MARK 7
7
Yesu ciwayra u suu Farisenna kay dlaasira
(Matiye 15.1-9)
1Suu Farisenna u suu wi magaara col ay Yerusalem, asi mba tok kaŋga eg Yesu. 2Asi gol suu haɗi suu vi Yesu suu ɦiw ti funa kosi bay mbussa. Bay mbussa ko gaɗ masira na.
3Suu Farisenna u suu Juifna halaŋ ka ti fu bay mbus kosi ki jiviɗi, kay asi vi ni vun somoyosiya. 4Asi li ay u sukŋa mba voo wani, yorok yo kasi nde, ti funa tuwa. Asi vi vun somoyosi kay tlesuu daŋŋa coco lay, ko ndal mbus tlesuu cira, u doygina, u ŋgalina u gegelina.
5Suu Farisenna u suu wi magaara joɓ Yesu ana, «Suu maŋsina ka li ko somoyogi suu jewna naɗi amege? Asi ti funa bay mbus kosi ki ni kay mege?» 6Yesu hoŋosi dira ana, «Agi suu hurugi mbambana, Ezayi di ki jew kagi na ni u voɗoɗu. Lona ɓak ana,
Suu dee ndaɗta ŋgaan u vunusiya,
hurusi ki egen day.
7Asi lan un ni gaa fokon ni ɦawaa.
Boy ma suuna ɓakamma ni
haɗta vi suuna ɦawaa,
asi vam ni ko Boy ma vi Lonna na.»
8Yesu di ana, «Agi hinigi gaɗta vi Lonara ki tani, lagi ni boy ma vi suunana.»
9Yesu dasi olo ana, «Agi gi gaɗta vi Lonara ki ni, a lagi dlaagira kay tagira. 10Agi gola Moiz di ana, Tli yam buŋ u suŋ koloo. Nam hin di hu olo ana, sa pan bum u summa cam ki ciya. 11Gola agi gaɗ ana, Sa di maŋ bum u sum ana, Tlesuu an hinisi a njunugi gin na, an ɦasi ki maŋ Lona a purra wa. 12Ni agi ɦal voɗta ana sa tli yam bum u sum koloɗi, naɗi su? 13Dlaagira agi haɗ suuna u ndaɗta, agi mbuɗ boy ma vi Lona ki lalasi. Agi li tlesuu daŋŋa coco ko dla ndaɗta na lay.»
Tlesuu ɓeŋ sana, mbuɗum ki njenjena
(Matiye 15.10-20)
14Yesu tin um yi suuna ay egem, dasi ana, «Humun ki vunun haa, wagi u boy namma ki jivi may. 15Va ma col ay bunsu, mba hu sana, ka mbuɗum hurum njenjeɗi. Va ma col ay kurufu huu sana mbuɗum ki njenjena ni namma ɗow. [16Lini humugi humma ni, humugi ha jiviya.»]
17Yesu hin suuna ha ki tani, kal kalafi kal ni, suu haɗi mamsina joɓom ana nam gasi u ndal boy namma kiyo. 18Nam dasi ana, «Agi lay ni ndak ka a wi u boy namma kiɗi lay su? Agi ka wi kagi ana va ma col ay bunsu mba hu sanana, ka mbuɗum hurum ki njenjeɗi naɗi su? 19Va tira ka kal hu sanaɗi, nam kal ki ni hu yorodom ɦawaa, o ki ni sotna.» Na ɗaŋi yesu di ana tlesuu tira halaŋ ni jivira a tira. 20Nam di olo ana, «Va ma col ay hu sana ɓeŋem ki ni namu. 21Saara cora col ay ni hu sana. Hurum zuɗum um ha ana li dla cora, kulna u ci maɗna lay, 22li zoŋga lay, hurum haɗ kay tlesuu vi suunana lay, a ganyam suuna lay, a li dlara dadassa, a li gonokka lay, a li ŋgeŋŋa kay suuna lay, a ɓii tara, bay u dlara lay. 23Tlesuu co asina halaŋ col ay ni hu sana, ɓeŋem ki ni asiya.»
Cara hu njaf ma daŋŋa tin huruɗ kay Yesu
(Matiye 15.21-28)
24Yesu col ay ki tana, tuɗ ɦoŋzina tok eg zi ŋgolna Tirna. Nam kal hu zira a sa wi ana nam ka tani naɗi. Nam ka fi tamba ŋgay ko suunaɗi lay. 25Cara dew goroɗta u ful ma cona kaɗu, ndaɗ hum dla Yesu hummi, ndaɗ tuɗ goɓ kaŋga fokomu. 26Ca ndaɗta ni goora Fenisira hu mbassa Sirira, ka hu njaf ma Juifnaɗi. Ndaɗ di Yesu ana nam dikiɗ ful ma cona ki kay goroɗta. 27Yesu hoŋoɗ dira ana, «Hin gorkemba asi ti funa hoɓ ki tuwa. Tli funa vi kemba, gam ki maŋ gor diginina gaw ni, ka jiviɗi.» 28Ndaɗ dam olo: «Na ɗaŋ may, Malaŋ Haɗta. Gor diginina lay ni mbasa felek u fu ma yak ki kaŋga ko kembana layɗi su?» 29Nam daɗ ana, «Kay boy ma ndak hoŋon nana wanni, ndak tuɗa. Ful ma cona hinik gorokka ki wa.» 30Ndaɗ kal ha vo ni, fi goroɗta buuri kay layna. Ful ma cona ki tuɗiya.
Yesu mal hum sa ma ŋgeli ma ndumuna kiyo
31Yesu col ha hu mbassa Tirra wanni, jak hu mbassa Sidonda. Nam hoŋ ay ŋgoo lumma Galilena, jak hu Zi ma Doogona. 32Asi mbaaram sa ma ŋgeli ma ndumuna ay egemu. Asi dam ana nam tin kom kamu. 33Nam vam umu, hin suuna ha ki na day. Nam kal gor gor kom humum may, tofoɗ yoyona, tinimma kay sinimu. 34Yesu tli irim kolo huulona, musuk na ɦilif, hin di ana, «Effata» ni ana, «Aŋ mal kiyo.» 35Na gaw ni humum mal kiyo, sinim buɗ ki gaw may. Nam mbuɗ ɓak vala vala. 36Yesu gaɗ suuna ana, «Dlara an laɗ wandara tuɗ daɗ ki maŋ saɗi.» Nam gaɗasi lay ni, asi jok usi ha fok joki na ɗow ɗow. 37Na ɗaŋi suuna halaŋ mbuɗ na jim. Asi ɓak ana, «Dlara nam laɗta halaŋ ni jivi ɦay. Suu ŋgelina nam malasi humusi ki lay, suu ndumuna nam buɗusi sinisi ki lay.»
Chwazi Kounye ya:
MARK 7: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.