ-bele nɛ yɩ nʋʋ dɩ ʋ sʋʋ, má yagɛ nɛŋ-la kpʋ arɩ tabɩaa. Ʋ bɩ maga dɩ ma chaŋ ʋ nammɩa. Má sɩ́ nɛŋ-la tɩɩna wɩɩkala ŋaa. 29Ama dɩ nɛŋ-la nɛ vɛnɛɛ joŋ nɩaa dɩ ba bʋbʋl nɛŋ-la tɩɩna teeŋ, ka ʋ vɩa dɩ ʋ beŋ ʋ nyuŋ aŋ leŋ nɛŋ-la ha jujoŋ nɩaa, dɩ ʋ nɛ kpʋ nʋʋ, ʋ maga ma yagɛ nɛŋ-la arɩ ʋ tɩɩna kala kpʋ arɩ tabɩaa. 30Dɩ chɩmɩŋ ma nɛ ba kere pɩ nɛŋ-la tɩɩna, ʋ maga dɩ ʋ tiŋ nɛ aŋ laa ʋ mɩɩsɩŋ. 31Dɩ nɛŋ-la kpʋ hantolibie nɛ koo hambolibie nɛ, ʋ maga ma ŋaa ŋɩɩ tɩtɩa mɩ sɩ daga nɛ. 32Dɩ nɛŋ-la nɛ kpʋ yoŋ-baal koo yoŋ-haal, nɛŋ-la tɩɩna maga dɩ ʋ tiŋ chɩmɩŋ nɛ a pɩ yomo-la tɩɩna, warɩpʋla mara arɩ fii, ka dɩ ba pɛ yagɛ nɛŋ-la kpʋ arɩ tabɩaa.
33Dɩ nʋʋ nɛ lu bʋa koo dɩ buotuoŋ nɛ ʋ kaa suro ta, dɩ nɛŋ koo kakumo foro tuu a sʋʋ, 34nɩɩ-la sɩ lu bʋa-la koo a suri buotuo-la ta, ʋ maga dɩ ʋ tiŋ nɛŋ-la koo kakumo-la chɩmɩŋ nɛ aŋ joŋ.
35Dɩ nʋʋ nɛŋ nɛ yɩ ʋ dɔŋɔ nɛŋ dɩ ʋ sʋʋ, ʋ maga dɩ ba yallɛ nɛ-wei-la a joŋ moribie-la a pɛ nɛ-sʋʋ-la lɛ a kaa kpaa a magɛ dɔŋɔ. 36Dɩ ba nɛ jɩma dɩ nɛŋ-la vɛnɛɛ ŋaa ŋɩɩ nɛ, ka ʋ tɩɩna vɩa ʋ kaa tɔ, ʋ maga dɩ ʋ kɛŋ nɛ-wei-la tiŋ nɛ-sʋʋ-la chɩmɩŋ aŋ joŋ nɛ-sʋʋ-la.
Chwazi Kounye ya:
MOSIS KƐŊ IZIRAL TƖŊŊAA LƖƖ 21: SIS
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
©Ghana Institute of Linguistics Literacy and Bible Translation 1984, 2014