Khiav Dim 12
12
Kevcai Hla Dhau
1Tus TSWV hais rau Mauxes thiab Aloos thaum nkawd tseem nyob hauv tebchaws Iziv hais tias, 2“Cia lub hlis no ua thawj lub hlis ntawm lub xyoo rau nej. 3Neb ciali hais rau tagnrho cov neeg Yixalayees kom lawv paub tias hnub xiab kaum ntawm lub hlis no, kom ib tug txivtsev twg yuavtsum xaiv ib tug menyuam yaj lossis ib tug menyuam tshis npaj rau nws tsev neeg. 4Yog yim twg tsev neeg tsawg thiab yuav noj tsis tag tus tsiaj ntawd, kom nws thiab yim uas nyob ze nws koom tua ib tug tsiaj, es lawv mamli ntsuas seb yuav noj tag tus tsiaj luaj licas, rawsli qhov uas lawv coob lossis tsawg.
5“Tus menyuam yaj lossis tus menyuam tshis uas nej yuav xaiv ntawd, yuavtsum yog tus txiv uas muaj hnubnyoog ib xyoos xwb, thiab yuavtsum tsis txhob muaj ib qho phem li. 6Nej muab tus tsiaj ntawd ceev cia mus txog hnub kaum-plaub ntawm lub hlis no; thaum tsausntuj, tagnrho cov neeg Yixalayees yuavtsum tua cov tsiaj ntawd noj. 7Kom txhua yim uas tua tsiaj noj ntawd, muab tej ntshav coj mus pleev rau saum hau qhovrooj thiab ob tug puabrooj. 8Hmo ntawd lawv yuavtsum muab cov nqaij ci, thiab noj ntxuag cov ncuav uas tsis xyaw keeb thiab tej zaub iab. 9Nej tsis txhob noj nqaij nyoos lossis muab hau noj, tiamsis nej yuavtsum noj tej nqaij uas muab ci kheej, uas yeej tseem muaj taubhau, muaj plab hnyuv thiab siab-ntsws huv tibsi. 10Nej yuavtsum noj kom tag tsis txhob pub seem ib qho mus txog rau tagkis sawvntxov li; yog noj tsis tag, yuavtsum muab hlawv huv tibsi. 11Nej yuavtsum noj ceevnrooj, rauqhov nej yuav tu cev thiab sawvkev mus; rau nej tej khau thiab tuav rawv nej tus pas nrig rau ntawm nej txhais tes. Pluas hmo no yog nej noj ua kevcai Hla Dhau hwm Kuv, uas yog tus TSWV.
12“Hmo ntawd Kuv yuav mus phua plhawv hauv tebchaws Iziv, tua txhua tus tub hlob thiab tej tsiaj thawjtug menyuam uas yog tus txiv kom tuag tag huv tibsi, thiab rautxim rau txhuanrho cov Iziv tej nyuag vajtswv huvsi. Kuv yog tus TSWV. 13Tej ntshav uas nej pleev ntawm ob tug puabrooj yuav ua lub cim, cim nej tej tsev uas nej nyob. Thaum Kuv pom cov ntshav ntawd Kuv yuav hla nej mus thiab rautxim rau cov Iziv, kom nej thiaj tsis raug kev puastsuaj. #Levi 23:5; Teev 9:1-5; 28:16; 2Kev 16:1-2 14Nej yuavtsum ncontsoov muab hnubno ua ib hnub tseemceeb rau nej. Nej yuavtsum ua kevcai nco txog tej uas Kuv, uas yog tus TSWV, tau ua tag los lawm. Nej yuavtsum ua kevcai li no ib tiam rau ib tiam mus li.”
Ua Kevcai Noj Ncuav Tsis Xyaw Keeb
15Tus TSWV hais tias, “Nej yuavtsum noj tej ncuav uas tsis xyaw keeb kom puv xya hnub. Thawj hnub, nej yuavtsum muab tej keeb uas nyob hauv tsev povtseg huv tibsi, yog xya hnub ntawd leejtwg tseem noj ncuav xyaw keeb, ces tus ntawd yuav tsis raug suav hais tias nws yog Kuv haivneeg mus ntxiv lawm. 16Thawj hnub thiab hnub thib xya nej yuavtsum tuaj sibsau uake uas yog suav ua hnub dawbhuv. Nej tsis txhob ua ib yam haujlwm dabtsi rau ob hnub ntawd, tsuas pub nej ua pluas noj pluas haus xwb. 17Nej yuavtsum ua kevcai nco txog hnub uas Noj Ncuav Tsis Xyaw Keeb no, rauqhov hnubno yog hnub uas Kuv coj nej txhua xeem tawm hauv tebchaws Iziv mus. Ib tiam rau ib tiam, nej yuavtsum ncontsoov ua txoj kevcai no.
