Khiav Dim 16
16
Manas Thiab Ncuab
1Cov Yixalayees sawvkev tawm ntawm Elimes yog hnubtim kaum-tsib, lub ob hlis ntuj, tomqab uas lawv tawm hauv tebchaws Iziv los. Lawv los txog rau hauv lub tiaj suabpuam Xees, uas nyob ntawm Elimes thiab lub roob Xinais ntu nruabnrab. 2Lawv yws Mauxes thiab Aloos nkawd tom tiaj suabpuam kawg li 3thiab hais rau nkawd tias, “Kheevlam tus TSWV muab peb tua kom tuag tag rau hauv tebchaws Iziv. Peb nyob nrad, peb tau zaum tsaws noj zaub, noj nqaij, thiab noj mov rawsli peb siab xav. Tiamsis neb coj peb los nyob rau ntawm tiaj suabpuam no, kom peb tuag tshaib tag huv tibsi xwb.”
4Tus TSWV hais rau Mauxes tias, “Zaumno Kuv yuav tso mov poob li nag saum ntuj los rau nej noj. Cov neeg yuav tau mus khaws txhua hnub, thiab tsuas khaws kom txaus noj rau hnub ntawd xwb. Kuv ua li no yog Kuv sim seb lawv puas ua rawsli Kuv tej lus qhia. #Yauh 6:31 5Hnub thib rau, lawv yuavtsum khaws kom tshaj li txhua hnub ib npaug ntxiv coj los ua noj.”
6Mauxes thiab Aloos nkawd thiaj hais rau cov Yixalayees tias, “Hmo no nej yuav paub tias tus TSWV yog tus uas coj nej khiav tawm hauv tebchaws Iziv los. 7Thaum sawvntxov nej yuav pom tus TSWV tus tshwjchim uas ci ntsa-iab. Nws twb hnov tej lus uas nej yws Nws lawm, qhov tseeb, yeej yog nej yws tus TSWV, rauqhov wb tsuas yog ob tug uas cev Nws tej lus qhia xwb.” 8Mauxes hais ntxiv tias, “Tus TSWV yog tus uas yuav pub nqaij rau nej noj ua hmo, thiab yuav muab ncuav rau nej noj ua tshais, nej yuav noj tsis tag li, rauqhov Nws tau hnov tej lus uas nej yws Nws lawm. Tiag-tiag ces, thaum nej yws wb, twb yog nej yws tus TSWV ntag.”
9Mauxes hais rau Aloos tias, “Koj hais kom sawvdaws ciali tuaj sawv tabmeeg tus TSWV, rauqhov Nws twb hnov lawv tej lus yws lawm.” 10Thaum Aloos tseem tabtom hais rau sawvdaws, lawv txawm tig mus ntsia tom tiaj suabpuam, uaciav tamsim ntawd lawv txawm pom tus TSWV tus tshwjchim ci ntsa-iab saum cov huab tuaj. 11Tus TSWV hais rau Mauxes tias, 12“Kuv tub hnov cov Yixalayees tej lus yws lawm. Qhia rau lawv hais tias, thaum tsausntuj zuag lawv yuav tau nqaij noj, thiab thaum sawvntxov lawv yuav tau ncuav noj txaus nkaus li lawv lub siab nyiam. Thaum ntawd lawv yuav paub tias Kuv yog tus TSWV, uas yog lawv tus Vajtswv.”
13Thaum tsausntuj txawm muaj ncuab coob heev ya ua npoj ntws los tsaws puvnkaus rau hauv lawv lub yeej, thiab thaum sawvntxov muaj lwg ntsu thoobplaws lawv lub yeej. 14Thaum lwg yaj tag lawm, muaj tej daim nyias-nyias zooli te, khov dawbpaug rau saum tej suabpuam. 15Thaum cov Yixalayees pom tej ntawd, lawv tsis paub xyov yog dabtsi, lawv thiaj sibnug zomzaws hais tias, “Cov no yog dabtsi?”
Mauxes teb tias, “Cov ko yog tej mov uas tus TSWV tso los rau nej noj ntag. #1Klt 10:3 16Tus TSWV tau xaaj kom nej nyias mus khaws kom txaus nyias noj. Khaws ib leeg 2 liv#16:16: liv Lolus no yog hais rawsli lolus Askiv uas yog “litre.” kom txhua nws tsev neeg xwb.”
17Cov Yixalayees ua rawsli Mauxes hais, muaj ibtxhia khaws ntau ibtxhia khaws tsawg. 18Tiamsis thaum lawv muab los luj, cov uas khaws ntau kuj tsis tshaj ntau, thiab cov uas khaws tsawg los kuj muaj txaus. Sawvdaws nyias khaws txaus nyias noj xwb. #2Klt 8:15 19Mauxes hais rau lawv tias, “Tsis pub ib leeg twg khaws mov tseg cia rau tagkis.” 20Tiamsis muaj qeeleej tsis mloog Mauxes lus, lawv txawm qee ibnrab cia rau tagkis. Tagkis kajntug tej mov ntawd ua kas thiab lwj tag, Mauxes chim rau lawv heev. 21Txhua tagkis sawvntxov nyias yeej mus khaws kom txaus nyias noj; thaum tshavntuj tuaj kub lawm, ces tej mov uas lawv khaws tsis tag ntawd yaj huv tibsi lawm.
22Thaum txog hnub thib rau, lawv ib leeg khaws tshaj ib npaug, uas yog ib leeg khaws 4 liv. Cov Yixalayees tej thawjcoj sawvdaws tuaj piav zaj no qhia rau Mauxes mloog. 23Mauxes teb lawv hais tias, “Tej lus no yog tus TSWV tau xaaj cia hais tias tagkis yog hnub so uas dawbhuv rau tus TSWV. Yogli ntawd, tej uas nej xav muab ci los ciali muab ci, thiab tej uas nej xav muab hau los ciali muab hau hnubno. Tej uas seem ciali muab khaws tseg cia rau tagkis.” #Khiav 20:8-11 24Cov Yixalayees ua rawsli Mauxes tau xaaj rau lawv. Lawv khaws tej mov ntawd cia txog tagkis los cov mov tsis lwj lossis tsis ua kas li.
25Mauxes hais rau lawv tias, “Hnubno nej yuavtsum noj tej mov ntawd, rauqhov hnubno yog hnub Xanpataus, uas yog tus TSWV hnub so; nej yuav mus nrhiav tsis tau mov nyob tom tshavpuam lawm. 26Nej tsuas tau khaws rau hnub xwb, tiamsis hnub thib xya, uas yog hnub Xanpataus, yuav tsis muaj mov rau nej khaws lawm.”
27Hnub thib xya muaj qeeleej tseem mus nrhiav khaws mov, tiamsis lawv yeej tsis pom muaj ib lub mov nyob qhovtwg li. 28Tus TSWV hais rau Mauxes tias, “Nej tseem yuav tawv tsis ua rawsli Kuv tej los xaaj thiab Kuv tej kevcai mus txog thaum twg? 29Ncontsoov tias Kuv, uas yog tus TSWV, yog tus pub hnub Xanpataus rau nej; vimli ntawd, hnub thib rau Kuv thiaj pub mov kom txaus nej noj ob hnub. Hnub thib xya txhua tus nyias yuavtsum nyob twjywm hauv nyias tsev, tsis txhob tawm mus nraumzoov li.” 30Yogli ntawd, hnub thib xya neeg thiaj so, tsis ua haujlwm.
31Cov Yixalayees hu cov mov ntawd ua manas.#16:31: Manas: Lolus no hais muaj ntsis thooj li lolus Henplais uas hais tias “Yog dabtsi?” (saib nqe 15). Cov mov ntawd ua tej lub dawb-dawb luaj li noob zaub txhwbqaib, qab ib yam li mov xyaw zib ntab. #Teev 11:7-8 32Mauxes hais tias, “Tus TSWV tau xaaj kom peb ceev ib co manas tseg cia rau peb tej cajces tau saib, lawv thiajli pom tej mov uas tus TSWV pub rau peb noj tom tiaj suabpuam thaum Nws coj peb tawm hauv tebchaws Iziv los.”
33Mauxes hais rau Aloos tias, “Muab ib lub hub los yawm ob taig manas ntim rau hauv, thiab nqa mus txawb rau hauv tus TSWV lub xubntiag, khaws tseg rau peb tej cajces tau saib.” #Henpl 9:4 34Rawsli tus TSWV tau xaaj rau Mauxes lawm, Aloos thiaj muab lub hub uas ntim cov manas ntawd coj mus txawb rau ntawm lub Phijxab Lus Cogtseg hauvntej. 35Cov Yixalayees noj cov manas ntawd tau plaubcaug xyoo, mus txog rau thaum lawv los txog rau hauv tebchaws Kana-as, qhov chaw uas lawv los ua vaj ua tsev nyob. #Yaus 5:12 ( 36Lub thoob uas ibtxwm yeem nplej yog ntim tau 20 liv.)
Chwazi Kounye ya:
Khiav Dim 16: MWW2022
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022 United Bible Societies. All rights reserved.