Ляхнар 17
17
Павелна Сила Фессалоникайиъ
1Амфипол ва Аполлония кӀуру шагьрариантина душну, Павелна Сила жугьдарин мист айи Фессалоникайиз гъюру. 2Павел, дина дуфну, чан аьдатниинди шубуд султ йигъан жугьдарихъди БикӀбарикан улхуру. 3Дугъу, Месигь сифте дукӀну, хъасин чӀиви духьну ккунийи кӀури, мидкан гъаврикк ккаъри ва му усбат апӀури гъахьну. Дугъу кӀуру:
– Гьадму Месигь узу учвуз улупурайи Иса ву.
4Дурарикан сакьюдар Аллагь кӀваъ уьрхру грекар ва хайлин адлу дишагьлийир хъугънийи ва Павелинна Силайин терефназ гъафнийи.
5Хъа хъугъну адру жугьдари, хъюлʼан базариин али алчагъ адмийир уч дапӀну, гъварч шулу ва вари шагьрик гъал кипру. Халкьдин улихьна адаъбан бадали, дурари, Ясондин хулаз дуфну, Павелна Сила агуру. 6Дурар душваъ дидрихъди, Ясонна жара гъардшар шагьрин гьякимарихьна гъахуру. Халкьди гьамцдар чӀигъар апӀурайи:
– Вари дюнʼяйиъ гъалабулугъ ипнайи гьаму касар гьамус гьаминара дуфна, – 7хъа Ясонди дурар чан хулаъ кьабул гъапӀну. – Дурар, Римдин паччагьтӀан хъана жара сар Иса паччагь а кӀури, Римдин паччагьдин гьюкмиз къаршу удучӀвура.
8Мициб хабарну халкьдик ва шагьрин гьякимарик гъалабулугъ кипру. 9Дурари Ясон ва имбу хъугънайидар, чпи азад апӀбан бадали, пул тувуз мажбур апӀуру, ва хъасин дурар деетуру.
Верияйиъ цӀийи читинвалар хьуб
10Гъардшари гьадму йишван дишла Павелна Сила Верия кӀуру шагьриз гьаъру. Дина гъафибси, дурар жугьдарин мистаз гъягъюру. 11Мушван адмийир ФессалоникайиндартӀан фикирлудар вуйи: дурари Агъайин Гаф лап аьшкьниинди кьабул гъапӀнийи. Павелина Силайи кӀурайиб гьякь вуш аьгъю апӀбан бадали, гьар йигъан БикӀбар ахтармиш апӀури гъахьнийи. 12Натижайиъ жугьдарикан гизафдар, хъа гьацира хайлин грекар ва адлу дишагьлийирна жилар хъугъувалиина гъафнийи.
13Фессалоникайин жугьдар, Павели Верияйиъра Аллагьдин Гаф рабгъурайиваликан аьгъю дубхьну, гьадина дуфну, халкьдик гъалабулугъ кипуз ва дугъʼин алауз хъюгъру. 14Гьадмуган гъардшари тяди Павел гьюлин гъирагъдихъна гьаъру, хъа Силана Тимофей гьадушваъ гъузру. 15Павелихъди гъушдари думу Афинайизкьан гьаъру. Дилин хътакурайидарихь Силайизна Тимофейиз «Шлубкьан ухди узухьна гъачай», – кӀури, Павели дибикӀнайи кагъаз хьайи.
Павел Афинайиъ хьуб
16Силайизна Тимофейиз ккилигурайи Павелин рюгь убгури гъабхьну, гьаз гъапиш дугъаз шагьур идолари абцӀну гъябкънийи. 17Мидкан дугъу мистаъ жугьдарихъдина Аллагь кӀваъ айи грекарихъди ва гьар йигъан базар – майдандиин алахьурайидарихъди сюгьбатар апӀури гъахьну. 18Сакьюдар эпикурчйир ва стоикар вуйи философар дугъахъди гьюжатнаъ учӀвру. Дурарикан сакьюдари: «Му лягълягъиз фу пуз ккунди айкӀан?», тмундари: «Думу, рякъру гьялариан, яд аллагьарикан улупурайир вуйкӀан?» – кӀури шуйи. Дурари мици гьаддиз кӀурайи, гьаз гъапиш Павели Исайикан ва Думу чӀиви хьуваликан Ужувлан хабар рабгъурайи. 19Дурари Павел Ареопаг тепейиин уч шлу мажлисназ духну, дугъхьан гьерхру:
– Уву рагъурайи гьадму аьгъювалар фу вуш, учуз аьгъю апӀуз хай даршулин? 20Фицики ич ибарихъна саб аьжайиб хабар гъюра; гьаддиз учуз, му фу вуш, аьгъю дубхьну ккунди ачуз.
21Афинайин агьалйирин ва душваъ яшамиш шулайи гъурабйирин пише чпин вахт, сюгьбатар апӀури вая гьар жюрейин цӀийишнар гьял апӀури, адапӀувал вуйи.
Павелин Ареопаг мажлисдин улихь улхуб
22Павели, Ареопаг мажлисдин улихь дийигъну, гъапнийи:
– Афинайин агьалйир! Рябкъюразузки, учву гизаф идолар кьабул апӀурачва, 23фицики узу шагьриантина гъягъюрайиган ва ичв гирами йишвариз лигурайиган, «Мялум дару аллагьдиз» кӀури дибикӀнайи гъурбан апӀру йишвра гъябкъюнзуз. Магьа учву, Учв фуж вушра аьгъдарди, икрам апӀурайи Аллагь, узу учвуз ачмиш апӀурайи Гьадму Аллагь ву.
24Дюнʼя ва дидиъ айикьандар вари яратмиш гъапӀу Гьадму Аллагь заваринна жиларин Агъа хьпаз лигну, Думу инсанарин хилариинди гъапӀу дараматариъ яшамиш шуладар. 25Дугъаз инсанарин хилариинди апӀурайи кюмек ккундар, гьаз гъапиш Дугъаз гьич фтинкӀа игьтияж адар. Дугъу чав инсанариз гьарсаб тувра: уьмурра, нефесра ва гьаци вари миди вуйи ужувларра. 26Аллагьди сифте сар кас, хъа дугълантина дюнʼяйин вари инсаният арайиз гъабхну. Дурар яшамиш шлу вахтар ва йишвар улупну. 27Аллагьдин метлеб халкьари Учв агуб вуйи. Мумкин ву, дурар Дугъахьна рукьузра, дурари Думу агузра. Думу ухькан гьарурин багахь хьа. 28Фицики ухьу Гьадгъуинди яшамиш шули, лицури ва нефес хътабгъури ахьа. Ичв шаирарикан сасдари гъаписи: «Ухьу Дугъан веледар вухьа».
29Гьаци вуйиган, ухьу Аллагьдин веледар вуди, Аллагь гъизилиз, арсраз вая гъвандиз, инсандин устадвалиинди ва хиялниинди яратмиш дапӀнайи суратназ ухшар ву пну, фикир дапӀну ккундар. 30Аллагьди ихь аьгъдруваларин вахт ихь тахсир вуди гьисаб апӀурадар, хъа гьамус Дугъу варишвариъ вари адмийириз чпин тахсрар гардандиъ дисуб амур апӀура. 31Фицики Дугъу вари дюнʼяйин гьякьди суд апӀру йигъ улупна. Чав улупнайи Инсанди гьадму суд апӀиди. Аллагьди, Думу, гъачӀихъан, чӀиви дапӀну, варидариз шагьидвал тувну.
32ГъачӀихъан чӀиви хьубкан деебхьну, дурарикан бязидар: «Мидкан хъа ражари ктибтара» пну, кялхъюз хъюгъру. 33Гьаци вуйиган, Павел дурарихьан гьудучӀвну гъягъюру. 34Хъа сакьюдари, дугъахъ хъугъну, дугъан тереф бисуру. Дурарин арайиъ Дионисий кӀуру Ареопаг мажлисдин иштиракчи, Дамар кӀуру дишагьли ва хъана жарадарра айи.
Trenutno odabrano:
Ляхнар 17: ТабГК
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Институт перевода Библии, 2010, 2013, 2016, 2018, 2023