Luˇkaꞈ 3
3
Iˇ cuꞈ shawˇ-eu Yoˇhaˬ dawˬ mehˬ mehˬ-euˬ
(Maꞈtehˬ 3.1-12; Maˬkuˆ 1.1-8; Yoˇhaˬ 1.19-28)
1Gehˇsaˬ Deˬbeˬliˇ dzoeˬ dzaˬ-eu tseˇ ngaˬ kʼoꞈ byah laˇ ngeh, Yuˇdaˆ miˇ kʼahˬ-ahˇ BoˬtiˆPiˇlaˆ uˆ lahˇ-awˇ, Gaˬliˬlehˇ miˇ kʼahˬ-ahˇ Heˬloˆ uˆ lahˇ-awˇ, Iˇtuˬlehˇ miˇ kʼahˬ hawˇ-eu Daˬlaˬgawˇniˇ miˇ kʼahˬ-ahˇ Heˬloˆ-euˬ aˇ doˆ Piˇliˇpuˆ uˆ lahˇ-awˇ, Aˬbiˇleˬ miˇ kʼahˬ-ahˇ Luˇsaˬniˇ uˆ lahˇ luꞈ-eu meh. 2Aˬnaˬ hawˇ-eu Gaˬyaˬpaˇ aˬ nyaꞈ-aˬ, piˇ ma yaw huiˬ geuꞈ luꞈ-eu meh. Kʼoeˇ ngeh, bawˇ tsahˬ bawˇ dahˇ-ahˇ Zaˬkaˬliˇ-euˬ aˬ li Yoˇhaˬ jawˇ gaˇ, Miˬyehˇ-euˬ dawˬ keuˆ le-euˬ meh. 3Kʼoeˇ naˇ, Yawˇdaˬ lawˇ baˬ gahˬ kaˬ doe ni Yoˇhaˬ iˇ-awˇ, Miˬyehˇ neh iˬ baˇ pyehˬ nehˬ-euˬ jeˬ-ahˇ za nya ni, iˬ baˇ noeˬ poˆ-awˇ iˇ cuꞈ shawˇ-eu gʼaˇ duˬ dawˬ mehˬ mehˬ-euˬ meh. 4Miˬyehˇ gʼaˇ duˬ ngehˬ dah-eu Iˇsaˬyaˇ-euˬ sahˬ boꞈ laꞈ kʼoeˇ heu loꞈ-ehˇ ehˇ taˬ-euˬ meh.
“Bawˇ tsahˬ bawˇ dahˇ laꞈ kʼoeˇ jawˇ-awˇ,
heu loꞈ-ehˇ tiˬ gʼaˬ guˇ luꞈ meh.
‘Sahˬpaˬ Miˬyehˇ oe-eu gʼaˇ duˬ,
gaˇ ma lehˬ hmˬ laˆ saˆ taˬ-awˬ.
Aˬ yawꞈ oe-eu gaˇ ma kʼoeˇ kahˇ,
dawˇ coe ni shaˇ dahˇ doˆ taˬ-awˬ.
5Gʼaˬ lawˬ dawˬ tawˆ luꞈ sheu dzm-awˇ,
gawˬ jawˬ dawˬ tawˆ luꞈ seuˆ di-awˬ.
Gaˇ gʼoꞈ gaˇ diˆ laˆ dawˇ jiˇ-awˇ,
duˬ kʼawꞈ duˬ nyaꞈ yaˆ di jiˇ-awˬ.
6Miˬyehˇ-euˬ ka kʼoꞈ-eu jeˬ-ahˇ,
tsawˇ haˬ zaˬ deuˬ ya mawˇ tehꞈ-a.”’
