Vèsè popilè nan Bib la ki soti nan Jij 16

Pataje

Lè sa a, Dalila rele: — Samson! Men moun Filisti yo sou ou! Misye leve, li t'ap di nan kè li l'ap soti anba kòd yo, l'ap met deyò tankou lòt fwa yo. Men li pa te konnen Senyè a te gentan lage li.

Lè sa a, Samson lapriyè nan pye Bondye, li di: — O Bondye Senyè! Tanpri, chonje m non jòdi a! Tanpri, Bondye, ban m fòs ankò pou yon dènye fwa, pou m ka fè moun Filisti yo peye yon grenn kou pou de je m yo pete a.

Bout pou bout li ba li sekrè a, li di l konsa: — Mwen pa janm koupe cheve nan tèt mwen. Se yon nazirit mwen ye, yo mete m apa pou Bondye depi nan vant manman m. Si yo koupe tout cheve nan tèt mwen, m'ap pèdi tout fòs mwen, m'ap tankou nenpòt ki moun.

Chak jou li rete la nan kò Samson, l'ap plenyen nan tèt li. Samson pat kapab ankò, rete pou l te mouri.

Epi li di: — M te mèt mouri ansanm ak moun Filisti yo. Li pouse ak tout fòs li sou poto yo, epi tanp lan tonbe sou tout chèf yo ak sou tout moun ki te la yo. Jou li mouri a, li te touye plis moun pase kantite moun li te touye pandan lavi li.