2 Korinti 7
7
1M dek doaba, wieŋa de ka Wen pumpuulima ate wa jam puulim ale ti. Ni basi ate ti yeeri tidek wie ŋaai ale a basi ate ti a chim nuru daŋtisa la, abe ti chim nuru weleŋsa a te Wen zula.
2Ni lak ni suiniimaŋa a te ti. Ti an jam nye ate waai a tom kaasi ya. Ti be an jam yaali degaamka yaase ti jam paasi nuru waai ya. 3Ti kan weeni nna a sak ni ayen ka ti nya ni kaasuŋŋoa. Ti poom weeni a sak ni ti ni a yaali ni nna yegayega la. Ti dan poom kpi a yaase ti vua, ti le diem ta ni ka ti suiniima po. 4Ti ta siaka ale ni ka nna yegayega dii nyiŋla ti ta kanjanta kama ni nyiŋ. Ni a deŋsi ka ti kpa ti ninammu po, ate ti sue a peenti daa meena.
5Ti le jam paari Masidoniya tɛŋka la, ti an jam nya vuusum. Jigi meena ate ti jam cheŋ la, ti kasim jam a nya ka daanika ale kpaliŋsa ale kpazinagsuk. 6Alege Wen dii ale a te nyiŋbiiri baai ale a nam la, ale jam tom Titus la ayen wa jam deŋsi ti kpa. 7Ti sue a jam peenti kama ale ti le jam nya wa ale wom wa wapaalaŋa ale ni le jam deŋsi wa kpai diila. Wa weeni ti ayen ni a yaali ayen ni nya ti ka nna yegayega. Wa weeni sak ti mɛ ayen ni sue a kaasi kama, ale ku le jam daani ni diila. Wa weeni sak ti mɛ ni niŋ ale bo le ti diila. Kude basi kama ate m sui a ŋmasi peenti nna yegayega. 8M le liŋ jam ŋmarisi gbaŋ kaai a te ni la, ni sue a jam kaasi ka nna yegayega, alege m le jam wom ayen ni sue a jam kaasi beni la, dila a ŋman jam peenti m sui kama. 9Alege yɔgyɔgla de mi sui ale peenti la, daa m le nye ate ni sue kaasi la nyiŋ ŋa alege ka ni sueŋa kaasika ale basi ate ni tagri ni nyeka la. Wen dek abe le pai ni sueŋa kaasika a tagri ni. Dila la mi an kaasi wari ya. 10Sui kaasuŋ kuui ale ka Wen yaalika la a ta ka tagri kaai ale a te varibasika ate fi kan ŋma fi dega, alege tɛŋzuk de sui kaasuŋku a ta ka kum a jam. 11Ni le basi ate Wen a kaasi ni sue la nyiŋ ale soa ate ni a yaali ayen ni sak ayen dii meena ate ni a nye la ka wamaŋsa. Ni sue abe kasim a puuri kama alege ate ku cha ni nna yegayega ate ni kasim a yaali ayen wie a nye a magsi. Ni chiib a sak kama ayen wanni de ni nye magsi kama.
12Ti an jam ŋmarisi gbaŋka ayen ti le ka waai ale tom wabiokku la, yaase waai ate wa nye wa kaasi la. Ti jam ŋmarisi kama mɛ ayen Wen sak ni le diem ta yaalika ale tama diila. 13Ni te ti nyiŋbiiri ka nna yegayega ale weeni ti ni le te wa nyiŋbiiri diila, ti sue a jam peenti kama a gaam ŋa le poom liŋ peenti diila. 14Titus ale jam basi dula ayen wa cheena nama jigi la, ti jam weeni kama ayen ti ta ka kanjanta ni nyiŋ. Nin jam basi ate ti nya chivie. Ti kasim jam a biisi ka wensie wie ale ni. Ti le jam weeni Titus dii mɛ la, a jam ka wensie. 15Wa a teeri ka ni le jam tuesi wa dii ale jam pai nidek a te wa ale ge gomsi nidek ayen ni va wa nɔi la. Yɔgyɔgla de wa a yaali ni kama dila nyiŋ a gum du. 16M sui peenti ka nalimnyiini ate m ta siaka ale ni nna.
Chwazi Kounye ya:
2 Korinti 7: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation