KAOBAK 4
4
Kain si Abel
1Adamei haoyak Ev to jambei hoba sao mang akongko apbei, hoba saoei Kain#KAIN: tetlabü Maangsühbü hapenbü bukkei, hoba laukei, “Bunyubouei thuibüei ngei bousushou che hapa.” 2Hobaje tokei saoei haona Abel bukkei. Hobaje Abel sanlombü kikei, lausikei Kain sekmoubü kikei. 3Hobaje jih sühbüa Kainei haoeibü langle ka Bunyubou jungto lembü jungkei. 4#Ibr 4.11 Hobaje Abeleikei sanshuong yoka shaang shatbou hoba khoeibü haabü sungbakei. Hobaje Bunyubouei Abel hoba haoeibü lembü sungletkei. 5Lausikei Kain hoba haoeibü lembü asunglet; khoei Kain aeibou khauangkei, hoba hao the khümbei. 6Hobaje Bunyubouei Kain to laukei, “No aila khauangda, hoba no aila the khümda? 7Nyi maibü kümalonga no asungletlep si? Hobaje nyi maibü akümlonga shabü kho koukhüna semattiko kia, hoba haoei ka to dühda, lausikei nyi kho thükenjan.”
8 #
1 Jn 3.12 Hobaje Kainei haona Abel to laukei, “Seti yamto koukho.” Hobaje ladang haosi seka kikei, kheijinei Kainei haona Abel khulimbo meimeikei hoba hao haitikei.
9 Bunyubouei Kain to phekei, “Kana Abel lanei ki?” Haoei jongaikei, “Ngei angekei. Ngo küna lombou si?”
10Kheijinei Bunyubouei laukei, “Nyi ai kümbei? Kanaeibü siiei kao ka kü to ngekda. 11Hobaje tou kaoei kanaeibü sii sungletla haakouan ki hoba kho kao ka ka to shedsikhau bauda. 12Nyi ladang kao moulaje kaoei ka la kesiong ayemtikulabü; kaonyudaka no sateibü hoba shoongaibü chela yeilabü.”
13Kainei Bunyubou to laukei, “Ngeibü kayang kho ngei natenlabü to kei kaangbou. 14Tat nyi ngo kaothe ka shian sattida; hoba kathe ka ngo hulabü, hoba kaodaka ngo satbümaubü hoba shoongaibü che la yeilabü hoba aoei ngo haplaje haoei ngo haitilabü.”
15Lausikei Bunyubouei hao to laukei, “Kho khei aying; aoei Kain haitilaje hao to nyetnei sühko phoklamlabü.” Hibü Bunyubouei atei hao hapan haitisi amaibüla dogo Kain la shensinge shangjinkukei. 16Hobaje Kain Bunyubou jungka satkei, hoba Eden chaang aenei Nod kaodaka kikei.
Kain Thensilen
17Kain haoyak to jambei hoba sao mang akongko apbei hoba bousushou che Enok bukkukei. Kheijinei Kainei sangnyu che kümbei hoba khola haoshou Enok nyen nyenkukei. 18Hobaje Enok la Irad bukkukei; hoba Irad kho Mehujaeleibü bou; hoba Mehujael kho Methushaeleibü bou hoba Methushael kho Lamekeibü bou kikei. 19Hobaje Lamekei yak nyi ngakei; cheeibü nyen Ada, hoba lubü cheeibü nyen Zila kikei. 20Hobaje Adaei Jebal bukkei; hao neichema kibü hoba samkeisamuk kibü shuongeibü bou kikei. 21Hobaje haoeibü na nyen Jubal kikei, hao kongkin si pithung jungeibü shuongeibü bou kikei. 22Hobaje Zilaei Tubal Kain bukkei, ao chinam hoba nameibü peisilei pendou jangbü müt kikei; hoba Tubal Kaineibü na yaksa Naama kikei.
23Lamekei haoeibü yaksi shuong to laukei,
“Ada si Zila, kü ngüh ditashi:
Kan Lamekeibü yaksi shuong,
ngeibü ngüh ditashi:
Ngo leilutibü shanga ngei müt che,
hoba kü la aktibü shanga ngei heshou che haitia.
24Kain haitisi langkei nyet lealonga,
Maimaitham ngo haitibou toje anjinlei to nyetnei phoklamlabü.”
Seth si Enok
25Hobaje Adamei jembü yak to tokei jambei hoba bousushou che bukkei, hoba haoeibü nyen Seth#SETH: tetlabü Kuakei nyenkukei. Saoei laukei, “Mühghaüei Abel jeiko kü la lilabü lubü che pienkukei; aieilausi Kainei hao haitikei.” 26Hobaje Seth lakei bousushou che bukkukei; hoba haoei hao nyen Enosh dogo nyenkukei. Kheijinei mütshuongei Bunyubou saopobü nyen jungeiko ngala khangkei.
वर्तमान में चयनित:
KAOBAK 4: CHANGBSI
हाइलाइट
शेयर
कॉपी
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.