1 Korinti 15
15
1M suata, mi a yaali ayen m teeri ni wa paali maŋsa, ŋaai ate mi a mooli a te ni ate ni siak la a nye ase ka nyubi ate ni za di zuk ale siaka la. 2Wen wanni ale la ate mi a mooli a te ni. Ni dan kasim ta siaka ale di, di ale vari ni a basi alege ni dan kan sum ta siaka ni kan nya varibasika.
3Ba a sak mi ka wa dii ale chim wari dek a gaam wie meena la ate mi me a pai sak ni. Wa dila ale Kirisita a kpi kama ti wabaataŋa nyiŋ, ase ba ale jam ŋmarisi Wen gbaŋka po diila. 4Wa abe le kpi la, ba gu wa kama ate ku daa ŋata danni wa yiti kum po ase ba ale jam ŋmarisi Wen gbaŋka po diila. 5Wa abe le yiti kum po la wa pai wadek kama a sak Sifas a ŋman pai wadek a sak wa ŋaaŋviirɔma pi ale bayewa. 6Wa a ŋman pilim pai wadek a sak wa ŋaaŋviirɔma ba chaab kobsinu. Ba gela a diem boro kama alege ba gela a kpi. 7Wa ŋman pilim pai wadek me a sak Jeemsi, ku ŋaaŋnyiŋ a ŋman pai a sak tuimtomdɔma meena. 8Ku kpeglimka meena wa yaa pai wadek a sak mi. Alege mi abe ka waai ate ba biak mu diipo ale kan magsi ba biak mu la. 9Diila mi ka wa tuimtomdɔma po ŋaaŋ denɔ. Mi an poom magsi ayen ba a wi mu ayen tuimtomdɔ, dii nyiŋla m namsi Wen nuruma ka yegayega. 10Alege Wen ŋmanteka nyiŋ jinla mi ale ka nuru waai choa nna, Wen ŋmanteka nyiŋ mi an nye kaasi ya. Mi abe tom kama a gaam Yeezu tuimtomdɔ mbala, alege daa mi dek nyiŋŋa ka Wen ŋmanteka nyiŋ ate m baga a tom. 11Dila la dan ka mi ale mooli yaase tuimtomdɔ mbala ale mooli, wa dii ate ti meena a mooli la ale la, dila abe le ni ta siaka ale di.
12Yɔgyɔgla de ate nuruba a mooli ayen Kirisita a yiti kum po la, ni ba gela a weeni kama ayen baai ale kpi la a kan yiti kum po. 13Ku la abe dan ka wensie, ku a sak kama ayen Kirisita an yiti kum po. 14Kirisita abe dan kan yiti kum po, wa dii ate tama a mooli la ale nama siaka ale Kirisita ate ka kiri ya. 15Tama ale weeni dii ti moolika po la a sak kama ayen ku ka ku tɔga ale Wen ale tom diila, dii nyiŋla tama weeni ayen wa basi ate Kirisita a yiti kum po, alege ku be dan ka wensie ayen baai ale kpi la a kan yiti kum po, Wen abe m basi ate Kirisita yiti kum po. 16Diila baai ale kpi la dan ka a yiti kum po dan ka di Kirisita abe m yiti kum po. 17Wen a dan kan basi ate Kirisita a yiti kum po, ni siaka ale wa ka kinla, ate ku a sak ase ni bo ka ni wabaataŋa po la. 18Ku abe ŋma a sak me ayen baai ale ta siaka ale Kirisita alege kpi la meena a bo ka ninam po. 19Tama ale ta yiili ŋaai ale Kirisita la dan ka wa te ti tɛŋka de zuk nyuvunni nyiini, ti ka niniga nyam a gaam waai meena tɛŋka zuk.
