Zeˬpaˬniˇ 3
3
Yeˬluˇsaˬlehˬ meuˬ-euˬ iˬ baˇ
1Aˬ cawˬ-ahˇ nawˬ dzaˬ kʼaˆ dzaˬ-awˇ,
yaw cawˆ mˇ-awˇ puiˬ mawꞈ-eu meuˬ,
yaw kʼaˆ-ehˇ ya noeˬ shaˬ tehꞈ-a.
2Dawˬ muiˬ tmˇ-eu maˬ gʼoˆ geuꞈ-ehˇ,
mehˬ gaˇ tsoˆ gaˇ maˬ naˇ haˬ-a.
Sahˬpaˬ Miˬyehˇ-ahˇ maˬ gʼoe-ehˇ,
Miˬyehˇ dawˬ peh maˬ nyiˬ laˇ-a.
3Aˬ yawꞈ-euˬ aˬ yuiꞈ aˬ tsu deuˬ,
aˇ laˬ jaˬ shiˇ loꞈ-ehˇ lmˬ-awˇ,
aˬ yawꞈ-euˬ yaˇ kʼaˬ daˇ-eu deuˬ,
shaˬyoeˬ mˬ maˬ bi jaˆ bya-eu,
uˬ ciꞈ kʼaˬ yehˇ-ahˇ duˇ-eu meh.
4Miˬyehˇ gʼaˇ duˬ ngehˬ dah-eu deuˬ,
saˇ jaˇ maˬ ziꞈ-eu deuˬ pyeuꞈ-awˇ,
aˬ yawꞈ-euˬ piˇ ma geuꞈ-eu deuˬ,
yaw muiˬ yaw shawˇ jeˬ laˆ jawꞈ-awˇ,
zahˇ dawˬ kʼoꞈ dawˬ laˆ cawˆ-eu meh.
5Kʼoeˇ gaˇ jawˇ-eu Sahˬpaˬ Miˬyehˇ,
maˬ tsaˬ maˬ dawˇ-eu maˬ mˇ-ehˇ,
yaw tsaˬ yawˬ dawˇ jeˬ mˇ luꞈ-awˇ,
aˬ yawꞈ-euˬ yaw tsaˬ yaw dawˇ jeˬ,
yawˬ shawˬ na luꞈ mehˬ nehˬ luˬ kʼawꞈ,
maˬ tsaˬ maˬ dawˇ-eu tsawˇ haˬ deuˬ,
shaꞈ dawˇ-eu myaˆ pyawˬ maˬ baw ni,
maˬ tsaˬ-eu jeˬ mˇ luꞈ-eu meh.
6Sahˬpaˬ Miˬyehˇ ehˇ-eu,
“Miˇ tsaˬ tsawˇ jeuˬ dawˬ tawˆ luꞈ-ahˇ,
ngaˇ laˆ cawˆ byoˆ nehˬ jiˇ-euˬ ma.
Meuˬ-euˬ gaˇ ma ciˬ cuˇ jaˆ-awˇ,
iˇ tsehˆ laˇ tsehˆ-eu maˬ jawˇ-a.
Meuˬ dawˬ tawˆ luꞈ ciˬ cuˇ jaˆ-awˇ,
tsawˇ haˬ tiˬ gʼaˬ-iˬ maˬ jawˇ-a.
7Ngaˬ-euˬ tsawˇ haˬ ngaˬ-ahˇ guˆ-awˇ,
mehˬ nehˬ tsoˆ nehˬ gaˇ naˇ haˬ-awˇ,
kʼaˇ mehˬ kʼaˇ tsoˆ dzeuˇ yaꞈ-euˬ jeˬ,
maˬ ngehˇ leˇ-aˇ lehˇ noeˬ-euˬ kʼawꞈ,
aˬ yawꞈ yaw oeˇ paˇ dehꞈ poˆ-awˇ,
bahˬ-eu muˆ-eu jeˬ mˇ-eu meh.”
8Sahˬpaˬ Miˬyehˇ ehˇ-eu,
“Aˇ yamˬ tiˬ kʼehˇ kʼehˬ dawˬ tawˬ siˬ.
Ngaˇ tuˇ laˇ-awˇ yaw lehˬ poˆ ngeh,
miˇ kʼahˬ tsawˇ jeuˬ kuˇ uiˬ jiˇ-awˇ,
ngaˬ-euˬ nui ma ngaˇ bi mawˇ ma.
Ngaˬ-euˬ nui pehˇ miˬ dzaˬ doꞈ ngeh,
miˇ tsaˬ tahˬ kʼawˇ puiˆ dzaˬ tehꞈ-a.
9“Kʼoeˇ naˇ, miˇ kʼahˬ tsawˇ jeuˬ dawˬ tawˆ,
nui ma paˇ laˇ ni ngaˇ jahˇ-awˇ,
miˬ yehˇ nui deuˬ-ahˇ maˬ gʼoe ni,
ngaˬ-ahˇ tehꞈ-ehˇ gʼoe-eu laꞈ kʼoeˇ,
ngaˬ-euˬ ehˇ dawˬ naˇ haˬ tehꞈ-a.
10Suˬdaˬ miˇ kʼahˬ gaˇ mahˇ kaˬ gaˇ,
cehˆ jawˇ-iˇ-euˬ tsawˇ haˬ deuˬ kʼawꞈ,
ngaˬ-ahˇ lawˇ laˇ shehˇ laˇ tehꞈ-a.
