Misimna 12
12
Miriam le Aaron in Moses Langneih
1Moses in Cush-te khat a zi dingin la-a, ama Cush zi hangin Miriam le Aaron in Moses a langgen uh hi. 2 Amaute in, "Moses bek tungtawnin TOPA in thu gen ahi hiam? Eite tungtawnin zong gen hi lo ahi hiam?" a ci uh hi. Hih pen TOPA in a za hi.#Pk 2:21; Ms 11:1
3 (Moses a lungnem mahmah mi khat hi a, leitungah om mi khempeuh sangin a lungnem zaw hi).
4 TOPA in Moses, Aaron le Miriam-te tungah, "No teng thum na vekun hong paikhia-in Kikhopna Puanbuk ah hong pai un," ci-in thakhatin a sam hi. Tua ciangin tua teng thum a paikhia uh hi. 5 Tua ciangin TOPA, meikhuampi in a kiasuk hi; amah Puanbuk lutna-ah dinga Aaron le Miriam a sam hi. Amaute gel mailam ah a kalsuan uh ciangin 6 amah in, "Ka thugen ngai un:
"Note lakah TOPA kamsang a om ciangin,
ama tungah mangmuhna tawh ka kilak a,#Pc 15:1; 46:2
mang sungah amah ka hopih hi.
7 Ahi hangin ka nasem Moses tua bang ahi kei hi;#Ph 105:26
amah ka inn sung khempeuh ah a muanhuai hi.#Heb 3:2,5
8 Amah tawh maitang kituahin ka hopih hi;
khiat lai ding hi loin a kitel sinsen hi;
amah in TOPA pianzia a mu hi.
Tua ahileh bang hangin ka nasempa Moses
langgen ding lau lo na hi uh hiam?" a ci hi.
9 Amaute tungah TOPA hehna kuanga amaute a nusia hi.
10 Puanbuk tungsan panin meii a kilakkhiat toh ciangin tua lai-ah Miriam dinga - phakin e vuk a bang hi. Tuanu lamah Aaron kihei-a amah a phak lam a mu hi; 11 Amah in Moses kiangah, "Ka topa aw, nong hehpihna-in haitat-a ka bawl uh mawhna hangin kote hong mawhsak kei in. 12 Amah a nu sul sung pana suakkhia alang kine beisa naungek bangin hisak kei in," a ci hi.#Tp 24:9
13 Tua ciangin Moses in TOPA kiangah, "Pasian aw, nong hehpihna-in tuanu damsak in," ci-in a kiko hi.
14 TOPA in Moses kiangah, "Tua numei a pa in a maitang a cil phih leh ni sagih sung a mai zum ding hi lo ahi hiam? Tuanu ni sagih sung giahphual pualamah tuam koih in; tua khit ciangin amah kipaipih kik thei ding hi," ci-in a dawng hi. 15 Tua ciangin giahphual pua-ah ni sagih sung Miriam kituam koiha, amah a kipaipih kik mateng meiipi a kikhin nai kei hi.#Sp 13:46
16 Tua khit ciangin mite in Hezeroth nusia-in Paran Sehnel-gam ah giahphual a sat uh hi.#Ms 11:35
Chwazi Kounye ya:
Misimna 12: ZIV
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Copyright 1994 Myanmar Center for World Mission