7Yoˇhaˬ neh iˇ cuꞈ bi shawˇ-eu gʼaˇ duˬ, tsawˇ haˬ aˇ maꞈ maꞈ ma Yoˇhaˬ jawˇ gaˇ oe doˆ-euˬ meh. Aˬ yawꞈ maꞈ-ahˇ aˬ yawꞈ ehˇ nehˬ-eu, “Aˇ lawˇ uiˇ naˆ deuˬ-oˇ, Miˬyehˇ neh bi keuˆ le-eu lehˇ lehˬ hmˬ taˬ-euˬ kʼehˬ-eu kʼaˆ-eu jeˬ-ahˇ cehˆ dzeuˇ nya tehꞈ-a lehˇ, naw maꞈ-ahˇ aˬ suˇ gʼaˬ neh mehˬ gahˇ nehˬ laꞈ taˬ. 8Naw maꞈ iˬ baˇ noeˬ poˆ gʼaˬ-euˬ ngaˇ lehˇ yaw muiˬ paˬ-ehˇ siˬ duˬ mawˇ duˬ laˇ ni dehꞈ-awˬ. Aˬbyaˬhaˬ-aˬ, nga maꞈ-euˬ aˬ da yaw dzahˇ ma lehˇ, naw maꞈ-euˬ nui ma laꞈ kʼoeˇ yawˬ haˇ yawˬ ha ehˇ ehˇ-ehˇ taˬ jawˇ. Ngaˇ naw maꞈ-ahˇ ehˇ nehˬ nyaˇ. Miˬyehˇ-aˬ, kʼaˬ lo heu deuˬ yuˇ-awˇ, Aˬbyaˬhaˬ-euˬ oeˬ paˬ oeˬ ma jahˇ doˆ nya meh. 9Nymˬ-mˇ mi naˆ-ehˇ, aˇ bawˇ duˬ ciˇ-ahˇ deuˆ haˬ baꞈ mawˬ taˬ-euˬ meh. Aˇ siˬ yaw muiˬ maˬ siˬ le-eu aˇ bawˇ yawˬ bawˇ na luꞈ bi tuˇ dzeh-awˇ, miˬ dzaˬ-ahˇ bi baꞈ puiˆ tehꞈ-a.”
10Tsawˇ haˬ kʼoeˇ deuˬ aˬ yawꞈ-ahˇ naˇ haˬ-eu, “Toˆ-ehˇ ngeuˇ naˇ, nga maꞈ aˬ joˆ-ehˇ ya jahˇ nmˇ.”
11Aˬ yawꞈ ehˇ-eu, “Pehˇ kʼahˬ nyiˬ kahˇ jaˆ-eu tsawˇ haˬ, maˬ jaˆ-eu tsawˇ haˬ-ahˇ tiˬ kahˇ biˇ nehˬ-awˇ, dzaˬ dzaˬ dawˇ dawˇ jaˆ-eu tsawˇ haˬ kʼawꞈ, maˬ jaˆ-eu deuˬ-ahˇ biˇ nehˬ-awˬ.”
12Kawˬ taꞈ-eu tsawˇ haˬ deuˬ kʼawꞈ, aˬ yawꞈ neh iˇ cuꞈ bi shawˇ nehˬ-eu lehˇ, aˬ yawꞈ jawˇ gaˇ oe-awˇ ehˇ-eu, “Saˬ laˬ-oˇ, nga maꞈ aˬ joˆ-ehˇ ya jahˇ ta.”
13Aˬ yawꞈ ehˇ-eu, “Naw maꞈ kawˬ taꞈ ngeh, taꞈ paˬ-ehˇ gʼeh-eu uˬ tahꞈ-ehˇ aˇ dzehˬ taˬ taꞈ.”
14Yehˇdeuˬ kʼawꞈ aˬ yawꞈ-ahˇ naˇ haˬ-eu, “Nga maꞈ toe. Aˬ joˆ-ehˇ ya jahˇ nmˇ.” Aˬ yawꞈ ehˇ-eu, “Aˬ cawˬ-ahˇ nawˬ dzaˬ kʼaˆ dzaˬ-eu jeˬ hawˇ-eu, laˆ dzaˬ gahˇ dzaˬ-eu jeˬ taˬ mˇ. Yawˬ ha za luꞈ-eu ba la aˇ poeˬ-ahˇ nui kʼahˇ shiˇ-awˬ.”