11Aˇ yamˬ kʼoeˇ yamˬ keuˆ laˇ ngeh jawˇ,
nui ma huiˬ-eu mahˇ-eu tsawˇ haˬ,
ngaˇ laˆ byoˆ jiˇ nehˬ-euˬ miˇ neh,
ngaˬ-euˬ gawˬ duˇ yaw shawˇ kʼoeˇ taˆ,
naw maꞈ iˬ baˇ maˬ paˇ mˇ-ehˇ,
ngaˬ-euˬ tsawˇ haˬ pyeuꞈ-eu naw maꞈ,
aˇ hu ngaˬ-ahˇ puiˬ-euˬ gaˇ kawˆ,
shaꞈ dawˇ poˆ-eu maˬ paˇ loˬ meh.
12Nui nahˬ nui yu ahˇ-eu laꞈ kʼoeˇ,
ngaˬ-ahˇ gʼoe-eu tsawˇ haˬ tiˬ deuˬ,
naw maꞈ nehˬ-ehˇ ngaˇ bi jawˇ ma.
13Dzeˇ-eu Iˇsaˬleˬlaˆ tsawˇ haˬ,
aˬ cawˬ-ahˇ yaw doeˇ maˬ jahˇ-ehˇ,
jaˬ myawꞈ mehˇ shuiˇ maˬ mˇ miˇ neh,
aˬ yawꞈ maꞈ baw le za le-awˇ,
guˆ kʼaˇ maˬ za ni dehꞈ tehꞈ-a.”
Laˬ kʼaˬ cehˇ-eu caˇ dawˬ
14Iˇsaˬleˬlaˆ tsawˇ haˬ deuˬ-oˇ,
laˬ kʼaˬ cehˇ dawˬ guˇ-awˇ caˇ-awˬ.
Nui ma gʼawˇ mawˇ laꞈ kʼoeˇ keuˆ ni,
Yeˬluˇsaˬlehˬ laˬ kʼaˬ cehˇ-awˬ.
15Nawˬ-ahˇ kʼehˬ nehˬ kʼaˆ nehˬ-eu jeˬ,
Sahˬpaˬ Miˬyehˇ yuˇ dzeh jiˇ-awˇ,
nawˬ-ahˇ muiˇ-eu deuˬ dawˬ tawˆ luꞈ,
aˬ yawꞈ teh dzeh byoˆ jiˇ-euˬ meh.
Iˇsaˬleˬlaˆ sahˬpaˬ pyeuꞈ-eu,
Sahˬpaˬ Miˬyehˇ nawˬ nehˇ jawˇ-awˇ,
nawˇ guˆ-eu jeˬ maˬ paˇ jaˆ meh.
16Yeˬluˇsaˬlehˬ meuˬ-ahˇ aˬ cawˬ,
heu loˇ ehˇ-eu tiˬ nah jaˆ meh.
“Ziˇoˬ meuˬ-oˇ, taˬ guˆ taˬ gaˆ,
nawˬ-euˬ aˬ laꞈ gʼaˬbyehˆ taˬbyehˆ.
17Sahˬpaˬ Miˬyehˇ nawˬ nehˇ jawˇ-awˇ,
gʼaˬ leˇ-eu baoˬ biꞈ laꞈ tehꞈ-a.
Aˬ yawꞈ nawˬ-ahˇ nui kʼahˇ shiˇ-awˇ,
nawˬ-ahˇ gaˬ-eu jeˬ baˬ da neh,
yaw shuiꞈ bi dehꞈ paˇ laꞈ tehꞈ-a.
Aˬ yawꞈ nawˬ-ahˇ nui ma tsaˬ-eu,
laˬ kʼaˬ cehˇ-eu caˇ dawˬ caˇ-awˇ,
18bawˬ-iˬ gʼeh luꞈ-eu tsawˇ haˬ loꞈ-ehˇ,
byawˬ gʼa-eu caˇ dawˬ caˇ tehꞈ-a.”
Sahˬpaˬ Miˬyehˇ ehˇ-eu,
“Nawˬ-ahˇ ciˬ tehˬ ciˬ pi taˬ-euˬ,
nawˬ-euˬ shaˬ zahˬ dawˬ tawˆ hawˇ-eu,
nawˇ daˬ ga-awˇ shaꞈ dawˇ-eu jeˬ
dawˬ tawˆ ngaˇ yuˇ dzeh jiˇ-euˬ ma.
19Nawˬ-ahˇ kʼehˬ-eu tsawˇ haˬ deuˬ-ahˇ,
ngaˇ paˇ kʼehˬ paˇ kʼaˆ poˆ nehˬ-awˇ,
kuiˇ kuˆ deuˬ ka kʼoꞈ doˆ laꞈ-awˇ,
teh byaˆ-euˬ deuˬ sheuˬ kʼoꞈ laꞈ-eu,
aˇ nah kʼoeˇ nah keuˆ le luꞈ meh.
Naw maꞈ ya shaꞈ dawˇ dui dui-euˬ,
daˬ ga-euˬ jeˬ poˆ laˆ laˆ-awˇ,
ciˬ huiˬ nehˬ-eu jeˬ bi oꞈ ma.
Miˇ tsaˬ zaˬ dawˬ tawˆ tuˇ laˇ-awˇ,
aˬ yawꞈ maꞈ-ahˇ ja ceuˬ tehꞈ-a.
20Nawˬ-euˬ tsawˇ haˬ gʼoꞈ uiˬ laˇ-awˇ,
miˇ tsaˬ kʼoeˇ taˆ tsawˇ myahˇ doˆ-awˇ,
bi baw bi za le-eu aˇ nah,
kʼoeˇ nah ngaˇ bi keuˆ le ma” lehˇ,
Sahˬpaˬ Miˬyehˇ ehˇ taˬ-euˬ meh.
Chwazi Kounye ya:
Zeˬpaˬniˇ 3: AHK
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Akha Bible Revision (Latin Script) © Thailand Bible Society, 2011.