ROMMA 15
15
Li dlara furira ni maŋ ndaraŋŋa ka maŋ taŋgaɗi
1Aygi suu ka saɓak hu virana njun u suu viisira maŋina, a zii maŋi mayra aygi ka kak iiri kay dlara furiyuygi huruygi kay taygira ɦawaɗi. 2Lini gegelay li va ma ii ndaramma jivina kay a wulum kolo hu vira. 3Kristu li dlara jivira ka ni kay tam holɗi, ni na ɗow ko magaara dira naa, «Ŋgulla suuna ŋguluŋga ndi kaŋga ni kanu.» 4Tlesuu ay hu Boy ma Ɓiirina jew halaŋŋa ɓii ay ni kay a takaygi u dlara, kay boy ma ay hu magaara namma halaŋ mba gaɗaya, kay ay mba kak u juɓpa u ɗigilla. 5Lona may ma ɦal gaɗta gaɗ suuna u kakka heɓpana mba mbuɗugi saɓak a kak ko tagiya, minigi duk tagiya tagiya ko Yesu Kristu lira na. 6Kay a aygi halaŋ vunuygi li taɓi dew a geleɗ Lona Buna, Yesu Kristu Bu Suuna mayna.
Boy ma Ayra maŋ njaf suuna halaŋ
7Taɓagi duk tagiya tagiya maŋ bibiŋilla vi Lonara, ko Kristu taɓagira na may. 8An dagiya Kristu mbuɗ ki sa sunda vi suu Juifna kay li u va ma Lona dam ki maŋ somoyosina, kay tak ana va ma Lona damma ka mbuɗ ki ma daŋgi. 9Nam mbani kay njaf suu ka suu Juifnaɗina, geleɗ Lona kay jivi mamba nam laɗa ko magaara dira na,
«Kay ndaɗta an hin geleɗeŋ
duk njaf suuna halaŋ,
gi soolla a geleɗeŋ seŋ lay.»
10Ndaɗ di olo ana,
«Agi njaf suuna halaŋ
furiyugi u suu vi Lonna.»
11Olo,
«Agi njaf suuna halaŋ
geleɗegi Bu Suuna,
ko suuna halaŋ geleɗemu.»
12Ezayi di olo ana,
«Sa ma hu njafna vi Jesena
hin mbaa, kak mulla
kay njaf suuna halaŋ,
hurum namu suuna hin mba
juɓum u heɓpa.»
13Lona ma mba juɓpa hoɓogi u furira u heɓpa halaŋ, hu vira agi vi umba a Musuk Lonara u saɓak mamma hoɓogi u juɓpa heɓpa.
Pol ndak a ɓii magaara ko nam lira na
14Gorsenna an kay tanda saa ana agi hurugi hoɓi u jivira, hoɓi u wira halaŋ, ndaki kay a gaɗ tagi duk tagi lay. 15An ɓiirigi magaara ha hu lii daŋŋa zeɗ zeɗ kay gaɗagi a gagi humugi kay dlara agi humuɗ ki jewra, ɓiirigi ha ni u oo mayra Lona ɦandara. 16Kay a kak sa sunda vi Yesu Kristu kay njaf suu ka Juifnaɗina, an lini u sunda ɦanda a di Boy ma Ayra vi Lona kira, kay a njaf suu daŋŋa mbuɗ ki va ma jivi ma Lona furi kamma, mbuɗ ki suu mam suu ndakina u saɓakŋa vi Musuk Lonara. 17Kay taɓpa u Yesu Kristura an ndak kay geleɗ tan kay sunda vi Lona. 18Lini an min a ɓak eŋ kay va ni kay mayra Kristu yan ki a mbuɗ njaf suu daŋŋa ki a hum u Lona nam tak dla ndaɗta ki u boyna u sunda may. 19U saɓakŋa vi Musuk Lonara li dlara mbuɗta an gijaŋŋa a di Boy ma Ayra kay Kristu an gijaŋŋa hu Yerusalem tuɗ hu li ma daŋŋa tew ki hu ndaŋgara Illiri. 20An tuɗ di Boy ma Ayra hu li ma sa ɓak ka kay sem Kristu hu tuɗina, kay a tin kolo kay u zira vi sa ma daŋgi. 21A li ko va ma magaara damma na,
«Ana suu dasi ka
kay boy namma tuɗina hin wamu.
Asi suu sa ɓakasi kaɗina
hin humum um kiyo.»
Pol ɓak kay koy mamba Romba
22Ni va ma dooron tew tew kay an a tuɗ ha varagina. 23Cecemi sun manda hu ndaŋgara tanira daɓ wa, basara ŋgolo an hurun haɗ kay a tuɗ gologiya. 24An col ɦawa a tuɗ Espagne ni an hin tli ha varagiya, an a tli varagi ni kay va ma agi a njun un u nam kay koy manda fokka, agi hin tininni ŋgoo dagan buu maa nde. 25Cecemi an tuɗ Yerusalem kay li sunda duk suu vi Lona suu huna. 26Suu vi Kristuna hu Masedoin u suu Grekŋa min a ɦal tlena maŋ suu vi Lona suu wihawra hu Yerusalemma. 27Asi saa boy namma ni asi daŋ may, a gasira ni asi ndak a njunusiya, kay suu vi Kristu suu Yerusalemma ɓorow tlena vi Musukka ki duk tasi u suu ka njaf suu Juifnaɗina, suu ka njaf suu Juifnaɗina ndak a njun usi u tlesuu hu ndaŋgarana may. 28Hu li ma an daɓ dla ndaɗta wa ni, ɦasi tlesuu agi ɦasisinana wa ni, an hin tuɗ Espagne a hoŋ ayra wanni an hin tli ay varagiya. 29An wi ana an hin tew ki varagi u paɗvunna vi Kristu.
30Gorsenna va ma an min joɓogi kamma u Bu Suuna Yesu Kristu u minda vi Musuk Lonara, taɓagi duuna u an dew cenegi Lona kanu. 31Cenegi kanu kay an suɗ ay ki ko suu bay vina hu mbassa Yudera, kay njunda an tuɗ u ndaɗ hu Yerusalem wanda a suu vina mba faɗ u furira. 32Lini li wa na ni an tuɗ tew ha varagi ni u furira, Lona min wani an tuɗ koɗ tan varagiya. 33Lona ma ɦal heɓpa mba li u agi halaŋ. Amin.
Chwazi Kounye ya:
ROMMA 15: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.