15Tsawˇ ha kʼoeˇ deuˬ-euˬ nui ma laꞈ kʼoeˇ noeˬ tmˬ-eu jeˬ ahˇ laˇ-awˇ, Yoˇhaˬ-ahˇ Ka li ngeuˇ law hawˇ maˬ siˬ lehˇ shaˇ noeˬ luꞈ-eu meh. 16Kʼoeˇ ngeh, aˬ yawꞈ maꞈ dawˬ tawˆ luꞈ-ahˇ Yoˇhaˬ heu loꞈ-ehˇ ehˇ kʼoꞈ nehˬ-euˬ meh. “Ngaˇ naw maꞈ-ahˇ iˇ cuꞈ laꞈ kʼoeˇ iˇ cuꞈ shawˇ nehˬ-eu ma. Ehˇ kʼawꞈ, ngaˇ naˆ maˬ tseˇ huiˬ dzehˬ mahˇ dzehˬ-eu gʼaˬ oe luꞈ meh. Ngaˇ-aˬ, aˬ yawꞈ-euˬ sehˬ nawˆ aˇ caˆ puiˇ nehˬ-eu tehꞈ-ehˇ kʼawꞈ, mˇ-eu maˬ geuˇ nya. Aˬ yawꞈ-aˬ, Muiˬ-eu shawˇ-eu Yaw sahˇ Miˬyehˇ laꞈ kʼoeˇ hawˇ-eu miˬ dzaˬ laꞈ kʼoeˇ, naw maꞈ-ahˇ iˇ cuꞈ shawˇ nehˬ laꞈ tehꞈ-a. 17Cehˇ baw shawˇ-awˇ, aˬ yawꞈ-euˬ cehˇ jiˇ laꞈ kʼoeˇ pi ahˇ taˬ-eu gʼaˇ duˬ, aˬ yawꞈ-euˬ aˬ laꞈ-ahˇ baw seu tuˆ tehˬ taˬ-euˬ meh. Ehˇ kʼawꞈ, cehˇ kʼawꞈ hawˇ-eu myaˆ pawꞈ deuˬ-ahˇ-aˬ,tiˬ jawˇ-iˬ maˬ miˆ-iˇ nya-eu miˬ dzaˬ laꞈ kʼoeˇ jehˆ puiˆ tehꞈ-a.”
18Yoˇhaˬ-aˬ, tsawˇ haˬ kʼoeˇ deuˬ-ahˇ gaˇ kawˆ gʼawˬ mya jeˬ ja mehˬ-eu laꞈ kʼoeˇ gʼaˬ biꞈ-awˇ, Laˬ kʼaˬ cehˇ-eu Guiˬ lahˬ dawˬ mehˬ nehˬ-euˬ meh. 19Ehˇ kʼawꞈ, sahˬ paˬ Heˬloˆ-aˬ, aˬ yawꞈ-euˬ aˇ doˆ-euˬ miˬ zaˬ pyeuꞈ-eu Heˬlawˇdiˇ-ahˇ sheuˬ-euˬ uˬ taꞈ, yaw haiˬ gʼawˬ mya jeˬ mˇ-euˬ miˇ neh, lehˬ dui dui meh lehˇ Yoˇhaˬ ehˇ-euˬ meh. 20Kʼoeˇ ngeh jawˇ, Heˬloˆ-aˬ, Yoˇhaˬ-ahˇ tawˬ-ahˇ nyehꞈ uˇ nehˬ-eu laꞈ kʼoeˇ, kʼoeˇ naˆ maˬ tseˇ haiˬ-eu jeˬ mˇ mehˬ nehˬ-euˬ meh.