20Alege ku ka wensie ayen Wen a basi ate Kirisita a dɛ niŋ yiti kum po ate ku a sak ayen baai ale ta siaka ale wa alege kpi la, wa le basi ate ba yiti kum po.#15:20 Kaabka 23:9-10 21Nuru yeŋ nyiŋ abe le soa ate nuruba a kpi la, wanyi me nyiŋ ale soa ate nuruba a yiti kum po. 22Baai meena ale Adam ale ka bunyi la a kpi kama, dila nyiŋ me ate baai meena ale a chim bunyi ale Kirisita la wa basi ate ba yiti kum po. 23Alege Wen ale basi ate waai meena a yiti kum po a magsi chaab ale wa ale yaali ku diila. Wen a basi ate ka Kirisita a dɛ niŋ a yiti. Kirisita yaa dan ŋman jam, baai ale jam ta siaka ale wa la yaa yiti. 24Ku ŋaaŋnyiŋ ate tɛŋka yaa kpeglim. Kirisita yaa le nak a nya pagrim chichirik sii ale ta pagrim la zuk ate wa yaa pai naamu a te wa kowa Wen. 25Kirisita ale kasim a dɛ wa naamu kama ate Wen a ga nak yiak wa dachaasa meena ate Kirisita tabi ba zuk. 26Dachiak kaai ate Wen za wa nak yiak a kpeglim la ale kum. 27Wen gbaŋka po ku weeni ayen, <<Wen a basi kama ate Kirisita a nya pagrim ŋanta meena zuk ale tabi zuk.>>#15:27 Yiila 8:6 Ku be weeni a lagri kama, da ayen Wen dek a maa gum du kama. Wen dek ka waai ale wa basi ate Kirisita tabi ŋanta meena zuk. 28Alege Wen a dan pai jaabuuri meena ate Kirisita a nya, Wen nidoabinni Kirisita yaa le pai wadek a te Wen dii ale pai jaabuuri meena a te wa la, ate Wen a yaa a nya jaabuuri meena zuk.
29Ni be te ti poli nya baai ale zaani kpieba naŋkula po ate ba te ba soka la. Ku abe dan ka wensie ase nuruba ale a weeni ayen kpieba a kan yiti kum po la, ka boa abe le soa ate ba a te nuru bala soka a magsi kpiema? 30Ka boan jaab ale soa ate tama a chali a jo biem po, 31a tu kum daaŋa meena? Kanjauŋ tii ate mi ta ni nyiŋla ale basi ate mi a weeni kude. Be ka Yeezu Kirisita ti Nyɔnɔwa me nyiŋ ate m ta kanjantaŋa. 32Ase baai ale kpi la a dan ka a yiti kum po, mi ale tu chaab ale gɔi duŋsaŋa Efisos tɛŋka po la, ka boan jaab nyuenta ate m nya ku po. Be dan ka dila ase ba ale weeni diila ayen, <<Ti a dɛ abe ti a nyu ale chum ti ale kpi.>> (Azaya 22:13) 33Ni abe kan te nuruba a paasi ni. Ni dan pai nidek a maŋ nuru kaasuŋta ba ale kaasi ni. 34Ni te ate ni popola a ŋman jam abe ni basi wabaata nyeka. Ku magsi chivie ta ni kama ni ale kan seba Wen la nyiŋ.
35Nuru waai ale bek ayen, baai ale kpi la ale nye ka sɛ a yiti kum po. Ba dan yiti ka boan nyiŋsa chaab ate ba le tara? 36Betta beka ale la. Ase fi dan bori biri tɛŋ, di kan deri a nyini viowa, se di poak abe di yaa nyini. 37Jaabuui ate fi a bori la ka biri, da dii dai mum biri yaase jaab yoŋ biri, ku da ayen ka kinni ale vioku meena. 38Wen ale a te bi dii ate ba bori la kiri dii choa ate wa a yaali la, wa a te kama a magsi chaab ale ka bi dii choa la. 39Ŋanvuta ale bo tɛŋzuk de la nyiŋsaŋa a daa nyiŋ yeŋsa, nurubisa nyiŋsaŋa ka si tɔga, duŋsa nyiŋsaŋa si tɔga, nuinsa nyiŋsaŋa si tɔga ate juma me nyiŋsaŋa si tɔga. 40Wenŋmazuk ale tɛŋzuk ŋanta meena a ta nyiŋsa kama. Wenŋmazuk ŋantaŋa nyiŋsaŋa nalimu ka bu tɔga ale tɛŋzuk ŋantaŋa nyiŋsa nalimu. 41Wenbinni a ta di me dek nalim kama, Chiika a ta ka dek nalim, chiŋmarisaŋa me a ta si dek nalim. Chiŋmarisaŋa nalimu a poom diem ka tɔgatɔga.