18“Lub ib hlis ntuj, suav txij li hmo kaum-plaub mus txog hmo neesnkaum-ib, nej yuavtsum noj cov ncuav uas tsis xyaw keeb nkaus xwb. 19Xya hnub ntawd tsis pub muaj ib qho keeb nyob hauv nej tej tsev hlo li. Txawm yog haivneeg Yixalayees lossis lwm haivneeg los xij, yog leejtwg tseem noj ncuav xyaw keeb thiab, ces tus ntawd yuav tsis raug suav hais tias yog Kuv haivneeg mus ntxiv lawm. 20Txawm yog nej nyob qhovtwg los xij, nej tsis txhob noj tej ncuav uas xyaw keeb hlo li; nej yuavtsum noj tej ncuav uas tsis xyaw keeb xwb.” #Khiav 23:15; 34:18; Levi 23:6-8; Teev 28:17-25; 2Kev 16:3-8
Thawjzaug Ua Kevcai Hla Dhau
21Mauxes hu cov Yixalayees cov thawjcoj tuaj uake thiab hais rau lawv tias, “Nej txhua tus nyias ciali mus xaiv nyias ib tug menyuam yaj lossis menyuam tshis los rau nej tej tsev neeg tua noj ua kevcai Hla Dhau. 22Nej muab ib re nplooj hixauv mus raus rau hauv lub phiab uas rau#12:22: raus rau hauv lub phiab uas rau; lossis tso rau saum lub hau puabrooj. cov ntshav tsiaj, thiab coj cov ntshav ntawd mus pleev rau ob tug puabrooj thiab saum hau qhovrooj. Hmo ntawd tsis pub nej ib tug twg tawm rau nraumzoov mus txog tagkis sawvntxov. 23Thaum tus TSWV los hla phua lub tebchaws Iziv uas yog los tua cov neeg Iziv, yog Nws pom tej ntshav uas nej pleev rau saum hau qhovrooj thiab ob tug puabrooj, Nws yuav tsis pub tus Timtswv uas yog Kev Tuag nkag los rau hauv nej tej tsev thiab tua nej. #Henpl 11:28
24“Nej thiab nej cov tubki yuavtsum coj txoj kevcai no mus ibtxhis tsis kawg li. 25Thaum nej mus txog hauv lub tebchaws uas tus TSWV tau coglus muab pub rau nej, nej yuavtsum ncontsoov ua txoj kevcai no. 26Thaum nej cov menyuam nug nej hais tias, ‘Tej kevcai no lub ntsiab yog licas?’ 27Nej yuavtsum piav qhia rau lawv hais tias, ‘Yog txoj kevcai Hla Dhau uas peb ua tus TSWV tsaug, rauqhov Nws tau los hla dhau peb cov Yixalayees tej vajtse uas nyob rau hauv tebchaws Iziv. Nws tua cov neeg Iziv tiamsis Nws tseg peb cia.’ ”
Ibtsoom pejxeem Yixalayees txawm txhoscaug ntua rau hauv av thiab pehawm tus TSWV. 28Ces lawv txawm rovqab los tsev thiab ua li tus TSWV tau xaaj tseg rau Mauxes thiab Aloos nkawd lawm.
Cov Iziv Tej Tub Hlob Tuag
29Thaum ib taghmo tus TSWV los tua cov Iziv cov tub hlob tuag tagnrho, suav txij Falaus tus tub hlob uas yuav los zaum saum lub zwmtxwv, mus txog rau cov neeg raug txim uas nyob hauv tej qhovtshij uas tsausntuj nti cov tub hlob; thiab tagnrho tej tsiajtxhu thawjtug menyuam uas yog tus txiv puavleej raug tua tuag tag huv tibsi. #Khiav 4:22-23 30Hmo ntawd Falaus, nws cov nomtswv, thiab tagnrho cov neeg Iziv sawv los quaj ntshoonrooj thoobplaws tebchaws Iziv, rauqhov yeej tsis muaj ib lub tsev uas tsis muaj neeg tuag nyob rau hauv li.
31Hmo ntawd kiag xwb, Falaus txib neeg mus hu Mauxes thiab Aloos tuaj cuag nws thiab hais tias, “Neb thiab neb cov nyuag neeg Yixalayees ciali khiav mus! Ciali tawm hauv peb lub tebchaws no mus pe tus TSWV, rawsli nej tau thov kuv lawm. 32Coj nej tej yaj, tej tshis, tej nyuj, thiab ciali khiav mus. Neb thov Vajtswv foom koobhmoov rau kuv thiab.”