Yoˇnaˬ neh Yeˬsuˇ-ahˇ iˇ cuꞈ shawˇ nehˬ-euˬ
(Maꞈtehˬ 3.13-17; Maˬkuˆ 1.9-11)
21Tsawˇ haˬ kʼoeˇ deuˬ dawˬ tawˆ luꞈ iˇ cuꞈ shawˇ gʼaˬ ngeh, Yeˬsuˇ iˇ cuꞈ shawˇ-euˬ meh. Aˬ yawꞈ guiˬ lahˬ shaˇ luꞈ ngeh, mˬ pah le-awˇ, 22Muiˬ-eu shawˇ-eu Yaw sahˇ Miˬyehˇ kʼaˬ kʼoeˬ loꞈ-ehˇ aˬ yawꞈ-euˬ kʼoeˇ taˆ zaꞈ le-euˬ meh. Mˬ paw neh teˇ saˇ mahˇ doˆ le-awˇ ehˇ-eu, “Nawˇ-aˬ, ngaˇ zawˇ gaˬ-eu ngaˬ-euˬ Zaˬmaˇ ma. Nawˬ-ahˇ ngaˇnui kʼahˇ shiˇ dui dui ma.”
Yeˬsuˇ-euˬ tsuiꞈ
(Maꞈtehˬ 11.1-17)
23Yeˬsuˇ gaˇ mˇ dahˬ beh ngeh, smˬ tseˇ kʼoꞈ ehˇ gʼaˬ ni byah laˇ-euˬ meh. Aˬ yawꞈ-euˬ aˬ da-aˬ, Iˇliˇ-euˬ aˬ li Yoˇsehˆ meh lehˇ aˬ cawˬ sawˇ taˬ-euˬ meh. Yeˬsuˇ-euˬ tsuiꞈ daˆ gui leꞈ ngeh, heu loꞈ-ehˇ meh. Yeˬsuˇ, Yoˇsehˆ, Iˇliˇ, 24Maˬdaˆ, Leˬbiˇ, Meˬlaˬkiˇ, Yaˬnaˆ, Yoˇsehˆ, 25Maˬdaˬtiˇ, Aˬmo, Naˬhmˬ, Iˇsaˬliˇ, Naˬgehˇ, 26Mawˇdaˆ, Maˬdaˬtiˇ, Seˬmiˇ, Yawˇsehˆ, Yoˇdaˆ, 27Yawˇnaˬ, Leˬsaˇ, Zeˬluˇbaˬbeˬlaˇ, Shaˬtiˇlaˆ, Neˬliˇ, 28Meˬlaˬkiˇ, Aˇdiˇ, Gawˇsaˬ, Eˇlaˬmaˬdaˬ, Iˇlehˆ, 29Yawˇshuˆ, Eˇliˇzaˬ, Yoˇlamˬ, Maˬdaˆ, Leˬbiˇ, 30Suˇmoˬ, Yuˇdaˆ, Yoˇsehˆ, Yoˇnamˬ, Eˇliˇkmˬ, 31Meˬleˬ, Mehˇnaˬ, Maˬdaˬdaˇ, Naˬdaˬ, Daˬbiˇ, 32Yeˬshehˇ, Awˇbehˆ, Bawˇza, Saˬlaˬmoˬ#3.32 ʼSaˬlaˬmoˬʼ lehˇ ehˇ-eu tsawˇ myahˇ heu myahˇ-ahˇ, Jaˇ liˬ tiˬ paˆ na deuˬ laꞈ kʼoeˇ ʼSaˬlaˬʼ lehˇ kuˇ taˬ-euˬ meh. , Naˬshoˬ, 33Aˬmiˇnaˬdehˇ, Aˬdaˬmiˬ, Aˬlaˬniˬ, Heˬzaˬloˬ, Paˬyehˆ, Yuˇdaˆ, 34Yaˬkoˆ, Iˇtsaˆ, Aˬbyaˬhaˬ, Teˬlah, Naˬkawˬ, 35Seˬlawˇ, Yeˬuˇ, Pehˇlehˆ, Eˬbaˬ, Sheˬlahˬ, 36Gaˬiˇnaˬ, Aˬpaˬtsaˆ, Sheˬmaˇ, Noˇaˬ, Laˬmehˇ, 37Maˬtuˇseˬlah, Iˇnawˆ, Jaˬyehˆ, Maˬhaˬleˬliˆ, Geˇnaˬ, 38Iˇnoˆ, Seˬtaˆ, Aˬdaˬ, Miˬyehˇ.
Chwazi Kounye ya:
Luˇkaꞈ 3: AHK
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Akha Bible Revision (Latin Script) © Thailand Bible Society, 2011.