42Ku ale ku nye dii baai ale kpi ale ge ate Wen a basi ate ba yiti kum po la jigi ale nna. Ase biri ate ba a bori ate di a poak alege a nyini la, Kirisita biika nyiŋka me ba a dan gu ka, ka a poak kama alege yitika a dan paari ka yaa chim ka paalik, wa an ŋma kpi ate ka a poagi. 43Ase ba dan gu wa, nyiŋka a nye ase ka jaab ale lɔrima le wobsa diila. Wa abe dan yiti kum po ka nala ale pagra kama. 44Yɔgyɔgla de ate ti ta nyiŋ sii la a za si jam tagri a chim ka chiika po nyiŋsa. Dila la nyiŋ lam a boro ate Chiika po me nyiŋ a boro. 45Ku ŋmarisi ayen, Wen ale jam liŋ nye nuru waai ate ba a wi ayen Adam la. Wa jam te wa ka nyuvuri (Piilimka 2:7) alege Adam waai ale kpeglim la dek ale a te nuruba nyuvuri. 46Nuru waai ale jam ale nyiŋ lammu la ale dɛ niŋ ate waai ale jam ale chiika la a tagri. 47Adam waai abe le dɛ niŋ la, Wen nye wa ka tɛŋzuk de alege Adam waai ale pai saŋ la a nyini ka wenŋmazuk. 48Tɛŋka zuk demma a nye ase ka nuru waai ate Wen a nye wa tɛŋzuk de la, baai mɛ ale ba bo wenŋmazuk la a nye ase ka waai ale nyini wenŋmazuk la. 49Yɔgyɔgla de ti a nye ase ka nuru waai ate Wen a nye wa tɛŋzuk de la alege ta cheena ti le nye ase ka nuru waai ale nyiini wenŋmazuk la.
50M suata, mi ale a yaali ayen ni seba diila ale tama ale ti nyiŋsa dɛ a kan baga a nya Wen naamu. Ti ta ka nyiŋ sii ate ti dan kpi si poak la. 51M le weeni wasusugi ate ni wom. Ti meena a kan deri kpi alege ti dan wom damuniŋ ale ka peeri wenŋmazuk ti nyiŋsaŋa ale deri tagri ka nna yilibi. 52Ba dan peeri damuniŋ Kirisita bi sii ale kpi la ale yiti kum po. Ba abe dan yiti ba kan ŋman kpi. Tama baai ale diem bo tɛŋzuk de la nyiŋsaŋa ale deri tagri. 53Dila la jabuui ale a poak la ale tagri a chim jabuui ale kaa poak la, ate jabuui ale a kpi la ale tagri a chim jabuui ale ka a kpi la. 54Dila la kude a dan nye, ate jabuui ale a poak la a tagri a chim jabuui ale kaa poak la, dii ate ba a ŋmarisi Wen gbaŋka po la ale chim wensie. Ku ŋmarisi ayen, <<Kum pagrim a yaa taam kama.>> (Azaya 25:8) 55<<Bu pagrimu a bo ka bɛ? Bu pagrimu a bo ka be a koani nuruba?>> (Yosea 13:14) 56Kum a nya bu pagrimu a nyini ka wabaata jigi ate wabaata a nya ti pagrimu Sinsaŋŋa jigi. 57Alege ti a nye Wen jiam Yeezu Kirisita ti Nyɔnɔwa nyiŋ ate wa a te ti pagrim la.
58Dila nyiŋ m suata, ni chiib a zaani nalimnyiini. Ni kasim a tom Naawen tuimaŋa ale ninmuna, ni ale tɔlim seba ayen dii meena ate ni tom a te Naawen la daa kinla nyiŋla.
Chwazi Kounye ya:
1 Korinti 15: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation