2 Korinti 5
5
1Ti nyiŋsaŋa a nye ase ka viita ate nuruba a ti zaani la. Ti dan jam kaasi, Wen le pai ti kama a ta cheŋ wenŋmazuk a ga te ti nyiŋpaalisa sii ate wadek a nye la. Ti le ta nyiŋsaŋa de kama taam wuu. 2Yɔgyɔgla de tama a kum ale a yaali ka nna yegayega ayen Wen pai ti a ta cheŋ wenŋmazuk a ga te ti nyiŋpaalisa dula. 3Wa dan nye dila, ti chiisaŋa a kan jɔk nyiŋsa. 4Yɔgyɔgla de nyiŋ sii ale a nye se viita la, ale basi ate ti a nya ninammu. Ti kan yaali ayen ti basi ti yɔgyɔgla de nyiŋsaŋa nwuli, alege ti kasim a yaali kama ayen Wen le pai nyiŋ paalisaŋa a te ti ate ti zaani si naŋkula po. Wa dan nye dila, yɔgyɔgla de nyiŋsaŋa le si jam kpi la, ale si chim wa nyiŋ paalisaŋa la. Si ta ka nyuvuri dii ale kan ta kpeglimka la. 5Wen ale nye ti ayen ti tuesi wa nyiŋ paalisaŋa. Wa pai wa Chiika a te ti kama ayen Chiika a liŋ chim wa tutuna ŋaai ate wa le tuni ti la, ate ku sak ayen wa le sum tuni ti kama.
6Dila ti ta nyiŋbiiri kama ale seba ayen ti le diem vua yɔgyɔgla la, ti diem yalima kama ale wenŋmazuk yenni. 7Ti boro ka siaka nyiŋ alege daa ti ale a nya diila nyiŋŋa. 8Mi a weeni ayen, ti ta nyiŋbiiri kama ayen ti dan yalima ale ti nyiŋsaŋa de ale bo yeri ale Naawen a zunchoŋ kama. 9Ti dan bo dula yaase ti moata wenŋmazuk, ku a fɛ kama ayen ti nina muni ate ti a nye ate Wen sui a peenti. 10Ti dan kpi, ti meena le cheŋ ga zaani ka Kirisita niŋ ate wa bo ti buusa. Ti le tom tuimaŋsa a yaa se tuimbaata ale ti yɔgyɔgla de nyiŋsaŋa la, wa le tuni ti kama ŋa nyiŋ.
11Ti le a chali ti Naawenni la nyiŋ, ale soa ate mi a yaali ayen m sak ni ayen ti a tom Wen tuimaŋa ale ka wensie. Wadek seba ayen ti a tom wa tuimaŋa ale ka wensie. M seba ayen nama mɛ le nye ka dila. 12Ti an ŋman a yaali ka yuei a te ti dega. Ti a te ni ka suik ayen ni ta kanjanta tama nyiŋ, ate ni baga a biisi sak baai ale a nya nuruba peelim tuima alege kan nya ba suiniima po la. 13Ti daa biisi nna, ni ba gela a poli ayen ti a yesiŋ kama yaa? Ti daa yesiŋ kama, ti a yaali ayen ti a te zula ka Wen di nyiŋ. Ni ba gela a poli ayen ti ta nyiŋyɔgsa? Ti dan ta nyiŋyɔgsa, ku ka nama nyiŋ. 14Kirisita mariŋ ti ka nna yegayega. Tama seba ayen wa zaani ka nuru meena naŋkula po a kpi ba nyiŋ. Wa le mariŋ ti dila la nyiŋ, ale soa ate ti nina muni ale wa tuimaŋa tomka. 15Wa kpi ka dila, ayen baai ale ta wa nyuvuri dii ale kan ta kpeglimka la a kan ŋman va badek yaalika, alege ba le va ka waai ale kpi ale ge yiti kum po bala nyiŋla.
16Dila ale soa ate tama an ŋman a bo nuruba buusa a se tɛŋzuk nuruma la. Ti jam a bo Kirisita buusa ka dila, alege yɔgyɔgla de, ti an ŋman a bo wa buusa. 17Nuruba a dan tagri ba popola a va Kirisita, Wen a tagri ba popolaŋa kama ale ge a nye ba ate ba chim nuru paalisa. Ba popola kpagsaŋa a ŋman karo diipo, diipo. 18Wen nye wieŋa de meena a te ka tama. Kirisita kummu nyiŋ ale soa ate Wen a ŋman a yaali ayen wa nye nɔiyeŋ ale tama. Wen ŋman a yaali kama ayen ti a weeni wa wie a sak nuruba, ate wa ale bala mɛ a ŋman nye nɔiyeŋ. 19Kirisita kummu nyiŋ ale soa ate Wen a nya suik a basi ayen wa ale nuru meena a ŋman nye nɔiyeŋ, ate wa kan ŋman a teeri ba tuimbaataŋa. Wa wamaŋsaŋa de ate wa pai a nyo tama nisima po ayen ti a sak nuruba.
20Kirisita ale tom tama ni jigi, ayen Wen baga a biisi wie a sak ni. Ti a saalim ni kama Kirisita nyiŋ, ayen nama ale Wen a nye nɔiyeŋ a nueri. 21Wen a nye kama ayen waai ale kan seba biem la a chim biem tama nyiŋ, ate wa nyiŋ ti baga a chim Wen wayɔrisimaŋa.
Chwazi Kounye ya:
2 Korinti 5: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation