2 MUSA Bindu 20
Bindu 20
Patik na sampulu na badia i 1-17.
Biar ni bangso i 18-21.
Patik taringot tu langgatan 22-26.
I. 1Dung i diaturhon Debata ma sude angka hata on, ninna ma: #5Mus 5:6-22; Mat 5:17 ud. 2Ahu do Jahowa Debatam, na paruarhon ho sian tano Misir, sian bagas parhatobananmu. 3Ndang jadi marangkup Ahu adong Debatam. #5Mus 6:4-5; 1Kor 8:6 4Ndang jadi bahenonmu di ho ganaganaan, manang sumansuman dia na di banua ginjang nang di tano on, ro di na di bagasan aek na di toru ni tano. #3Mus 26:1; 5Mus 27:15; Ps 97:7; Jes 40:18 ud.; Rom 1:23 5Ndang jadi ho marsomba tu nasida, manang oloanmu nasida, ai Ahu do Jahowa Debatam, Debata parrimas, na mangaluluhon hajahaton ni amaama tu angka anakna ro di sundut patoluhon dohot paopathon, angka na sogo roha di Ahu. #2Mus 34:7; Jer 31:29-30; Hes 18:2-3, 20 6Alai asi do rohangku di angka na marriburibu, angka na mangkaholongi Ahu, angka na mangaradoti angka patikku. 7Ndang jadi dohononmu goar ni Jahowa Debatam, anggo sian neang ni roha, ai sai na hona toru ni Jahowa do manang ise na mandok goarna sian neang ni rohana. #3Mus 24:16 8Ingot hamu ma ari Sabbat laho pabadiahonsa. #2Mus 16:25; Hes 20:12; Kol 2:16 9Onom ari ma hamu mulaulaon, jala bahenonmu nasa ulaonmu. 10Alai anggo ari papituhon i, ari paradianan ni Jahowa Debatam do i. Ndang jadi bahenonmu disi agia aha ulaon, nang ho manang anakmu, manang borum, manang naposom lahilahi, manang naposom boruboru, ro di pinahanmu, nang na sorang tu ho, di bagasan hutam. 11Ai di na onom ari do ditompa Jahowa langit dohot tano dohot laut dohot nasa isina, dung i maradian ma Ibana di ari papituhon i. Dibahen i do umbahen na dipasupasu Jahowa ari paradiananna i jala diparbadiai. #1Mus 2:3 12Ingkon pasangaponmu natorasmu, asa leleng ho mangolu di tano, na nilehon ni Jahowa Debatam tu ho. #Mat 15:4; Eps 6:2 13Unang ho mambunu. #1Mus 9:5-6; 2Mus 21:12 14Unang ho mangalangkup. #3Mus 20:10; Eps 5:3-4 15Unang ho manangko. #3Mus 19:11; Eps 4:28 16Unang ho olo sitindangkon gabus maralohon donganmu. #2Mus 23:1; Eps 4:25 17Ndang jadi haliangan ni roham bagas ni donganmu. Ndang jadi haliangan ni roham jolma ni donganmu, manang naposona baoa manang naposona boruboru, manang lombuna, manang hodana, manang dia pe ugasan ni donganmu. #Rom 7:7
II. 18Jadi sandok bangso i marnida dohot umbege angka soara ronggur dohot hilap dohot soara ni sarune i dohot dolok na martimus i. Jadi dung diida bangso i, lumindak ma nasida jongjong mandaodao. 19Angka didok ma tu si Musa: Ho ma angkupnami mangkatai, hutangihon hami pe, unang Debata mangkulingi hami, atek tung mate hami maon. 20Alai ninna si Musa ma tu bangso i: Unang hamu mabiar, ai mangunjuni hamu do Debata umbahen na ro, asa di jolomuna biar mida Ibana, asa unang mardosa hamu. 21Jadi jongjong ma bangso i mandaodao; alai anggo si Musa didapothon do tu na holom, na niinganan ni Debata. #Heb 12:18
III. 22Dung i ninna Jahowa ma tu si Musa: Songon on do dohononmu tu halak Israel: Nunga diida hamu, na hupangkulingi i hamu sian banua ginjang. 23Dibahen i ndang jadi marangkup Ahu bahenonmu debatam, manang angka debata sian perak manang angka debata sian sere pe. 24Langgatan sian tano sada bahenonmu di Ahu, bahen pamelean ni angka peleanmu situtungon dohot pelean hamauliateon, angka birubirumu dohot angka lombumu pelehononmu disi. Ai ia disi hupajok inganan parningotan di goarhu, tusi do topotonku ho jala pasupasuonku ho. #2Mus 27:1, 8, 29:42-43; 5Mus 12:5 25Alai molo naeng bahenonmu di Ahu sada langgatan sian batu, unang pauli sian batu na nidakdak, ai molo mangonai bosim tusi, gabe ramun maon. #5Mus 27:5; Jos 8:31 26Jala unang martangga ho manaek tu langgatanku, asa unang mullop na niabitanmu maradophon ibana.
Chwazi Kounye ya:
2 MUSA Bindu 20: BBC
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Batak Toba Bible Revised Edition © Indonesian Bible Society, 1998.