Lomɛ́ŋ 11
11
Támbák tiómbó Isilaɛl
1Yoókoówon kɔk ɛ́ɛ́: Támbák óómbo nikúli níɛ́yɛ́ á? Aákóo! á kiákí iŋúɛ puɛt inyɛ mɔnɔ́ Isilaɛl, é pupundí pú Ápilaháam, é nisíp ní Pɛnsamɛ́ŋ. 2Támbák tiómbo nikúli níɛ́yɛ́ úmeémenyí kisíósíó. Kúnyaánɛ nutipá numenyen epú ɔnfíɔ́ŋ ɔ́ɔ́yɔɔnɛ́ɛ é kiénsi ekí Eli pitɛtɛnɛ́ Isilaɛl á Támbák á? 3Ɔkɔ́n, pɔ́ɔ́n peémímekélíé pááwɔ, páákata awuúkɛ́n pifunɔ́ píáwɔ; Iŋúɛ eŋényí yɔ́ɔ́nyílɔpɔ́ pákanyɛɛ́ kuamba kuuŋɔn. 4Maná támbák ɛ́ɛ́ woondinyi wɔ́ ɛ́ɛ́ kiákí? Yɛɛ́pínɛkɛn pɛɛnd tukɔ́n tútíndátɔ́ neémue pɛ́nyɛ́ɛ́lɛ́ pétisukín kifɛ́lɛfɛ́lɛ Páalɛ tunu. 5Yá anɛ́ púnyɛ nɔ́ á kisikɛl ekie, kitám nyɛ kɔ́ɔk Támbák maáyɔ́ɔ́n kɛ́ɛ́yɛ́ é peseé. 6Maná púnyɛ é peseé u Támbák, pútipá kɔk é meelíe mɛ́ pɛɛnd, akáánɛ́ peseé tikápá peseé. 7Púnyɛ kɔk ɛ́ɛ́ kiákí? Epú Isilaɛl aambanɛ́ɛ, utíapíá: Maná paayúúnán áátáŋapa. Ɔ́ pɔsɔ́k pólití, pálúndɔ itɛ́m, 8yá aná púnyɛɛ́ puɔ́ŋɔ́n; Támbák meekí pɔ́ kiliínditíe kí tunɔ, weeki pɔ́ eŋis ɛ́ɛ́ pɛ́tiɛ́nɛn, weeki pɔ́ itu ɛ́ɛ́ pɔ́tiɔ́pɔ́n kuasiám ínanɔ ewe. 9Tafíit ɔ́ɔ́kɔɔyɔ kɛ́kɛ́ɛ́yɛ́ ɛ́ɛ́: Kunyá kúɔ́p pá ɛmfɛl wɔ́ɔ́p, puolí pú nikɔɔ́n níɔ́p á putámb, kɔ́ɔ́p kí inséésítényí! 10Eŋis yɔ́ɔ́p pífuuk pákua pipúte; Ɔtɔ́lɔ pɔ́ kélém tɛ kiwookitio.
11Yoókoówon kɔk ɛ́ɛ́; Kukua kúɔ́p nyɛ kú teeníík á? Aákóo! Maná kɔ́ɔ́p á pifal, piɛ́nɛɛ́n pílotí áápiá kisótio, ɛ́ɛ́ póónyikin nuna nú Isilaɛl. 12Índɛ́ kɔk kipínanɔ́ kíɔ́p ɛlɛɛ́ punɛ́m pú kúúsí, kukua kúɔ́p punɛ́m pú piɛ́nɛɛ́n pílotí, kuond kɔk kúɔ́pɔ́ ó kisótio tiɛ́nyɛɛlɛ́ ɛ́ɛ́ pápɔ́t kiákí?
13Yɔɔ́núɔ́yɔn kɔk panɔ́ piɛ́nɛɛ́n pílotí: Ké etényí ewe inyɛɛ́, iŋúɛ etúmí u péépé pátiányípá Pɛyúútɛn, yeétíínyenyi puŋaaŋa pú pusɔ́m púámɛ, 14ɛ́ɛ́ yɔ́ɔ́yikɛn nuna nú paandimán páámɛ Pɛyúútɛn yoond insóti pólotí. 15Índɛ́ aká Támbák mɛ́ɛ́ŋɛ́k pɔ́ á masíá, wɛɛpíɛ́yɛn ne kúúsí, kiákí kíkaányípítápɔk aká ukɔɔ́nyípíkɔ́ɔ́kitɛn pɔ, kunyɛ kutápɔk kú nikú ɔ́ kusɔ́t á? 16Índɛ kɔk piokoko nyɛ pifúmak, niok nyɛ kɛ́kɛ́ɛ́yɛ́ kifúúmak; Índɛ kɔk aŋaŋá nyɛ kifúúmak, pikas kɛ́kɛ́ɛ́yɛ́ nyɛ pifúmak. 17Maná kɔk índɛ pásiasɔ́mb pikas pílotí, aŋɔ́ kɔk putɛ́ pú ɛɛm pákulátikɛn á pikas pimeésíén pí putɛ́ ɛ́ɛ́ átáŋap punɛ́m pú iŋaŋá, 18ɔtiɔ́pɔ́n ipali ó pusíó pú pikas. Anyɛ kuɔ́pɔn yɛ, atipá aŋɔ́ ɛsɛmbɛnɛ́ iŋaŋá, maná iŋaŋá síkusɛmbɛnɛ́ɛ. 19Ekeéndie ɔ́ɔ́yɛt ɛ́ɛ́: Páásɔ́mb pikas ɛ́ɛ́ iŋúɛ píílátikɛn. 