Sáni Mateo 6
6
Jesusi jarhop'erakueri ampe jurhentpesti
1“Ásï jáma je uánekuechani japarini sési pakarakuekani, sési ampe úrini, jimpoka ekats'ï ísï jámaska, chári Táte enka auantarhu jaka nómpemaksïni íntskuati.”
2“Ka enkari no jatsikorherichani jarhuatauaka, ásï méntku imani uantaparini jáma, ísï eskaksï na jámka ísku ísï uantaricha, k'umanchekua tánkorhentskuecharhu ka xanharu jimpoksï uékani eskaksï k'éri ampe arhinhaaka. Sési jimpoksïni arhisïnka, eskaksï ima antakua intsïnhaskia. 3K'óru t'u na enkari jatini no jatsikorherini ma jarhuataaka, ásï míte chéti ják'i uikixkantani ampe enka jurhik'antani íntspeka, 4eska sïpatekuarhkueuaka chéti jarhop'erata ka chéti Táte enkakini sïpatekuarhku exek'a, imakini maiamuati.”
Jesusi, Diósïni uantap'ani jurhentpesti
(Lk 11.2-4)
5“Na enkari jatini Diósïni uantap'aaka, ásï xáxe eskaksï ima enkaksï ísku ísï uantak'a, jimpokaksï ima tsitisïnka anhaxurhitini k'umanchekua tánkorhentskuecharhu ka terurukuecharhu uantamukukorheni; sési jimpoksïni arhisïnka eskaksï ima maiamunhatixakaia. 6K'óru t'u, na enkari jatini Diósïni uantap'aaka, inchakorhentsï ka mínhakorheni ka jantiok'u chéti Táteni aiankukorhe, ka chéti Táte enka sïpatekuarhut'u exek'a, imakini maiamuati.”
7“Ka ekari Diósïni uantap'aaka ásï mémechani uéntsï méntkueni arhini ísï eskaksï ima enkaksï no jakak'uk'a, enkaksï xáni uantauantametini ísï eratsek'a eskaksï ísï kurhanhaaka. 8Ásïchka ts'éntakuantsï je, jimpokats'ï nótki jamperi aiankuni jauaka chári Táteni, ka ima t'uíni mítetini jarhasïntiia ampets'ïsï uétarhenchani jarhak'i. 9Cháchka arisï kómarhip'ekorhe je:
‘Táte, enkari auantarhu jaka,
k'éri ampeskari, chéti jakankurhikua
kánekua k'éri ampesti.
10Chéti irechekuats'ïni janoche.
Úkorhe parhakpeni ísï eskamenturi t'u na uék'a,
mák'ueni eska auantarhu na úkorheni jaka.
11Íntskuts'ïni iásï, mántani pauani anapu t'irekua.
12Púachent'ats'ïni ampe enkachi nósesi útspeka,
ísï eskani jucha na púakuantak'a imechani enkats'ïni nósesi úcheka.
13Ásïts'ïni jiáreta eskachi ísku ampe niátaaka,
kéntitachets'ïni nósesi jásï ampe.
[Jimpoka chétiska Juramukua
ka uinhapekua ka k'érikua méntku isï. Ka ísïue.]’”
14“Ísï jimpo ekats'ï cha púatspentaska ampe enkaksïni nósesi úcheka, chári Tátet'uksïni, enka auantarhu jaka, púachent'aati; 15ka ekats'ï cha no púatspentaska, chári Tátet'uksïni no púachent'auati chári k'amanharhintskuechani.”
Jesusi k'arhinta jakueri jurhentpesti
16“Ekats'ï k'arhinta jauaka, ásï kómu jánharhintsï je, ísï eskaksï ima enkaksï ísku ísï uantak'a, enkaksï kómu nínharhiparini xarhatakorheni úek'a eskaksï k'arhinta jarhasïnka; sési jimpoksïni arhisïnka eskaksï ima maiamunhatixakaia. 17K'óru t'u na enkari jatini k'arhinta jauaka, jupanharhikorhe ka ampats'ïkorhe, 18eskari no xarhatatspeaka eskari karhinta jarhasïnka ka Tátentkuri xarhatakuni enkari t'úk'u p'ikuarhenheparini úk'a, ka chéti Táte enka iámentu ampe exek'a, imakini maiamuati.”
