2 Tesalonika 3
3
1Wie ŋaai ate mi a biisi a kpeglim la ale nna. Ti suata ti a saalim kama ayen ni a puusi Wen a te ti ate ti baga a nye ate ti Naawenni wamaŋsaŋa a tagli jigi meena, ate nuruba a ta siaka ale ŋa abe ba te ŋa zula mɛ ase nama ale a nye diila. 2Ni a puusi Wen mɛ ayen wa vari ti a ta nyini nuru baai ale a tom tuimbaata la nisa po, dii nyiŋla, nuruba yegayega a ka siaka ale wamaŋsaŋa. 3Alege ti Naawenni ka wensie nyɔnɔ. Wa le pai wa pagrimu a te ni abe wa vari ni jabioku jigi a basi. 4Ti Naawenni abe basi kama ate tama seba chak ayen ni a tom ka dii ate ti weeni ni la, ni abe le kasim a tom ka dila. 5Ti Naawenni ale basi ate ni miŋ wa yaalika ale chichiibaŋa ate wa te ni la nalimnyiini.
6Ti suata, ti Nyɔnɔwa Yeezu Kirisita yuenni nyiŋ ate ti a weeni ni wieŋa de meena. Ni kan pai nidek a gum chaab ale baai ale ta nyiŋworuk, ale kan va sinsak ŋaai ate ti sak ni la. 7Nama dek seba kama nalimnyiini ayen ku magsi ka ni a tom dii ate ti jam bo ale ni a tom la. Ti jam ka nyiŋworukwa. 8Ti jam a tom ka nna yegayega yok ale kantueŋ meena, ayen ti dɛ tidek nyiŋ wulum ŋanta. Ti an jam a yaali ayen ni a nam tama nyiŋŋa. Dila ale soa ate ti nyiem tuni ŋandiin tii meena ate ni jam a te ti la. 9Ku jam magsi kama ayen ni soa ti nɔi ŋandiinta, alege ti an jam nye dila, ti jam a dɛ ka tidek wulum ŋanta ate ku sak ni le ni nye dii a tomsi tama la. 10Ti ale jam boro ale ni la ti jam weeni ni kama mɛ ayen waai a dan kan a yaali tuima tomka, wa kan a dɛ ŋandiinta. 11Boan nyiŋŋa, ti wom ayen ni ba gela ka nyiŋworuk nyam a pai nidek a nyo nuruba wie po. 12Ti a weeni ba kama ti Nyɔnɔwa Yeezu Kirisita yuei nyiŋ ayen ba basi ate ba nina muni ate ba a dɛ badek wulum ŋanta abe ba a tom ba tuimaŋa chim. 13Ti suata, ni kan jiak ale tuimaŋsa tomka.
14Nuru a dan bo ni po ate wa kan yaali ayen wa va dii ate ti ŋmarisi gbaŋka de po la, ni ŋmasi nya wa chak. Ni kan basi ate wa maa gum ni po, dila le basi ate wa nya chivie. 15Ni kan nye wa jigi ase wa ka ni dachiak la, alege ni pii nyiŋ ate ni tagri wa popola ate wa va ni suiku ase wa ka ni suok la.
16Ti a saalim ti Naawenni dii ale ka suiyɔgni nyɔnɔ la, ayen wa le bo ale ni meena ate ni kasim boro ale masim wie meena po.
17Mi, Pɔɔl a puusi ni. Mi dek ale a ŋmarisi wieŋa de ale m yuenni a kpeglim. M gbaŋsaŋa meena mi a nye ka dila. 18M be ŋman a saalim ayen ti Nyɔnɔwa Yeezu Kirisita ŋmanteka a bo ale ni meena.
Chwazi Kounye ya:
2 Tesalonika 3: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation