1 Gawˇliˬtu 7
7
Sheuˬ dahˬ dzaˬ-eu gaˇ kawˆ naˇ haˬ-eu
1Nymˬ-mˇ jawˇ poˆ-aˬ, naw maꞈ neh ngaˬ-ahˇ sahˬ boꞈ boꞈ ahˇ laꞈ-awˇ naˇ haˬ-euˬ gaˇ kawˆ kʼoeˇ ehˇ ma.
Kʼaˬ dzeˇ zaˬ-aˬ, miˬ zaˬ maˬ sheuˬ ni jawˇ nya naˇ muiˬ meh. 2Ehˇ kʼawꞈ, aˬ cawˬ nehˬ-ehˇ joe ni muˇ juˇ juˇ-eu jeˬ jaˆ myaˬ-eu miˇ neh, kʼaˬ dzeˇ zaˬ yawˬ gʼaˬ na luꞈ miˬ zaˬ baw-eu tsaˬ-awˇ, zaˬ miˬ zaˬ yawˬ gʼaˬ na luꞈ kʼawꞈ kʼaˬ dzeˇ zaˬ baw-eu tsaˬ meh. 3Kʼaˬ dzeˇ zaˬ gʼaˬ yawˬ ha-euˬ gʼawˇ mawˇ miˬ zaˬ gʼaˬ-ahˇ biꞈ-awˇ, miˬ zaˬ gʼaˬ kʼawꞈ yawˬ ha-euˬ gʼawˇ mawˇ kʼaˬ dzeˇ zaˬ gʼaˬ-ahˇ biꞈ-eu laꞈ kʼoeˇ, tiˬ gʼaˬ tiˇ gʼaˬ nui kʼahˇ mˇ byah-eu tsaˬ meh. 4Miˬ zaˬ gʼaˬ yawˬ ha-euˬ gʼawˇ mawˇ-ahˇ yawˬ haˇ yawˬ ha maˬ uˆ lahˇ ni, kʼaˬ dzeˇ zaˬ gʼaˬ neh ya bi uˆ lahˇ meh. Kʼoeˇ gaˇ duˇ ni, kʼaˬ dzeˇ zaˬ gʼaˬ kʼawꞈ, yawˬ ha-euˬ gʼawˇ mawˇ-ahˇ yawˬ haˇ yawˬ ha maˬ uˆ lahˇ ni, miˬ zaˬ gʼaˬ neh ya bi uˆ lahˇ meh. 5Tiˬ kʼehˬ tiˬ yamˬ laꞈ kʼoeˇ maˬ yuꞈ taꞈ ni guiˬ lahˬ shaˇ-eu gʼaˇ duˬ nyiˬ gʼaˬ luꞈ nui ma tsaˬ-awˇ ehˇ tsehˆ taˬ-euˬ aˇ yamˬ laꞈ kʼoeˇ maˬ ngeuˇ naˇ, tiˬ gʼaˬ tiˇ gʼaˬ maˬ yuꞈ taꞈ lehˇ ehˇ-eu maˬ tsaˬ-a. Aˇ yamˬ kʼoeˇ dzeuˇ naˇ, tiˬ kawˆ loꞈ-ehˇ paˇ yuꞈ paˇ jawˇ taꞈ-awˬ. Kʼoeˇ loꞈ-ehˇ maˬ jahˇ naˇ, naw maꞈ yawˬ ha-euˬ nui ma-ahˇ maˬ gʼaˬ leˇ-eu miˇ neh, nehꞈ Saˬdaˬ muˇ juˇ juˇ gaˇ maˬ dzeuˇ-iˇ nya-a.
6Ngaˇ heu loꞈ-ehˇ ehˇ-eu heu-aˬ, ngaˇ kʼaˇ ehˇ-eu loꞈ-ehˇ maˬ geuꞈ-ehˇ maˬ gʼeh nya-a lehˇ dawˬ biꞈ-eu jeˬ-ehˇ ehˇ-eu maˬ ngeuˇ. Ngaˬ neh ehˇ-euˬ loꞈ-ehˇ mˇ-eu gʼaˇ duˬ aˬ kawˬ-aˬ biꞈ-eu jeˬ-ehˇ ehˇ-eu ma. 7Maˇ maˇ ni ya ehˇ naˇ, naw maꞈ dawˬ tawˆ luꞈ ngaˬ loꞈ-ehˇ bi dehꞈ mawꞈ miˇ-a. Ehˇ kʼawꞈ, tsawˇ haˬ yawˬ gʼaˬ na luꞈ-ahˇ aˬ cawˬ-ahˇ biꞈ-euˬ gaˇ maˬ duˇ-eu laꞈ sawˬ Miˬyehˇ biꞈ taˬ-awˇ, tiˬ gʼaˬ tiˬ jeˬ za taˬ-euˬ meh.
8Miˬ zaˬ maˬ sheuˬ-eu deuˬ hawˇ-eu miˬ coeˬ miˬ ma deuˬ-ahˇ, ngaˇ loꞈ-ehˇ cawˬ maˬ shaˇ baw ni jawˇ nya naˇ muiˬ meh lehˇ ehˇ mawꞈ miˇ-a. 9Ehˇ kʼawꞈ, yawˬ ha-euˬ nui ma-ahˇ maˬ gʼaˬ leˇ naˇ, cawˬ shaˇ baw-eu tsaˬ dzehˬ tehꞈ-a. Aˬ jeˬ miˇ neh ehˇ naˇ, yuꞈ taꞈ jawˇ taꞈ mawꞈ-eu nui kʼahˇ-ahˇ dzahˬ tehˬ taˬ-eu naˆ maˬ tseˇ, cawˬ shaˇ baw-awˇ jawˇ-eu muiˬ dzehˬ meh.
10Sheuˬ dahˬ dzaˬ-euˬ miˬ zaˬ yo zaˬ-ahˇ ngaˇ heu loꞈ-ehˇ dawˬ biꞈ-eu ma. Ngaˬ-euˬ dawˬ maˬ ngeuˇ. Sahˬpaˬ Miˬyehˇ-euˬ dawˬ meh. Miˬ zaˬ tiˬ gʼaˬ yawˬ ha-euˬ kʼaˬ dzeˇ zaˬ-ahˇ maˬ ya gʼawˬ-a. 11Maˬ gʼawˬ-ehˇ maˬ juˬ naˇ, yawˬ zahˇ yawˬ maˬ iˇ paˇ ni tiˬ gʼaˬ tehꞈ-ehˇ ya jawˇ meh. Maˬ ngeuˇ naˇ, yawˬ ha-euˬ kʼaˬ dzeˇ zaˬ nehˬ-ehˇ laˆ tsaˬ laˆ tsahˇ-awˇ paˇ jawˇ kʼoꞈ-eu tsaˬ meh. Kʼaˬ dzeˇ zaˬ deuˬ kʼawꞈ, miˬ zaˬ maˬ ya kʼoꞈ-a lehˇ ngaˇ ehˇ-eu ma.
12Nui deuˬ-ahˇ ngaˇ heu loꞈ-ehˇ ehˇ-eu ma. Sahˬpaˬ Miˬyehˇ-euˬ dawˬ maˬ ngeuˇ. Ngaˬ-euˬ dawˬ ma. Ka li zaˬ tiˬ gʼaˬ Ka li zaˬ maˬ ngeuˇ-eu miˬ zaˬ sheuˬ-awˇ, miˬ zaˬ kʼoeˇ gʼaˬ aˬ yawꞈ nehˬ-ehˇ dehꞈ daˆ leꞈ mawꞈ-eu nui ma ahˇ naˇ, maˬ ya kʼoꞈ nehˬ-a. 13Ka li zaˬ tiˬ gʼaˬ, Ka li zaˬ maˬ ngeuˇ-eu kʼaˬ dzeˇ zaˬ-ahˇ dahˬ dzaˬ-iˇ-awˇ, kʼaˬ dzeˇ zaˬ kʼoeˇ gʼaˬ aˬ yawꞈ nehˬ-ehˇ dehꞈ daˆ leꞈ mawꞈ-eu nui ma ahˇ naˇ, maˬ ya kʼoꞈ nehˬ-a. 14Aˬ jeˬ miˇ neh ehˇ naˇ, Ka li-ahˇ maˬ jah-eu kʼaˬ dzeˇ zaˬ kʼoeˇ gʼaˬ-aˬ, aˬ yawꞈ-euˬ miˬ zaˬ-ahˇ taꞈ leˇ-eu laꞈ kʼoeˇ, Miˬyehˇ ha geuꞈ nya-eu tsawˇ haˬ pyeuꞈ laˇ-euˬ meh. Ka li-ahˇ maˬ jah-eu miˬ zaˬ kʼoeˇ gʼaˬ kʼawꞈ, Ka li-ahˇ jah-eu aˬ yawꞈ-euˬ kʼaˬ dzeˇ zaˬ-ahˇ taꞈ leˇ-euˬ laꞈ kʼoeˇ, Miˬyehˇ ha geuꞈ nya-eu tsawˇ haˬ pyeuꞈ laˇ-euˬ meh. Kʼoeˇ loꞈ-ehˇ maˬ jahˇ naˇ, aˬ yawꞈ maꞈ-euˬ zaˬ deuˬ lawˇ ciꞈ zaˬ-euˬ zaˬ deuˬ-ahˇ duˇ tehꞈ-a. Kʼoeˇ loꞈ-ehˇ jahˇ naˇ, zaˬ kʼoeˇ deuˬ Miˬyehˇ ha geuꞈ nya-eu tsawˇ haˬ pyeuꞈ laˇ tehꞈ-a. 15Ehˇ kʼawꞈ, miˬ zaˬ yo zaˬ yaw kaˬ Ka li-ahˇ maˬ jah-eu gʼaˬ gʼawˬ mawꞈ-eu nui ma ahˇ naˇ, gʼawˬ luꞈ-uˇ. Kʼoeˇ loꞈ-ehˇ pyeuꞈ laˇ ngeh, miˬ zaˬ yo zaˬ laꞈ kʼoeˇ Ka li zaˬ pyeuꞈ-eu gʼaˬ-aˬ, paꞈ tawꞈ taˬ-euˬ jeˬ-ahˇ ya buˬ ya law-iˇ-euˬ gaˇ duˇ-eu meh. Naw maꞈ nui saˇ oꞈ-eu laꞈ kʼoeˇ ya dehꞈ ni Miˬyehˇ kuˇ-euˬ gaˇ duˇ-eu meh. 16Ka li zaˬ pyeuꞈ-eu aˬ cawˬ-euˬ miˬ zaˬ deuˬ-oˇ, nawˬ-euˬ kʼaˬ dzeˇ zaˬ-ahˇ nawˇ maˬ ka kʼoꞈ nya-aˇ lehˇ ehˇ nya te loˇ. Ka li zaˬ pyeuꞈ-eu aˬ cawˬ-euˬ kʼaˬ dzeˇ zaˬ deuˬ-oˇ, nawˬ-euˬ miˬ zaˬ-ahˇ nawˇ maˬ ka kʼoꞈ nya-aˇ lehˇ ehˇ nya te loˇ.
Miˬyehˇ neh kuˇ doˆ-euˬ tsawˇ haˬ loꞈ-ehˇ dehꞈ-awˬ
17Yawˬ gʼaˬ na luꞈ Miˬyehˇ neh kʼaˇ biˇ oꞈ nehˬ-euˬ loꞈ-ehˇ dehꞈ-awˇ, Miˬyehˇ neh bi kuˇ ngeh kʼaˇ pyeuꞈ luꞈ-eu loꞈ-ehˇ dehꞈ gʼeh-eu tsaˬ meh. 18Baˆ kʼoˆ mehˬ dzaˬ yehˬ-euˬ tsawˇ haˬ tiˬ gʼaˬ Miˬyehˇ neh kuˇ-euˬ jeˬ-ahˇ ha geuꞈ gʼaˬ naˇ, baˆ kʼoˆ mehˬ dzaˬ yehˬ gʼaˬ-euˬ kʼoeˇ-ahˇ laˆ byoˆ-eu maˬ tsaˬ-a. Baˆ kʼoˆ mehˬ dzaˬ maˬ yehˬ-euˬ tsawˇ haˬ tiˬ gʼaˬ Miˬyehˇ neh kuˇ-euˬ jeˬ-ahˇ ha geuꞈ gʼaˬ naˇ, baˆ kʼoˆ mehˬ dzaˬ paˇ yehˬ-eu maˬ tsaˬ-a. 19Aˬ jeˬ miˇ neh ehˇ naˇ, baˆ kʼoˆ mehˬ dzaˬ yehˬ-euˬ maˬ ehˇ, maˬ yehˬ-euˬ maˬ ehˇ, beu gaˇ duˬ maˬ jaˆ-a. Miˬyehˇ-euˬ zahˇ dawˬ kʼoꞈ dawˬ-ahˇ naˇ haˬ geuꞈ-eu tehꞈ-ehˇ gaˇ dahˇ tsoeˬ-eu meh. 20Yawˬ gʼaˬ na luꞈ Miˬyehˇ neh kuˇ-euˬ jeˬ-ahˇ ha geuꞈ ngeh kʼaˇ pyeuꞈ luꞈ-eu loꞈ-ehˇ dehꞈ gʼeh-eu tsaˬ meh. 21Miˬyehˇ nawˬ-ahˇ kuˇ ngeh, nawˇ aˬ cawˬ-euˬ zaˬ kʼaˆ geuꞈ luꞈ te loˇ. Tiˬ jeˬ-iˬ maˬ ngeuˇ-aˇ. Ehˇ kʼawꞈ, nawˇ aˬ cawˬ-euˬ zaˬ kʼaˆ maˬ paˇ ya geuꞈ ni buˬ-iˇ-eu a kawˬ-aˬ za nya naˇ, muiˬ tehꞈ-a. 22Aˬ jeˬ miˇ neh ehˇ naˇ, Sahˬpaˬ Miˬyehˇ neh kuˇ-euˬ zaˬ kʼaˆ tiˬ gʼaˬ-aˬ, Sahˬpaˬ Miˬyehˇ-euˬ buˬ-iˇ-euˬ tsawˇ haˬ pyeuꞈ-eu meh. Kʼoeˇ loꞈ-ehˇ duˇ ni, Ka li neh bi kuˇ-euˬ buˬ-iˇ-euˬ tsawˇ haˬ tiˬ gʼaˬ-aˬ, Ka liˬ-euˬ zaˬ kʼaˆ pyeuꞈ-eu meh. 23Miˬyehˇ neh naw maꞈ-ahˇ aˇ poeˬ biꞈ-awˇ zeuˇ tsehˆ gʼaˬ-euˬ meh. Kʼoeˇ miˇ neh, tsawˇ haˬ zaˬ-euˬ zaˬ kʼaˆ taˬ paˇ bi pyeuꞈ. 24Aˬ yuiꞈ aˬ nyiˇ Ka li zaˬ deuˬ-oˇ, yawˬ gʼaˬ na luꞈ Miˬyehˇ kuˇ ngeh kʼaˇ pyeuꞈ luꞈ-eu loꞈ-ehˇ Miˬyehˇ mehˬ shi dehꞈ gʼeh-awˬ.
Miˬ zaˬ maˬ sheuˬ-euˬ deuˬ hawˇ-eu miˬ coeˬ miˬ ma deuˬ gaˇ kawˆ naˇ haˬ-eu
25Naw maꞈ neh ngaˬ-ahˇ boꞈ naˇ haˬ laꞈ-euˬ smˇ miˇ maˬ iˇ ni jawˇ-eu zaˬ miˬ zaˬ deuˬ-euˬ gaˇ kawˆ-ahˇ taꞈ leˇ-awˇ, Sahˬpaˬ Miˬyehˇ-euˬ dawˬ ngaˇ maˬ za-aˬ. Ehˇ kʼawꞈ, Miˬyehˇ guiˬ lahˬ baˬ da neh jah coeˇ paˬ-ehˇ gʼeh-eu ngaˬ-euˬ nui noeˬ naw maꞈ-ahˇ biꞈ-eu ma.
26Nymˬ-mˇ keuˆ le luꞈ-eu shaˬ-eu zahˬ-eu aˇ yamˬ heu-ahˇ shaˇ sawˇ haw naˇ, tsawˇ haˬ aˬ geu gʼaˬ maˬ kaˬ yawˬ ha kʼaˇ pyeuꞈ luꞈ-eu loꞈ-ehˇ dehꞈ gʼeh-eu tsaˬ meh lehˇ ngaˇ noeˬ-eu ma. 27Miˬ zaˬ sheuˬ-euˬ ngeuˇ naˇ, byehˇ-eu taˬ paˇ leh jeh. Maˬ sheuˬ-euˬ ngeuˇ naˇ kʼawꞈ, sheuˬ-eu taˬ paˇ leh jeh. 28Nawˇ miˬ zaˬ sheuˬ naˇ, sheuˬ-euˬ kʼoeˇ iˬ baˇ mˇ-eu maˬ ngeuˇ-a. Kʼaˬ dzeˇ zaˬ maˬ baw-eu zaˬ miˬ zaˬ tiˬ gʼaˬ smˇ miˇ iˇ naˇ kʼawꞈ, smˇ miˇ iˇ-euˬ kʼoeˇ iˬ baˇ mˇ-eu maˬ ngeuˇ-a. Ehˇ kʼawꞈ, gʼeh nya naˇ, sheuˬ dahˬ dzaˬ-euˬ tsawˇ haˬ deuˬ miˇ tsaˬ heu kʼoeˇ taˆ ya tahˬ puˬ-eu shaˬ zahˬ kʼoeˇ deuˬ naw maꞈ kʼoeˇ taˆ maˬ bi keuˆ le mawꞈ nya.
29Aˬ yuiꞈ aˬ nyiˇ Ka li zaˬ deuˬ-oˇ, ngaˇ ehˇ mawꞈ-eu-aˬ, heu loꞈ-ehˇ ma. Aˇ saˬ saˬ-eu aˇ yamˬ keuˆ le-eu gʼawˬ myahˇ ni maˬ paˇ ca meh. Iˬ nah taꞈ naˇ, miˬ zaˬ baw-eu tsawˇ haˬ deuˬ kʼawꞈ, miˬ zaˬ maˬ baw-eu tsawˇ haˬ deuˬ loꞈ-ehˇ jawˇ-awˬ. 30Tsawˇ ngoeˇ ngoeˇ luꞈ-eu tsawˇ haˬ deuˬ kʼawꞈ, maˬ noeˬ shaˬ-eu loꞈ-ehˇ jawˇ-awˬ. Uiˇ luꞈ-eu tsawˇ haˬ deuˬ kʼawꞈ, laˬ kʼaˬ maˬ cehˇ-eu loꞈ-ehˇ jawˇ-awˬ. 31Miˇ tsaˬ shiˬ shaˬ jiˇ-ahˇ taꞈ leˇ-eu gaˇ mˇ-eu deuˬ kʼawꞈ, tiˬ byah tiˬ loꞈ maˬ mˇ ni jawˇ-awˬ. Aˬ jeˬ miˇ neh ehˇ naˇ, miˇ tsaˬ heu-euˬ seuˆ dzeuꞈ aˇ gʼehˇ byoˆ le luꞈ meh.
32Naw maꞈ-euˬ nui ma laꞈ kʼoeˇ kʼahˬ lahˇ-eu jeˬ maˬ bi ahˇ mawꞈ nya. Miˬ zaˬ maˬ baw-eu tsawˇ haˬ-aˬ, Sahˬpaˬ Miˬyehˇ-euˬ gaˇ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, Sahˬpaˬ Miˬyehˇ nui kʼahˇ shiˇ-eu jeˬ-ahˇ aˬ yawꞈ mˇ mawꞈ-eu meh. 33Ehˇ kʼawꞈ, miˬ zaˬ baw-eu tsawˇ haˬ-aˬ, miˇ tsaˬ shiˬ shaˬ jiˇ gaˇ kawˆ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, aˬ yawꞈ-euˬ miˬ zaˬ nui kʼahˇ shiˇ-eu jeˬ-ahˇ aˬ yawꞈ mˇ mawꞈ-eu meh. 34Kʼoeˇ miˇ neh, nui noeˬ nyiˬ jeˬ neh bi gʼeu taw taˬ-euˬ gaˇ duˇ-eu meh. Kʼaˬ dzeˇ zaˬ maˬ baw-eu zaˬ miˬ zaˬ, maˬ ngeuˇ naˇ zaˬ miˬ aˬ buˇ zaˬ guˬ-aˬ, Sahˬpaˬ Miˬyehˇ-euˬ gaˇ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, aˬ yawꞈ nyiˬ jeˬ maˬ noeˬ ni, nui ma gʼawˇ mawˇ dawˬ tawˆ luꞈ Miˬyehˇ-ahˇ a nehˬ mawꞈ-eu meh. Ehˇ kʼawꞈ, kʼaˬ dzeˇ zaˬ baw-eu zaˬ miˬ zaˬ-aˬ, miˇ tsaˬ shiˬ shaˬ jiˇ gaˇ kawˆ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, aˬ yawꞈ-euˬ kʼaˬ dzeˇ zaˬ nui kʼahˇ shiˇ-eu jeˬ-ahˇ aˬ yawꞈ mˇ mawꞈ-eu meh.
