Jakòb rete pase nwit la kote l te ye a. Apre sa, nan sa l te gen avè l yo, li chwazi ladan yo pou fè Ezayi, frè l la, kado. Li pran desan (200) fenmèl kabrit ak ven bouk, desan fenmèl mouton ak ven belye, trant fenmèl chamo nouris ak tout ti chamo yo dèyè yo, karant manman bèf, dis towo, ven fenmèl bourik ak dis mal bourik. Li pran bèt yo, li mete chak kalite apa, li renmèt chak kalite bay yonn nan domestik li yo. Li di yo konsa:
— Pran devan mwen. Chak moun ap kite yon distans nan mitan bèt pa l yo ak bèt ki devan l yo.
Epi li pase premye a lòd sa a:
— Lè Ezayi, frè m lan, va kontre ou, l'ap mande ou: Kilès ki mèt ou? Kote ou prale? Pou ki moun bèt sa yo w'ap pouse devan ou konsa a? W'a reponn li: Se pou Jakòb, nèg pa ou la. Se yon kado li voye bay Ezayi, mèt mwen an. Li menm, li dèyè, l'ap vini.
Li pase dezyèm lan, twazyèm lan ak tout lòt moun ki t'ap mache dèyè bèt yo menm lòd la.
— Men sa nou gen pou n di Ezayi, lè nou kontre l. Se pou nou di: Wi, Jakòb, nèg pa ou la, ap vin dèyè nou pye pou pye.
Jakòb t'ap di nan kè l:
— Avèk tout kado m'ap voye devan m lan, m'ap fè kè l kontan. Konsa, lè n'a kontre, ou pa janm konnen, li ka fè pa m.
Moun yo pran devan ak kado yo. Men Jakòb rete dèyè, li pase nwit la kote l te ye a.
Bible App
Bible App for Kids
