Vèsè popilè nan Bib la ki soti nan Efesus 6

Pataje

Nasuhung la umpakea' yatoo aka' tadia hupatau ang tabali, ampo' umbaliingkea' ingkänna setang ang ma'kuasa yaling inde di lino kamalillingang bahtu' dioatee lino kakarakeang. Anna umbali toingkea'ne' kakuasaanna ingkänna dehata karake ang ungkuasai lino.

Yaling di ingkänna yatoo, pa'sambayangkoa' anna umpalaui dai' di Puang Alataala anna naduluikoa'. Pa'sambayang lolokoa' situhu' pengkähänganna Inaha Maserona Puang Alataala. Madaka lolokoa' anna pa'sambayang lolo toingnga'ne' ingkänna petauanna Puang Alataala.

Pakeia' yato ingkänna pangkahka' pa'tolla'ang di mendehatanna, yato ang puha nabeakoa' Puang Alataala. Aka' ponna ke diangnga' umpake, ya' la tontong lolokoa' matoho umbali pa'bulitu'na Pongkahana setang.

Dianto anna la umpake asammia' yato ingkänna pangkahka'na Puang Alataala ma'tolla' anna malakoa' matoho umbali balimmu ke lambi'mi yato tempona kakarakeang. Lambi', ponna ke puhamokoa' ma'tolla', la tontong lolokangkoa' matoho anna matihta.

Anna pake loloia' yato kapampetahpa'ammu dai' di Puang Alataala dianto pekalapaimmu, bahtu' sihapang untamu, aka' supung kapampetahpa'ammu ang la mala untihpa' anna umpi'dei batu sapingka'na Pongkahana setang ang sitonda api. Hannuangngia' kasalama'ammu sihapang songko' bahsi yaho di bää'mu, anna pakeia' yato Bahtakaranna Puang Alataala ang puha nabeakoa' Inaha Masero sihapang pa'dammu.

Sadia lolokoa' ke'de' mangngempe anna pamatohoia' kapampetahpa'ammu pano di katahpa'ang ang sihapang salipi ang napantoke'i pangkahka'na to pa'tolla'. Anna pembabe marohokoa' anna malai yato kamarohoammu la sihapang kaya' pa'tolla'ang ang la umpake anna dao nalosa pangkahka'na balimmu. Pahallukoa' sadia lolo umpepainsangnging Kaheba Mapia ang la umpakapiai sumule kasikenteanna hupatau anna Puang Alataala, anna malai yato kasadiaammu la sihapang sapatu ang napake to pa'tolla' ke sadia bumi la mao ma'tolla'.

Katämpä'anna, la pahallukoa' matoho umpake kamatohoang ang sule yaho mai di Dehata yaling di kakuasaanna ang dai aha mallondo.

La umpakeangka'koa' to baha'mu. Dianto atohanna Puang Alataala ang uhuna ang napasitonda pa'dandiang naoatee, ”Anna malakoa' kehongko' anna mahendeng tuho yaling inde di lino.”

Ingkämmua' to dipoänä', tuhu'ikoa' to baha'mu aka' dianto pembabe ang sihatang nababe tau ang mampetahpa'mi dai' di Dehata.