20Ɛ́ɛ́ pámasɔ́mb pɛ́ á kati kuátapɛ wɔɔpɔ́, aŋɔ́ kááwɔ á kuátap ɛpíɛtikɛninɛ́ɛ, ɛtipímɛlɛ, píɛtíkinɛn. 21Á kiákíɛ́ índɛ Támbák timayap pikas píɛ́yɛ́, tɛ aŋúɛ utiákuyapá. 22Kɔ́l kɔk ɔ́ niɔlɔ́ ɔtɛ́m peseé nɔ ɔtɛ́m kupal ú Támbák: Ɔtɛ́m kupal é péépé páányíkuá, ɔtɛ́m peseé kááwɔ, kɔ́ɔ́m ɛ́ɛ́ ɔ́lɔp á wɔ, kati nɔ́ ɛ́ɛ́ páányíkusɔ́mb kákááwɔ. 23Kɔ́ɔ́pɔ́ pɔ́ Payútɛn, índɛ pɔ́timɔlɔpɔ kí iŋilí i kilɔk, páányílátikɛn pɔ́ kɔ́kɔ́ɔ́pɔ́; á kiákíɛ́ Támbák áápian pukaaka pú kulátikɛn pɔ́ kuukɔ́sikɔ́siɛ. 24Índɛ aŋɔ́ pámakusɔ́mb á putɛ́ pú ɛɛm amapá á pɔ́ é nupíén, pákulátikɛn á putɛ́ pú indɛ́ndɛ́nɛ, pɔ́ kɔk páányílátikɛn pɔ́ á putɛ́ púɔ́p pú nupíén.
Kisótio kí Isilaɛl
25Á kiákí ɛ́ɛ́ indipá yaamba ɛ́ɛ́ paandimán, nulemit insiípie ikáánɛ́, emenyí nupíkɔ́l ɛlɛɛ́ pesiŋísiŋ: Ɛtɔ́ kulal ú kitáám kí Isilaɛl kapápa kuám aká piɛ́nɛɛ́n pílotí óónyoóndinée Támbákɛ́ɛ ɔ́ mɔɔyɔ́. 26Akáánɛ́ Isilaɛl kitikit ɔ́ɔ́nyísɔ́t yá aná púnyɛɛ́ puɔ́ŋɔ́n: Etúkúnín óónyólin é Siyon, waányínyáŋɛk itɛ́m kilɔk sí niindaanda ní Yákɔp. 27Índɛ́ nikál níámɛ nikáánɛ́ nɔɔpɔ́, aká iŋeényéŋi pifal piɔ́pɔ́. 28Índɛ tusioyoosin insɔ́m yi indámb, paányɛ pokóyikoy, punyɛ peseé káánɔ́ á kiáyí; Índɛ tusoyooson á kiyúúnɛ, Támbák ɔ́ɔ́kɔɔyɔ pɔ́ ó pusíó pú pesíí. 29Á kiákí ɛ́ɛ́ tupoo nɔ ɔmbílíkínɛ́n ú Támbák tipá úkukua ɛ́ sɛ́kísɛ́k. 30Kisíósíó numɛɛlɛ́ Támbákɛ́ɛ pitúkɔ́l, ninúan á kati kuɔ́pinɛ u paán pí Isilaɛl, waanúfá niɛ́n ɔsúkɛ níɛ́yɛ́; 31Pɔ́ kɔ́kɔ́ɔ́pɔ́ pɛ́ɛ́lɛ́ pitúkɔ́l, Támbákɛ́ɛ waanúfá niɛ́n ɔsúkɛ, ɛ́ɛ́ pɔ́ kɔ́kɔ́ɔ́pɔ́ pápá ɛ́ niɛ́n ɔsúkɛ. 32Á kiákí ɛ́ɛ́ Támbák mefuukín mɔɔnd kitikit kɛ́ ɛtɔ́ kulal ɛ́ɛ́ weeki niɛ́n ɔsúkɛ á mɔɔnd. 33É kuyume u punɛ́m, na tutátɔ́ ni insiŋí i Támbák; Tɛ mɔɔnd utipá pá kuanɔn musɔ́ɔ́sɔ múɛ́yɛ́ tɛ iŋilí síɛ́yɛ́ sítipá ni imbitákítínɛ́n. 34Ɛ́nyɛ́ umeémenyí imbitákítɛ́n i Ɔkɔ́n? Kúnyaánɛ ɛ́nyɛ́ɛ umaápá esúŋí wɛɛyɛ́? 35Kúnyaánɛ ɛ́nyɛ́ɛ umeékí wɔ́ kisíósíó, ɛ́ɛ́ únam wɔ́ ó kuond? 36Á kiákí ɛ́ɛ́ puum nyɛ púɛ́yɛ́, kɛ́ɛ́yɛ́ ó pusíó púɛ́yɛ́. Kɛ́ɛ́yɛ́ nukany é teeníík ne níík é! Anakáánɛ́.
Trenutno odabrano:
Lomɛ́ŋ 11: yav
Istaknuto
Kopiraj
Usporedi
Podijeli
Želiš li svoje istaknute stihove spremiti na sve svoje uređaje? Prijavi se ili registriraj
© 2026, CABTAL