33Cov Iziv txhib ceevnrooj kom cov Yixalayees ciali khiav tawm hauv lub tebchaws mus; lawv hais tias, “Yog nej tsis tawm mus mas peb yeej yuav tuag tas li lau!” 34Yogli ntawd, cov Yixalayees thiajli muab tej hmoov nplej tsis xyaw keeb uas lawv twb muab ntse tau lawm nrog rau tej phaj qhwv rau hauv tej khaubncaws thiab kwv saum xubpwg mus. 35Cov Yixalayees thiaj ua txhua yam rawsli Mauxes twb hais rau lawv lawm; lawv mus thov cov Iziv tej saw nyiaj saw kub thiab tej tsoostsho nqa mus huv tibsi. 36Tus TSWV ua rau cov Iziv hwm cov Yixalayees heev, lawv thiaj muab lawv tej nyiaj tej kub rau cov Yixalayees rawsli cov Yixalayees thov. Yogli ntawd, cov Yixalayees thiaj sau cov Iziv tej nyiajtxiag du lug nrog lawv mus. #Khiav 3:21-22
Cov Yixalayees Tawm Hauv Tebchaws Iziv
37Cov Yixalayees tawm hauv lub nroog Lamexes mus rau nram lub nroog Xukhaus. Cov txivneej muaj kwvlam li 600,000 leej, tsis xam cov pojniam thiab cov menyuam. 38Muaj lwm haivneeg coob heev nrog lawv mus thiab, lawv cab yaj, cab tshis, thiab cab nyuj coob ua npoj ntws nrog lawv mus. 39Lawv muab tej hmoov nplej tsis xyaw keeb uas lawv twb muab ntse tau hauv tebchaws Iziv lawm coj los ci ua ncuav noj, rauqhov cov Iziv ntiab lawv khiav tawm sai heev, ua rau lawv npaj tsis yeej tej ncuav uas xyaw keeb thiab tej khoom noj li.
40Cov Yixalayees nyob hauv lub tebchaws Iziv tau 430 xyoo. #Chiv 15:13; Kalat 3:17 41Thaum txog hnub uas txwm nkaus 430 xyoo, txhua xeem uas yog tus TSWV haivneeg txawm tawm hauv tebchaws Iziv mus. 42Hmo ntawd tus TSWV yog tus zov thiab tsomkwm lawv kev tawm hauv tebchaws Iziv mus. Hmo ntawd yog hmo uas cov Yixalayees muab fij rau tus TSWV, lawv thiaj muaj zov hmo los ua kevcai nco txog tus TSWV ib tiam rau ib tiam.
Tej Cai Hais Txog Kevcai Hla Dhau
43Tus TSWV hais rau Mauxes thiab Aloos nkawd tias, “Nov yog tej cai rau kevcai Hla Dhau: Tsis pub cov neeg txawv tebchaws noj rooj mov ua kevcai Hla Dhau no, 44tiamsis txhua tus tubqhe uas nej yuav los, yog nej twb muab ua kevcai txiav tawv lawm, tus ntawd noj tau. 45Txwv tsis pub tus uas tuaj ua qhua ib nyuag ntu lossis raug ntiav tuaj ua zog xwb, nrog nej noj. 46Pluas mov no nyias yuavtsum noj hauv nyias tsev xwb, tsis txhob nqa nqaij tawm mus noj nraumzoov, thiab tsis txhob muab tus tsiaj ntawd tej pobtxha lov li. #Teev 9:12; Yauh 19:36
47“Tagnrho cov neeg Yixalayees yuavtsum ua txoj kevcai no, 48tiamsis tsis pub cov txivneej uas tsis tau ua kevcai txiav tawv noj rooj mov no. Yog cov neeg txawv tebchaws uas nrog nej nyob, tus twg xav nrog nej koom ua kevcai Hla Dhau ua tus TSWV tsaug, nej yuavtsum xub muab txhua tus txivneej hauv nws tsev neeg ua kevcai txiav tawv tso. Thaum ntawd nej yuav tau suav hais tias nws zoo ib yam li tus uas yug hauv tsev neeg Yixalayees lawm, thiab muaj feem koom nrog nej ua kevcai Hla Dhau. 49Cov Yixalayees thiab cov neeg txawv tebchaws uas los nrog nej nyob, sawvdaws yuavtsum coj txoj kevcai no.”
50Cov Yixalayees txhua tus puavleej ua rawsli tej lus uas tus TSWV tau xaaj tseg rau Mauxes thiab Aloos nkawd. 51Hnub ntawd kiag ntag, yog hnub uas tus TSWV coj cov Yixalayees txhua xeem tawm hauv tebchaws Iziv mus.
Chwazi Kounye ya:
Khiav Dim 12: MWW2022
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022 United Bible Societies. All rights reserved.