Vikolwa 13
13
1Va li ho mu livugana lya li mu Antiokia, avaprofeti navegidzi, Baranaba na Simeoni wa li na a langwa Nigeri, na Lukio wa Kurene, na Manaeni wa nyunnywa na Herodi mwami u kola vavaka, kandi Saulo. 2Navo lwa va li ni va tumekira Mwami, ni va honga lilia, Roho Mutakatifu ya va volera, Mu ntwulidzire Baranaba na Saulo kigira miyinzi gya mba langira. 3Hene yaho lwa va mala kuhonga lilia, ni va saala, ni va vika kuvo makono gavo, va va tuma va tsie.
4Kunangwa navo, va tumwa na Roho Mutakatifu va sulunguta kuduka Seleukia; na kutwula yaho va nina mu bwato va tsia Kuporo. 5Kandi lwa va li mu Salamisi vilwadza likuva lya Nyasaye mu masomero ga Vayuda: navo va li na Yohana mutumekiri wavo. 6Kandi lwa va mala kuvita kisulu kyosi kuduka Pafo, va nyola musegetiri mulala, muprofeti wobubehi, Muyuda, lieta lilye lya langwa Bar-Yesu. 7Uyu ya li halala nomunyampara, Serigio Paulo, mundu wobugeeri. Uyu ya langa Baranaba na Saulo va tsie kuye, yenya kuhulira likuva lya Nyasaye. 8Navutswa Elirna, musegetiri (kigira lieta lilye li veye ndiyo kugirunkanywa) ya hangalidzana navo, yenya kutwulidza munyampara ku lisuuvira. 9Navutswa Saulo, wa langwa Paulo, yizula Roho Mutakatifu, ya mwumika, 10na a vola, E ive wizula ubugadi nekirage kyosi, mwana wa setani, musigu wobulungi bwosi, si u leka kukyaminya tsinzira tsinungi tsyo Mwami? 11Kalunu henza mukono gwo Mwami gu veye ku ive na ive u la vakula, u ta lola liuva inyinga i duki. Nonoho amatsengeri nekisundi kya duka kuye, ni yenya avandu kumugumira mukono kumwimirira. 12Hene yaho munyampara, lwa ya lola aga kolwa, ya suuvira na a genya ku amegidzo go Mwami.
13Paulo navakye veve va nina mu bwato kutwula Pafo, ni va duka Periga lya Pamfulia. Kandi Yohana ya va leka ni yirana Yerusalemi. 14Navutswa navo va vita kutwula Periga, ni va duka Antiokia lya Pisidia. Kandi vingira mu lisomero lidiku lyelisabato ni vikala 15Inyima yelisoma amalago navaprofeti, avanene velivugana va tuma mundu kuvo, ni va vola, Avamitu, ni mu veye nelikuva lyokweganehidza avandu, mu vole. 16Paulo ya singira na a va sima nomukono na a vola.
Avasatsa va Israeli, na mwinye ava tia Nyasaye, mu huliridze: 17Nyasaye wa vandu yava Israeli ya tovola vaguga vetu na a va nenehidza lwa va menya mu kivala kya Egepeti, na a vimirira na a va twulidza nomukono gwetsingulu. 18Kandi ya va ha vyokulia kuli ise a lera, kuduka mbula mihiga amakumi gane, mu kyangalangwi. 19Kandi lwa ya mala kwononnya tsihiri tsitanu na tsiviri mu kivala kya Kanani, ya ra ha kivala kyavo ki ve mwandu kuduka imihiga tsimia tsine na makumi gatanu. 20Inyima yevindu yivi ya va ha avakalagi kuduka madiku ga Samweli muprofeti. 21Lwanyima va saava va hebwe mwami: na Nyasaye ya va ha Saulo mwana wa Kishi, mundu wehiri ya Benjamini, kuduka inyinga yemihiga amakumi gane. 22Lwa ya mala kutwulidza uyu, ya singeridza Daudi a ve mwami wavo; wa ya lolekidza na a vola, Nyoye Daudi mwana wa Jesse, a veye mundu ku lugano lwomwoyo gwange, u li kola ubulaliri bwange bwosi. 23Ku likula lyomundu uyu, kuli lilagana lilye, Nyasaye ya letera Israeli Muhonnyi, naye ni Yesu. 24Inyinga ya li na a kikiri kuduka, Yohana ya mala kwilwadzira avandu vosi va Israeli, libatidza lyokweganira. 25Yohana lwa ya li ni yenya kumala ulugendo lwilwe, ya vola, Mwinye mu ganagana inze mbeye ibwaha? Inze si a li iye mba. Navutswa uyu mulala yadzanga inyima wange, si ndukana kumubohololira vilatu vyevirenge vivye. 