1 Korinti 1
1
1Gbaŋka dɛ a nyini ka mi Pɔɔl waai ate Wen a wi mu ale wadek yaalika ayen m chim Yeezu Kirisita tuimtomdɔ la, ale m Kirisita biik choawa Sositenisi jigi.
2M ŋmarisi a te ka nama baai ale ta siaka ale Wen a bo Korinti tɛŋka la, ate Wen a gaari ni ayen ni chim wa nuru weleŋsa la, ale baai ale a tu chaab jigi meena a puusi a wi Yeezu Kirisita waai ale ka nama ale tama meena Naawen la yuenni.
3Mi a puusi a te Wen ti Kowa ale Yeezu Kirisita ti Nyɔnɔwa ayen wa te ni ŋmanteka abe wa te ni suiyɔgni.
4M be kasim a te Wen dii ate mi va la jiam kama a te ni, dii nyiŋla, wa le va Yeezu Kirisita nyiŋ a ŋmante ni. 5Nama ale Yeezu ale ka bunyi la, Wen basi kama ate ni jigsi ale ŋanta meena, a gum chaab ale biik ale sebika. 6Yeezu Kirisita wieŋa ate ba sak ni la, ni ta siaka ale ŋa kama nna pagri pagriga, 7dila nyiŋ ni an jɔk tiirim ale magadek mɛ, ase ni ale a limisi da dii dai ate Yeezu Kirisita ti Nyɔnɔwa ale sak wa pagrimu ale ka diila. 8Wa be le basi ate ni siaka a pagra a ta ga paari kpeglimka, ate wa kan bo a mini ni dai dii dai ate Yeezu Kirisita ti Nyɔnɔwa le bo tɛŋka demma meena buusa la. 9Ti seba chak kama ayen Wen ale nye dii meena ate wa weeni ayen wa ale nye la. Wala abe le wi ti ayen ti chim bunyi ale wa Nidoabinni Yeezu Kirisita waai ale ka ti Naawenni la.
10Mi a yaali ayen m weeni m Kirisita bi chaama, Yeezu Kirisita ti Nyɔnɔwa yuenni nyiŋ, ayen ni ta nɔiyeŋ ate ni kaa poori chaaba. Ni gum chaab ale popola yena, 11diila Kolo yenni dem ale lagri weeni sak mu, ayen ni kasim ta ka nanpaga ale chaab. 12M be ale a weeni diila ale nna, ni kasim a biisi ka fi nɔi, fi nɔi. Ba gela ayen ba va ka Pɔɔl, ba gela ayen ba va ka Apolos, ba gela ayen ba va ka Sifas, ba gela mɛ ayen ba va ka Kirisita. 13Ni a nye nna ase Kirisita ma a piisi kama daa wanyi la. Ba an kpi daa mi Pɔɔl jabarimu zuk ni wabaataŋa nyiŋŋa. Ba be an te ni soka ase ka mi ŋaaŋviirɔba la. 14Mi a nye Wen jiam kama m le kan te ni waai soka la, alege ka Kirisipus ale Gayus ate mi a te ba soka. 15Dila nyiŋ ni waai kan baga a weeni ayen ba te ni soka ase ka mi ŋaaŋviirɔba la. 16M te Sitifanus ale wa dɔkdemma soka mɛ, alege mi an baga a teeri waai ate m te wa soka. 17Kirisita an tom mu ayen mi a te ka nuruba soka. Wa tom mu kama ayen m mooli wa wamaŋsaŋa a te nuruba, abe m kan mooli ŋa a va nurubiik yammoa ate Yeezu kummu jabarimu zuk a chim kinla.
18Baai meena abe ale bɛ Wen suiku la, a poli kama ayen Kirisita kummu jabarimu zuk wieŋa ka kinla, alege tama baai ale nya varibasika la, ŋa ka Wen pagrim ti jigi. 19Ku ŋmarisi ayen, <<M le kaasi yam nyama yammu, abe m kaasi sebrɔma sebika.>> (Azaya 29:14) 20Dila nyiŋla, tɛŋka de yam nyama, ale gbaŋ sebrɔma, ale nanpaga nagrisa a ka wamaŋ a weeni a magsi chaab ale Wen pagrimu ale wa yammu. Wen abe a sak kama ayen tɛŋka de demma yammu ka betta yam. 21Wen abe ka yam nyɔnɔ, ate wa yaa basi ayen nuruba a kan baga a pai badek yam a seba wa. Wa nye dila kama ayen wie ŋaai ate tama a mooli ate nuruba a weeni ayen betta wie la, wa va ŋala a vari baai ale ta siaka la a basi. 22Juuma abe a yaali ka wakperikaliisa nya ka. Baai ale kan daa Juuba la a yaali yam. 23Dan ka tama, ti a mooli ka Kirisita kummu jabarimu zuk, wa dii ale chim leeta a te Juuma ale chim betta a te baai ale kan daa Juuba la. 24Alege baai ate Wen wi la Juuba ale baai ale kan daa Juuba, wanni de ka Kirisita waai ale chim Wen pagrim ale Wen la. 25Wari dii ate nuruba a poli ayen di ka betta Wen jigi la, di gaam nurubiik yam kama. Dii mɛ ate nuruba a poli ayen di ka wobsim Wen jigi la, di pagra a gaam nurubiik pagrim kama.
26M suata, ni teeri ni le jam ka nuru baai chaab alege ate Wen a wi ni la. Nurubiik popola po daa ni yega ale jam ta yam yaase pagrim yaase nuru kpienta. 27Wen a potim lueri ka baai ate tɛŋka demma a pai a chim betta la ayen wa sak yam nyama ayen ba sum ka yammoa. Wa be ŋman lueri ka baai ate tɛŋka demma a nya ba ase niwoba la ayen wa sak pagrɔma ayen ba sum ka pagrimoa. 28Wa lueri ka tɛŋka demma ale nya ŋan baai nueri ale a zɛri ba la, ale a poli ayen ŋa ka kiri la, ate wa baga a kaasi ŋan baai ate tɛŋka demma a poli ayen ŋa ka ŋanta dek la. 29Ate dila nyiŋ nuru kan baga a kuulim Wen jigi ya. 30Wen a basi kama ate ti chim bunyi ale Yeezu Kirisita. Kirisita nyiŋ ate Wen a basi ate ti ta yam, ale yuarisi a magsi ale wadek, ale basi ate ti chim wa nuruba, ale da tuesi ti ti wabaata po a basi. 31Ku jam ŋmarisi kama ayen, <<Basi ate waai ale a kuulim la, a kuulim Naawen nyiŋ.>> (Jeremaya 9:24)
Chwazi Kounye ya:
1 Korinti 1: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation