Popularni biblijski stihovi od Efesios 4

Podijeli

Daiñi, Suxi Kristo bhai dui gïr bïïtarï kaxkïdï Diuxi soi gï ïrhidi gïr nïiditai dai gïr oigïrhi. Xibi aapimï abïr kïï tutiaka jaa bïïtarï ïpï daidi abïr soi gïn ïrhiada nïiditai. Daidi abïr oigïrhiada ïpï ïpïan dukai xi Diuxi gïr oigïrhi.

Maiti abïr gïgïrdukïdï gïn ïrhiada ïïgi aapimï toma lachi dai kïïga abïr tutiaka jaa bïïtarï. Gupurtudabїrai gïn iibhïdaga daidi abïr mai ojodada go gaa buaboitudadami. Bhaiyoma abïr gïn oigïada aipakoga tomax dukai.

Maiti abïr xigalnaxi ñoki aagada ïpï toma lachi. Gï agai xi aagada aapimï mosïkaxi ix makïdï ïr soiñi jaa bïïtarï xi kïïga abïnakiadan taadakagi ïgai kaïkatai.

Gï agai sai ka mai bhakoitïrakagi aapimï tomarhi xi gakokodadagi. Abïr mai soimaaxi ñokada jaa bui daidi abïr mai yaatagïda ïpï dai mai kïïdada jaa ïpï.

Daidi abïr mai soimaaxi ibuada dagitokai xi gïn maitiagi bhaamudagai. Maiti abïr gïn dagito xi apia bhakoikagi aapimï ka dupikai tasai. Xïduñada maakiagi aapimï go diabora ixdukatai soi gïn buadagi.

Kaxkïdï abïr maigobai dasa go ïkidadï gïn tïgibudaga ïmadï ïkidadï gïn oidakaraga. Gobai mos ïr ïï soimaaxkamikana dai gïn bupuirumadaiña gobai gïn maakaitai tïgibudagai xi iduña ïrhiadagi aapimï ix makïdï maiti ïr soiñi. Kaxkïdï gï agai sai utudutuldagi aapimï gïn tïgibudaga xibi. Daiñi, Diuxi kaxi gïn utuduturhi. Odami utudui aapimï xibi. Kaxkïdï abïr dagito gïn ïkidadï ibhïdaga tïgibudadï dai gïn utudui ibhïdaga tïgibudadï abïr bhïiyi bhaiyoma. Utudui odami aapimï xibi tudu, ix makïdï Diuxi ïïgi ïpïamaaxkami idui. Gïn dui ïgai saidi ïr ïko darasadïkana aapimï ïgai, bai kïï sïïrhi óídakagi aapimï ïïgiditai ix makïdï ïr buaboi.

Bïïxi gïn gubukarhigakïdï abïr gaaga ixdukatai mos ïmo tïgibudagai biaka aapimï daidi ïmo aadunumï dukai abïr óídaka. Diuxi Ibhïadï ïgai dai gïn soikïi tudu xi kïï xioma óídakagi aapimï ïmo aadunumï dukai.

Suxi Kristo ïgai dai maa oidaragai aatïmï buaboitudadami bïïtarï tudu. Ïïmoko maa ïgai gubukarhigai saidi ïr Suxi ojotosadïkana. Dai jaa maa ïgai saidi ïr aagadamikana Diuxi ñokidï dai jaa saidi ïr aipako aituldiadamikana go bhai ïrhiaragai aatagi dai jaa saidi ïr nukadakamikana go gaa buaboitudadami dai maatïtuldiadami Diuxi ñokidï ïpï. Podukai Suxi Kristo darai ïïmoko saidi ïr soikïdamikana go gaa buaboitudadami. Ïgai bia aaduindagai xi bhai duiñturhiadagi go gaa buaboitudadami gïn aaduindagïrï bïïtarï ix makïdï gïn biturhi Suxi Kristo. Saidi aipakoga gïn abïnakidiña ïgai ïmo gïn aadunumï dukai. Suxi Kristo darai odami podukai gïr saagida saidi gïr soiñana xi aatïmï gïr abïnakiadagi aipakoga. Dai apia gïr abïnakiadamu aatïmï aipakoga aidï asta xïïxkadï kïïga ïmo tïgibudagai bipiatu aatïmï. Biakamu aatïmï ïmo tïgibudagai aidï oiditai gïr buaboidaraga ix makïdï ïmaduga dai kïïga ïïmadatai aatïmï Diuxi Maradï ïpï. Podukai gïïrhimu aatïmï asta xïïxkadï kïïga odan tutiakagi aatïmï ïpïan dukai Suxi Kristo.

Podukai gïr soikïitai go mui soikïdadami ix makïdï Diuxi darai gïr bïïtarï ka mai aarhi dukaikamu aatïmï. Go aarhi gia otoma bhïiyiña ïmai tïgibudagai kaïkatai aatagidï jaa. Otoma buaboitudaiña ïgai yaatabogami tudu ix makïdï bupuirumadai odami. Dïï aatïmï gia mai pomaaxkamu aidï. Aatïmï buaboitudadami oijadamu ixtumaxi ïr buaboi bhaiyoma, gïr oigïdaitai aipakoga. Podukai bïïx tasai bamioma gïïrhidamu aatïmï dai bïïxi aïkatai bamioma ïpïan tuigakamu aatïmï Suxi Kristo. Aatïmï buaboitudadami ïr tukugadï dukai Suxi Kristo dai ïgai ïr gïr moo.