35Naw maꞈ gʼaˇ duˬ gaˇ dahˇ tsoeˬ ni ngaˇ heu loꞈ-ehˇ ehˇ-eu ma. Naw maꞈ-ahˇ kaˬ naˬ-eu maˬ ngeuˇ. Naw maꞈ-ahˇ tsaˬ-eu muiˬ-eu jeˬ bi mˇ mawꞈ-awˇ, nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ-euˬ gaˇ gʼaˇ duˬ tiˬ byah tiˬ loꞈ a nehˬ nya ni ehˇ-eu jeˬ pyeuꞈ-eu ma.
36Tsawˇ haˬ nyiˬ gʼaˬ ngehˬ cawˬ tsehˆ gʼaˬ taˬ-euˬ kʼawꞈ, maˬ sheuˬ dahˬ dzaˬ ni byehˇ-euˬ ehˇ-awˬ. Kʼaˬ dzeˇ zaˬ gʼaˬ zaˬ miˬ zaˬ kʼoeˇ gʼaˬ-ahˇ maˬ sheuˬ nehˬ-euˬ gaˇ noeˬ kʼahˇ mahˇ-eu uˬ taꞈ, aˬ yawꞈ-euˬ nui loˆ-ahˇ aˬ yawꞈ maˬ gʼaˬ leˇ-ehˇ sheuˬ mawꞈ-eu nui ma ahˇ naˇ, sheuˬ-eu tsaˬ tehꞈ-a. Kʼoeˇ loꞈ-ehˇ sheuˬ-euˬ kʼoeˇ-aˬ, iˬ baˇ mˇ-eu maˬ ngeuˇ-a. 37Ehˇ kʼawꞈ, kʼaˬ dzeˇ zaˬ gʼaˬ aˬ cawˬ neh maˬ kaˬ naˬ nehˬ-euˬ gaˇ, nui ma ziꞈ dah ni noeˬ tsehˆ-eu uˬ taꞈ, yawˬ ha-euˬ nui loˆ-ahˇ yawˬ ha gʼaˬ leˇ-eu laꞈ kʼoeˇ, zaˬ miˬ zaˬ kʼoeˇ gʼaˬ-ahˇ maˬ sheuˬ ma lehˇ ngeuˇ naˇ, aˬ yawꞈ jahˇ-eu kʼoeˇ tsaˬ meh. 38Kʼoeˇ miˇ neh, miˬ zaˬ sheuˬ-eu tsawˇ haˬ-aˬ, yaw muiˬ jeˬ mˇ gaˇ duˇ-eu meh. Ehˇ kʼawꞈ, miˬ zaˬ maˬ sheuˬ-eu tsawˇ haˬ-aˬ, kʼoeˇ naˆ maˬ tseˇ muiˬ-eu jeˬ mˇ gaˇ duˇ-eu meh.
39Kʼaˬ dzeˇ zaˬ baw-eu zaˬ miˬ zaˬ-aˬ, yawˬ ha-euˬ kʼaˬ dzeˇ zaˬ kʼaˇ dehꞈ kʼoeˇ keuˆ ni yawˬ zahˇ yawˬ maˬ ya iˇ paˇ-a. Kʼaˬ dzeˇ zaˬ shiˇ dzeuˇ naˇ, yawˬ ha kʼaˇ dahˬ dzaˬ-iˇ mawꞈ gaˇ dahˬ dzaˬ-iˇ nya meh. Ehˇ kʼawꞈ, Ka li zaˬ-ahˇ tehꞈ-ehˇ ya dahˬ dzaˬ-iˇ meh. 40Ngaˬ neh noeˬ-euˬ loꞈ-ehˇ ya ehˇ naˇ, maˬ dahˬ dzaˬ-iˇ ni jawˇ-eu-aˬ, aˬ yawꞈ gʼaˇ duˬ zaˬ dzehˬ meh. Ngaˬ neh noeˬ-euˬ heu Miˬyehˇ-euˬ Yaw sahˇ-ahˇ tsaˬ ma lehˇ ngaˇ jah-eu ma.
Chwazi Kounye ya:
1 Gawˇliˬtu 7: AHK
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Akha Bible Revision (Latin Script) © Thailand Bible Society, 2011.