Kut 1
1
Okuhangwa kw'eiguru n'ensi
1Omu kutandika kw'ebintu byona obu Ruhanga yaahanga eiguru n'ensi, 2ensi ekaba etaine ku erikushusha, erimu busha, n'omwirima gushwekire amaizi agari okuzimu, Mutima wa Ruhanga naazeereera eruguru y'ago maizi. 3Ruhanga akagira ati: Habeho ekyererezi; ekyererezi kyabaho. 4Ruhanga yaareeba ekyo kyererezi kiri kirungi; yaakitaanisa n'omwirima. 5Ruhanga ekyererezi yaakyeta Nyomushana, n'omwirima yaagweta Nyekiro. Mpaho bwaira bwasheesha, kyaba ekiro ky'okubanza.
6Kandi Ruhanga yaagira ati: Habeho orukanga ahagati y'amaizi, rugataanise na magyenzi gaago. 7Ruhanga yaahanga Orukanga, yaataanisa amaizi g'ahansi yaarwo n'ag'ahaiguru yaarwo kandi kyaba kwo. 8Haza orwo rukanga Ruhanga yaarweta Eiguru. Bwaira bwasheesha, kyaba ekiro kya kabiri.
9Kandi Ruhanga yaagira ati: Amaizi g'ahansi y'eiguru gateeranire omu mwanya gumwe, eitaka rireebwe. Haza kyaba kwo. 10Ruhanga eryo itaka yaaryeta Ensi, n'eiteeraniro ry'amaizi yaaryeta Enyanja. Ekyo Ruhanga yaareeba kiri kirungi.
11Ruhanga yaagira ati: Ensi emeze ebirikumera ebirikwera enjuma n'ebiti ebirikwana ebijuma, ebiine embibo, buri kimwe omu muringo gwakyo. Haza kyaba kwo. 12Ensi yaameza ebirikumera ebirikurugwamu embibo, nk'emiringo yaabyo oku eri; n'ebiti ebirikwana ebijuma ebirimu embibo, buri kimwe nk'omuringo gwakyo oku guri. Nakyo Ruhanga yaareeba kiri kirungi. 13Bwaira bwasheesha, kyaba ekiro kya kashatu.
14Kandi Ruhanga yaagira ati: Habeho ebirikwaka omu rukanga rw'eiguru, okutaanisa nyomushana na nyekiro; bibe obumanyiso bw'obunaku n'emyaka, 15kandi byakire omu rukanga rw'eiguru kuhwezesa ensi. Haza kyaba kwo. 16Ruhanga yaahanga ebirikwaka ebikuru bibiri: ekirikwaka munonga kutegyeka nyomushana, n'ekirikwaka mpora kutegyeka nyekiro; yaahanga n'enyonyoozi. 17Ruhanga yaabita omu rukanga rw'eiguru kwakira ensi, 18kutegyeka nyomushana na nyekiro, n'okutaanisa ekyererezi n'omwirima. Ruhanga yaareeba kiri kirungi. 19Bwaira bwasheesha, kyaba ekiro kya kana.
20Kandi Ruhanga yaagira ati: Amaizi gaijurwemu ebintu bingi ebiine amagara, n'enyonyi zigurukire ahaiguru y'ensi, nizicwekanisa omwanya gw'ahaiguru. 21Mpaho Ruhanga yaahanga ebikooko bihango by'omu nyanja, n'ebihangirwe byona ebiine amagara, ebirikwegyendesa ebiijuriraine omu maizi, nk'emiringo yaabyo oku eri; n'ebirikuguruka byona ebiine amapapa, ebya ibara muringo. Ruhanga yaareeba ekyo kiri kirungi. 22Ruhanga yaabiha omugisha, naagira ati: Muzaare, mukanye, mwijure omu maizi g'omu mayanja, n'ebirikugurukisa amapapa bikanye omu nsi. 23Bwaira bwasheesha, kyaba ekiro kya kataano.
24Kandi Ruhanga yaagira ati: Ensi erugwemu ebiine amagara, nk'emiringo yaabyo oku eri: Amatungo n'enyamaishwa, nk'emiringo yaabyo oku eri. Haza kyaba kwo. 25Ruhanga yaahanga enyamaishwa n'amatungo na byona ebirikugyendesa enda; ebyo byona nk'emiringo yaabyo oku eri. Ekyo Ruhanga yaareeba kiri kirungi.
26Bwanyima Ruhanga yaagira ati: Tukore omuntu omu nshusha yaitu, ashushane naitwe, haza ategyekye ebyenyanja n'enyonyi z'omu kaabunga, n'amatungo n'enyamaishwa z'omu nsi yoona na byona ebirikugyendesa enda ebyekurura aha itaka. 27Atyo Ruhanga yaahanga omuntu omu nshusha ye, yaamuhanga naashushana nawe, yaabahanga bari omushaija n'omukazi.
28Ruhanga yaabaha omugisha, yaabagira ati: Muzaare, mukanye, mwijure ensi, mugikubuure; mutegyekye ebyenyanja n'enyonyi z'omu kaabunga, na byona ebirikugyendesa enda aha itaka. 29Kandi Ruhanga yaagira ati: Reeba naabaha ebimera byona ebiine embibo, ebiri hoona omu nsi, n'ebiti byona ebiine embibo omu bijuma byabyo, bibe ebyokurya byanyu. 30Enyamaishwa zoona ez'omu nsi, n'enyonyi zoona ez'omu kaabunga, na kyona ekirikugyendesa enda aha itaka, naabiha byona ebiine amagara ebirikumera, kuba ebyokurya byabyo. Haza kyaba kwo. 31Ruhanga yaareeba byona ebi yaahangire biri birungi munonga. Bwaira bwasheesha, kyaba ekiro kya mukaaga.
Ruhanga okuhuumura aha kiro kya mushanju
वर्तमान में चयनित:
Kut 1: RKK2008
हाइलाइट
शेयर
कॉपी
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.