26Mwinye avamitu, avana velikula lya Abrahamu, navo ku mwinye ava tia Nyasaye, likuva lyobuhonnyi yibu li letwa ku kwinye. 27Kigira yava ava menya Yerusalemi, navanene vavo, kigira si va mu manya, kandi si va manya myoyo gyavaprofeti ava somangwa amasabato gosi va va dukidza ku limukalagira. 28Kandi kali va vula kulola kuye kindu kyokumwiitira va saava Pilatu, yiitwe. 29Kand; lwa va mala kukola amakuva gosi ga ng'odwa kuye, va mu twulidza ku musala, ni va mu vika mu kilindwa. 30Navutswa Nyasaye ya mu simugukidza kutwula mu vakudzi: 31naye ya loleka madiku manyingi ku yava avanegira kutsia Yerusalemi halala naye kutwula Galilaya, yava nivo avalolekidzi veve imbiri wavandu kalunu. 32Kandi kwinye ku letera mwinye amakuva malahi, agelisuuviridza lya vaguga va hebwa, 33kuli Nyasaye ya dukidza lisuuriridza zana ku vana vetu, ku lisimugukidza lya Yesu; kuli ga ng'odwa kandi mu zaburi yetsiviri, Ive u veye Mwana wange, lero mmali kukwivula. 34Kandi ku makuva ga ya simugukidza mu vakudzi, a tirana kandi kwoneka, a vola ndi, Nda mu ha ubugasu bwa Daudi butakatifu nobusuuviridzi. 35Kigira a vola mu zaburi yindi, Si u nyala kuhaana Mutakatifu wowo a lole ubwoneku. 36Kigira Daudi, lwa ya mala kutumekira mu likula lilye ku makuva ga Nyasaye, ya gona tsindolo, na a daswa ku vaguga veve na a lola ubwoneku: 37navutswa uyu wa Nyasaye ya simugukidza si ya lola ubwoneku mba. 38Kigira yaga, ga manyekane ku mwinye, avamitu, ku mundu uyu mwilwadzwa lisameha lyobwoni: 39kandi ku uyu, vosi va mu suuvira va hebwa ubulungi ku litwulidzwa lya vyosi vyelilaga lya Musa li ta nyala kutwulidza. 40Kunangwa mu henze bulahi gase ga ladza ku mwinye agavaprofeti va vola:
41Henzi, mwinye avalegi, mu genye mu kame;
Kigira nda kola muyinzi mu madiku genyu,
Muyinzi gwa mwinye mu ta nyala ligali kusuuvira, mulala na a va na a mbuulira.
42Lwa Avayuda va li ni va twula, Avetsihiri va saava va volerwe amakuva yaga ku lisabato lindi. 43Livugana lwa lyavukana, Avayuda vanyingi navizamiri valahi va londa Paulo na Baranaba; ava volerana navo ni va veganehidza va menye mu tsimbabasi tsya Nyasaye.
44Ku lisabato lindi fwana lidala lvosi va vugana kuhulira likuva lya Nyasaye. 45Navutswa Avayuda vizula imbodoka lwa va lola viduma, ni va hangala ku vindu vya Paulo ya vola, ni va nyega. 46Paulo na Baranaba va luvirira ni va vola, Li nigwa likuva lya Nyasaye li tanga kuvolwa ku mwinye, navutswa kigi ra mu li luguta ihale, kandi si mwelola mu veye avalahi kuduka livamwoyo li ta hera mba, mu henze, kwinye ku girunkanira Tsihiri. 47Kigira Mwami ya ku laga ndiyo, na a vola,
Mmali kukuvika u ve ubulavu bwe Tsihiri,
U ve nobuhonnyi kuduka ku kiheri kyelirova.
48Avetshihri lwa va hulira yaga va tsantsalika ni vidzominya likuva lya Nyasaye: ni va suuvira vosi ava vikwa ku livamwoyo li ta hera mba. 49Likuva lyo Mwami lya landa mu kivala yikyo kyosi. 50Navutswa Avayuda va gemehidza avakali ava tia Nyasaye navalahi, kandi avasatsa avanene velidala, na va vukidza lidambidza ku Paulo na Baranaba ni va va kunga mu tsinzako tsyavo. 51Navutswa navo va veyera ulugukyi lwevirenge, ni va tsia Ikonio. 52Kandi avegidzwi vizula ubuyanzi na Roho Mutakatifu.
वर्तमान में चयनित:
Vikolwa 13: MBE
हाइलाइट
शेयर
तुलना
कॉपी
Want to have your highlights saved across all your devices? Sign up or sign in
©Bible Society of Kenya, 1967
