MATHAI 1
1
Jesuh Khrih Tacawthaih
(Luk 3:23-38)
1Hi loa Jesuh Khrih tacawthaih paruihaih ih cazin ni. Anih loa David ih catawn ah oh moa David loa Abraham ih catawn ni.
2Abraham hoitoah David Sangpahrang karoekto saezanawk loa: Abraham capa loa Isaak, Isaak capa loa Jakob, Jakob capa loa Judah hoi amnauknawk ni. 3Judah capa loa Perez hoi Zerah (anih hnit ih amno loa Tamar), Perez capa loa Hezron, Hezron capa loa Ram ni. 4Ram capa loa Amminadab, Amminadab capa loa Nahshon, Nahshon capa loa Salmon ni. 5Salmon capa loa Boaz (amno loa Rahap), Boaz capa loa Obed (amno loa Ruth), Obed capa loa Jesse, Jesse capa loa David sangpahrang ni.
6David dung hoitoah Israel kaminawk Babilon prae ah misong ah caeh o haih karoekto saezanawk loa: David capa loa Solomon (amno loa Uriah ih zu) ni. 7Solomon capa loa Rehoboam, Rehoboam capa loa Abijah, Abijah capa loa Asa ni. 8Asa capa loa Jehoshaphat, Jehoshaphat capa loa Jehoram, Jehoram capa loa Uzziah ni. 9Uzziah capa loa Jotham, Jotham capa loa Ahaz, Ahaz capa loa Hezekiah ni. 10Hezekiah capa loa Manasseh, Manasseh capa loa Amon, Amon capa loa Josiah ni. 11Josiah capa loa Jehoiachin hoi amnauknawk ni.#2 Sang 24:14-15; 2 Dung 36:10; Jer 27:20
12Babilon misong ah oh pacoeng hoitoah Jesuh zah karoekto saezanawk loa: Jehoiachin capa loa Shealtiel, Shealtiel capa loa Zerubbabel ni. 13Zerubbabel capa loa Abiud, Abiud capa loa Eliakim, Eliakim capa loa Azor ni. 14Azor capa loa Zadok, Zadok capa loa Akhim, Akhim capa loa Eliud ni. 15Eliud capa loa Eleazar, Eleazar capa loa Matthan, Matthan capa loa Jakob ni. 16Jakob capa loa Meri sava Joseph moa Joseph capa loa Messiah#1:16 Messiah tihae Hebru lok moa Khrih tihaih ih ni. naa pae ih Jesuh ni.
17Topongah Abraham hoitoah David karoekto ah dung hlaipalito, David hoitoah Babilon misong ah oh karoekto ah dung hlaipalito, misong ah ohhaih hoitoah Messiah zah karoekto ah dung hlaipalito ni.
Jesuh Khrih Zahhaih
(Luk 2:1-7)
18Jesuh Khrih zahhaih loa hitiah ni. Amno Meri loa Joseph hoiah lok angsuek hoi sut boah, to-e zuva ah angoh hoi ai nahlanah Cai Pakhra ranghoiah naukta ka naengh tih tito a panoek.#Luk 1:27 19Joseph loa hmuen katoeng to sak han ka koeh kami ni. To-e Meri hae minawk hma-ah ahmin setsak han koeh ai pongah lok amaih hoi haih ih to tamqu lamah phraek ving hanah angcaeng. 20Ato kawng to a dawn li na-ah a mang ah Angraeng ih vanmi longto anih khaeah amtueng moa, “David catawn Joseph, Meri hae na zu ah angoh haih hanah zi hmah. Kawmawtiah naukta a naengh ih hae Cai Pakhra ranghoiah ni. 21Anih loa naukta za ueloa ahmin ah Jesuh tiah na phuii tih, kawmawtiah angmah kaminawk to zaehaih ihnawk thung hoitoah pahlong tih,” a naa pae.#Luk 1:31
22Angraeng mah tahma patohhaih hoiah a thuih ih to acunghaih hanah hi hmuennawk hae a oh. A thuih ih loa, 23“Tangla kacuem longto pom ueloa capa longto za tih, ahmin ah Immanuel phuii o tih,” (Immanuel tihae, “Sithaw aicae khaeah oh” tihaih ih ni).#Isa 7:14
24Joseph loa ih anglawt na-ah Angraeng ih vanmi mah a thuih pae batiah Meri to a zu ah angoh haih. 25To-e a capa za airoek loa anih hoiah iip hoi nawn ai. Capa zah ih to Jesuh tiah a phuii.#Luk 2:21
वर्तमान में चयनित:
MATHAI 1: AKNT2023
हाइलाइट
शेयर
कॉपी
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.