Auantarhu anapu jatsikorhekua kánerakorheni
(Lk 12.33-34)
19“Ásï parhakpeni anapu jatsikorhekua kánerakorhe je, ixu enka seperi arhak'a ka púni ka tereni ka enkaksï sïpak'urhecha sïpak'a. 20Sánteru sáni auantarhu anapu jatsikorhekua kánerakorhe je, jini enka seperi no arhak'a ka no tereni ka enkaksï sïpak'urhecha no úk'a sïpani. 21Jimpoka nani enka chári jatsikorhekua jauaka, chári mintsitat'u jima jauati.”
Éskua xékorhetarakuesti
(Lk 11.34-36)
22“Éskua xékorhetarakuesti; ísï jimpo eka chéti éskua ampakeka, t'úri iámu t'íkjantu jauaka; 23ka enka chéti éskua no ampakeka, iámuri páp'akantu jauaka, ka nóri úaka sési erak'uni enkari iámu páp'akanhetini jaka.”
Diósï ka jatsikorhekua ampe
(Lk 16.13)
24“Nónema úsïnti tsimani achechani marhuakuani, jimpoka ima ma ísïni kurhunheaka ka máteruni xénhchani, o ima ma ísïni sánteru sési kámaati ka máteruni ísku exeni. Nóts'ï úaka Diósïni marhuakuni ka jatsikorhekuantu marhuakuni.”
Uétarhesïnti Diósïni mintsikani
(Lk 12.22-31)
25“Ísï jimpo, jíksïni arhixaka: Ásï uantanhea je chári tsípekua jimpo, ampets'ï t'irea ka ampets'ï itsïmaa o xukuparhakua ampe jimpo ¿Anti no tsípekua sánteru jukaparhakueski eska t'irekua? ¿Ka anti no anhanhatakua sánteru jukaparhakueski eska xukuparhakua? 26Exea je káratichani, nóksï tsíri jatsisïnti ka níksï p'ikuntak'i ka níksï xanini patsarakua jatsik'i; ka k'óru chári Táte auantarhu anapu t'ireraasïnti. ¿Anti nóts'ï cha sánteru jukaparhaski eskaksï káraticha? 27¿Ka ne ua cha ma ísï náuek'i xáni jánkorhent'ani, imeri irekuani ma jurhiatekua kuturani? 28¿Ka antits'ïsï xukuparhakua jimpo uantanheak'i? Exea je, na enka jukak'a tsïtsïki juátarhu, nóksï ánchekorhesïnti ka nóksï p'arhasïnti. 29K'óruksïni ji arhixaka eska Salomoni, iámentu imeri jatsikorhekua jinkuni, no ísï kasïpentaspti eskaksï tsïtsïkicha na kasïpek'a. 30Ka enka Diósï tsïtsïki juátarhu anapuechani ísï kasïperak'a, enka iásï jukarini jaka ka enka tátsekua kurhiatanhak'a, ¿Anti no sánteru ampe ua chánksïni jimpo, sántku jakak'uticha? 31Ásïchka uantanhea je uantaparini: ‘¿Ampechisï t'irea o ampechisï itsïmaa o ampechisï xukuparhaa?’ 32Jimpokaksï no jakak'uticha iámentu íni ampe jimpo uantanheasïnka, ka cháts'ï Táte auantarhu anapuni ma kánkorhesïnka, enka mítetini jaka eskats'ï iámentu íni ampe uétarhenchasïnka. 33Jirinhantsï je urheta Diósïri irechekuani ka ísï jáma je eska Diósï na uék'a ka máteru ampets'ï ísku kúntamenhaaka. 34Ísï jimpo, pauani anapu ampe ásï uantanhea je, jimpoka mántani pauani jutsïkorheaka uantanheata jinkuni. Sésku jarhasïnti mántani pauani anapuk'u uantanheata.”
वर्तमान में चयनित:
Sáni Mateo 6: DKPJ
हाइलाइट
शेयर
कॉपी
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
