1 KORINTNA 6
6
Ɓakŋa kay suuna u gorsesina
1Lini sa maa dukugi dew dlaamba ka duk tam u wayamma nam ka mbaaraɗ fok suu vi Lonnaɗi su? Hin tuɗuɗ duk suu bay vina ni nanage? 2Agi ka wi ana suu vina hin kaɓakŋa kay suu hu duliyara ni asiya naɗi su? Lini kaɓakŋa kay suu hu duliyara ni agiya ni, agi ndak ka gi ii dla mayra duk ɦoŋogi ewra layɗi su? 3Agi wi ana aygi hin kaɓakŋa kay suu sunda huulona naɗi su? Nanaba tlesuu hu duliyara ew daŋŋa ge? 4Lini dlara vi sana ka duk tam u wayamma kay tlesuu hu duliyara ko wanni na ni, agi yowogini suu ka duk suu vina suu gorina a kaɓakŋa. 5An dagiya dla ndaɗta ni zolo kagiya, na ni sa ma neey ka dukugi na dew a ndak a min ii dlara duk tagiraɗi su? 6Sa vina dlara li duk tam u wayamma su? Lini ka na ni tuɗuɗ fok suu kaɓakŋa suu bay vina su?
7Dlara ɓak duk tagira ni ɓeŋ magira gaw. Agi ka siɓ dlara vi tagiraɗi hin tli kolo ni bay ɗegeera na ɗow ni kay mege? Lini na ni agi hinigi suuna yowogi tlegeyegiɗi kay mege? 8Dlara agi laɗ eg gorseginara, hin ɗegeera ki tani li kulna ni agi na ɗow. 9Agi wagi ki kagi ana, suu hurusi cona ka fi Mul Lonaraɗi. Ganyam tagi kiɗi, suu li dla cora u suu cen lo ma ɦawana, u suu li zoŋga, suu buu u ndarayasi suu njufina, 10suu kulna, suu ŋgiziɗ tlen vi suuna, suu guruɗ u summa, suu ŋgul ndarayasina, suu kaboyna, asi halaŋ ka fi Mul Lonaraɗi. 11Suu ɦiw ay dukugi ko ndaɗta na. Coosira mbus ki wa, agi hin tagi kini maŋ Lona, agi mbuɗ ki cecemi ɗegee fok Lona u sem Yesu Kristu, u Musuk Lonara.
Li tagi a ɦal ŋgolla maŋ Bu Suuna
12Suu dukugi di ana tlen halaŋ an ndak lasiya. Na may asi tlena ka jivi kagi halaŋgi. An ndak di ana tlena halaŋ an lasiya, ni an ka hoŋ tan dagan a mbuɗ tan ki mbaɓuna vi vaɗi. 13Agi di olo ana tina ni kay hayra, hayra ni kay tina may. Na may nam Lona hin ɓalakasi ki jak, Lona li mbalata sana ni ka kay dlara zoŋgi, mbalata sana ni maŋ Bu Suuna. Bu Suuna ni kay mbalata sana may. 14Lona paɗ Bu Suuna ay ki kolo hu miɗna iiriya, ni nam hin paɗaygi ay ki kolo hu miɗna iiri u saɓak mamma may.
15Agi ka wi ana mbalatagi ni mbalata Kristu naɗi su? An hin tli mbalata Kristu tani mbuɗuɗ ki mbalata cara gawlaŋga su? Ka li naɗi. 16Agi ka wi ana sana taɓ u cara gawlaŋga wa hin mbuɗ kini tliw ma dewnaɗi su? Magaara di ana, «Suuna mba' mbuɗ kini tliw ma dewna.» 17Sa ma taɓ tam u Bu Suuna mbuɗ taɓi u nam hu ŋgussa dew.
18Piirigi ki kay dlara zoŋga, cora daŋga sana laɗ halaŋga, ki buru eg sana, sa ma ɦal tam kay li zoŋga, li co ndaɗta ni eg mbalatam gaw. 19Agi ka wi ana mbalatagi ni zina vi Musuk Lonara naɗi su? Musukka hurugi wanda Lona ɦagira ni namu. Mbalatagi ka ni magira kay tagiɗi. 20Lona warak kagi a gusugira ni warakiya. Lagi tagi a ɦal ŋgolla maŋ Bu Suuna.
Chwazi Kounye ya:
1 KORINTNA 6: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.