मत्ति 28

येसु असा जिवेमास तेदान्तोर

(मर १६:१-१०; लूका २४:१-१२; युह २०:१-१०)

1यहुदि लोकुरा पवित्र दियाता पजा हपताता पहले दिया मन्जे इतवार दिया वियानपाहारा आतपा मरियम मगदलनि अनि दुसरो मरियम येसुना बिजगुडितुन हुळिला वातुंग। 2अनि सान्डे उन्दि हजोर भुकंप आतु, बाक्याकि प्रबुनोर वरोर दूत स्वरगताल रयतुर अनि ओर बिजगुडिता कवाळ मुच मतोरक ओद कलदुन गुचिहतुर अनि अदेनिगा उदितुर। 3ओना रुप विज लेहका अनि ओना सन्दरा बर्फ लेहका पान्डरि मता। 4केपवालोरक ओन हुळस वरेते कसिंगसोर हातोरक लेहका आतुरक। 5स्वरगदूत आसकुन इतुर, “वरियमाट, कुरुस पोरो अन्जहिस हव्कतोर येसुन निमाट पळकिला आतोरिट इन्जोर नना पुन्तोना। 6ओर इगा हिलेर, मति आपुना पोल्लोता अनुसार ओर असा जिवेमास तेदितोर। वराट, बगा ओन इरस मतोर ओद जागा हुळाट। 7अनि सान्डेय हन्जुन ओनोर चेलालोरकुन इन्ट, ‘ओर हातोरिगाडाल जिवेमास तेदितोर अनि ओर मिया पहले गलील प्रदेशते दान्तोर अनि अगा ओर मिकुन दिसानुर!’ इदाम नना मिकुन इतोना इन्जोर मरिंगमाट” इदाम इतुर।

8अव वरे अनि पकाय गिरदाते बिजगुडिताल सान्डे पसियस ओनोर चेलालोरकुन समाचार वेहान साटि वितसोर हतुंग। 9असके येसु अवेहकुन मिलेमातुर। अनि “मिकुन नमस्कार” इन्जोर इतुर। अव हेरे वास ओनांग काल्क अरसुन ओना आरादना कितुंग। 10असके येसु अवेहकुन इतुर, “वरियमाट; निमाट हन्जुन नावोर तमोलोरकुन गलील प्रदेशतिगा हनिर इन्जोर वेहाट, अगा ओरक नाकुन दिसानुर।”

केपवालोर सयनिक लोकुरा खोटाल गवाहि

11असके अव आसक अगा आता सबोय पोल्लोंग चेला लोकुरकुन वेहिलाय हन्दुंग असके केपवालोर सयनिकनिगाडाल हुचुलोर सयनिक लोकुरक सहेरतिगा हन्जुन आतांग पुरा घटनातुन मुक्याल याजक लोकुरकुन वेहतुरक। 12असके ओरक यहुदि अदिकारिलोरासंग जमा आस विचार कितुरक अनि सयनिक लोकुरकुन पकाय डबुंग हितुरक, 13“ ‘नरका माक हुन्ज मतोरोम असके ओनोर चेलालोर वासुन ओन कलस ओतुरक’ इदाम इन्किट इन्जोर इतुरक। 14अनि इद पोल्लो राज्यपालना मुनेवनाह अवार ते माक ओन समजेह कियाकोम अनि मिकुन बाराय आयिला हेवोम आयकोम” इन्जोर इतुरक। 15आकरिते ओरक डबुंग येतस ओरा आग्या अनुसार कितुरक। इद पोल्लो नेन्डवनाह येहुदि लोकुरकनिगा फयलेमाता मन्ता।

“दुनियाता सबोय लोकुरकुन चेला बनेकिम्ट” इन्जोर येसु आपुना चेला लोकुरकुन आग्या हिन्तोर

(मर १६:१४-१८; लूका २४:३६-४९; युह २०:१९-२३; बुतोंग १:६-८)

16पजा अकरा चेलालोर गलील प्रदेशतिगा येसु ओरकुन हन्दिला वेहच मतोर ओद मटा पोरो हतुरक#मत्ति २६:३२; मत्ति १४:२८। 17येसुन हुळतुर असके ओरक ओन आरादना कितुरक, मति दुसरो हुचुलोरक शंका कितुरक। 18येसु ओरा हेरे वातुर, “स्वरगतिगा अनि दरतितिगा सबोय अदिकार नाकुन हिता मन्ता। 19इन्जोर निमाट हन्जुन, बाबो अनि मरि अनि पवित्र आत्माता पोरोयते बपतिस्मा हिस#मत्ति १:८, 20नना मिकुन आग्या हितोना ओद सबोय पोल्लोंग ओरकुन मानेमायिला करहिस सबोय जातितोर लोकुरकुन नावा चेलाह बनेहकिम्ट; नना ते दुनियाता अन्तवनाह दरोज मियासंग मन्तोना” इन्जोर इतुर।

Trenutno odabrano:

मत्ति 28: fmu

Istaknuto

Podijeli

Usporedi

Kopiraj