Failemon 1
1
1Mi Pɔɔl, waai ate ba yik lik Yeezu Kirisita nyiŋla ale ti suoku Timoti a puusi ni. Mi Pɔɔl, ale a ŋmarisi gbaŋka de a te ti suoku ale ti tomteerɔ choawa, Failemon 2ale Kirisita bisaŋa ale a tu chaab fi yenni po la ale ti toawa Afia ale ti tugurik tɔŋdɔ choawa Akipus. 3Wen ti Kowa ale ti Nyɔnɔwa Yeezu Kirisita le te ni ŋmanteka ate ni boro ale suiyɔgni.
4M dek suok Failemon, diipo meena m nyiem dan boro a puusi Wen, mi a teeri fi wari kama ale a te m Wenni jiam. 5Dii nyiŋla, m wom fi ale ta yaalika soa dii ale Wen nuruma meena la kama. M wom fi siaka ale ti Nyɔnɔwa Yeezu Kirisita ale soa dii mɛ la kama. 6Mi a puusi Wen kama ayen fi pii nyiŋ ate fi nye ate nuruba mɛ a maa ta siaka ase fi la. Nya kude a dan nye, ku le basi ate fi sum miŋ chak wamaŋ sii meena wuu ale a nye fi jigi Kirisita nyiŋla. 7Fi yaalika ate fi ta la, m dek suowa, a ta ka masim nna yegayega ale nyiŋbiiri a jam m jigi. Fi nye kama ate Wen nuruma meena sue peenti.
8Dila nyiŋla, m baga nyini peelim kama a fɛ fu ase fi suok Kirisitawa nyiŋ ayen fi nye wari dii ale magsi fi nye la. 9Alege m le ta yaalika ale fu la nyiŋ m kan yaali ayen m fɛ fu, mi a yaali kama ayen m saalim fu. Mi ka Pɔɔl, m be ka nisɔmma alege yɔgyɔgla de ba yik mu a lik kama Yeezu Kirisita nyiŋ.
10M be tagri ka Onesimos waai ale ka m biik Yeezu Kirisita yuenni nyiŋla. Mi ale diem bo likka dɔk nna la m chim ka wa ko Yeezu yuenni nyiŋ. 11Dila po wa jam ka tuintuini a te fu, alege yɔgyɔgla de, wa ta tuilum kama mi ale fi jigi. 12M basi wa kama ale m suinum meena ayen wa pilim jam fi jigi. 13Mi a yaali kama ayen m le diem bo likka dɔk la, wa diem maa boro ale mu Wen wamaŋsaŋa tomka nyiŋ ate wa tagri fi zuk a maari mu. 14Alege, m kan fɛ fu kama ayen fi nye wanni de, alege mi a yaali kama ayen fi siak ale fidek yaalika ate m kan nye wari nin ka fi a nin siak ayen m nye. 15Ku baga a nye kama ate Onesimos ale kan bo fi jigi ate ku beni magadek la, ate fi a yaali ayen wa pilim jam fi jigi a boro taam wuu. 16Alege, mi a yaali ayen m weeni a sak fu kama ayen fi nya wa ŋman daa yɔma wala choawa, wa yaa gaam yɔma kama. Wa yaa ka suinum po suok Yeezu Kirisita yuenni nyiŋ. Wa potim bo ka mi suinum po, alege mi a poli ayen yɔgyɔgla de wa le poom bo fi suinum po kama a gaam wa ale bo mi suinum po dii ase yɔma ale m suok ti Nyɔnɔwa Yeezu Kirisita yuenni nyiŋla.
17Dila nyiŋla, fi dan pai mi chim ka fi Kirisita biik choa be basi ate wa ŋman pilim jam fi jigi ase mi a nin jam fi yenni ate fi basi ate mi a jo diila. 18Wa dan kaasi ka fi wari yaase wa ta ka fi pami, basi ate mi tuni dila. 19Jigini de gbaŋka po, mi dek ale pai m nisima a ŋmarisi a weeni ayen, mi Pɔɔl le tuni fu. Ku an poom magsi ayen m ŋman teeri fu nya kude ayen, fidek ale kali la, fi ta ka mi pamiya. 20Dila nyiŋ, m suowa, mi a saalim kama ayen ti Nyɔnɔwa Yeezu Kirisita nyiŋ fi nye wanni de a te mu. Ase m Kirisita biik choa la, basi ate m poi peenti.
21M sebi chak kama ayen m le ŋmarisi gbaŋka de a weeni fu diila, fi le nye ka dila te mu m poom a poli ayen fi le nye gaam dila a te mu kama.
22M be le ŋman a yaali ayen fi nye dii a te mu la ale, fi yaali dɔk te mu, dii nyiŋla, mi a poli ayen Wen le tulisi ni meena puusaŋa kama ate m ŋman pilim jam ni jigi.
23Epafiras, waai ate ba maa yik wa a lik Yeezu Kirisita nyiŋ la, a puusi ni. 24M tuimtomdɔ chaama mɛ Maak ale Arisitaakus ale Diimas ale Luuk a puusi fu.
25M be ŋman a saalim ayen ti Nyɔnɔwa Yeezu Kirisita ŋmanteka a bo ale ni meena.
Chwazi Kounye ya:
Failemon 1: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation