METIU 2
2
Sanggatokkc Gvka:la Ka:nckvdvng
1Herodbv migom dodagdo cdvlo Judia:dok Betelehemdo Jisumc otonc, Ka:toka, kinnc tani:ckkcnc mo:pv sangatokkc Jerusalempc gvto scmpc lula, 2“Bv okolon sc:kom Jiwudi:kvdv:dok migompc otu:nc? Kapila:nc Bvk takarcm ngolu sanggato ka:begto, odokkc Bvm kumkapc gvdung.” 3Herod migombv cdcm tadbegsunamc, bv dunga:la:tomang, bvk lcdulo Jerusalemdok appvngcsin; 4odo kumnam ager gergcbonc bottarya:nc tani: appv:dcm odokkc tani:kvdv:dok potin adnckvdv:dcm, bulum bv Kristomc okolo oycnc tauto. 5“Bulu bvm lubito, Betelehemdok Judia:do; Kapila:nc cdcmpc agom lungorla lunc tani:kvdv:dc adtag:
6‘Odokkc no, O Betelehem, Judia:dok amo:lo,
kapcsinci idaggom Judia:dok migom donckvdv:dok
ara:lo adji:ncmang;
Kapila:nc nokkolokkc migom doncko lenyc sc:kobv ngok Israel tani:kvdv:dok
migompc iyckunc.’ ”
7Odo Herodbv po:lo takar do:yvng kinnc tani:kvdv:dcm ami kinmango:pc gokkumsuto odokkc oko ayirardokkc takardc buglenka:nc bulukkolok aiyo:pc tauto; 8Odokkc bv bulum Betelehempc mclvgto, scmpc lula, “Gvkang odokkc kowaodcm mcnggabdanna mata:ka, odokkc cdvlo nolu bvm mapa:ycnc ngom lutadlang, ngo:sin gvla:dopc odokkc bvm kumla:dopc.” 9Bulu migomdok agomdcm tadamge:la buluk gvpckolo:pc gvkang; odokkc ka:toka, bulu oko takardcm sanggato ka:tunganc cdc bulum gvgcla gvpongkang, cdc kowaodcm okolo otunganc odo dungkodo:pc gvla gvpv:ma:sisscm. 10Cdvlo cdc takardcm ka:begtonc, bulu mc:pobasudanna mc:poto, aipakpc mc:pokang; 11Odokkc okum arardo:pc gva:labulu Bvk anc Meri:kc lcdulo du:mvnnamdcm ka:to, odokkc bulu cgsordanna Bvm kumto. Odokkc, buluk airu:pc arckanc gasumkvdv:dcm sarrento, bulu Bvm amancm bito, avncm odokkc dunangcm odokkc namponc tulangcm. 12Odokkc Herodkolo:pc gvlatkuma:pcka cmna ma:nyi:bo lusvng lutadcm pa:la, bulu angu lambckolok av avkc dungko amo:pc gvngapkangku.
Ijippc Dugsila Gvnam
13Cdcmpc idodcm cdvlo bulu gvngapkangkunc, ka:toka, ma:nyi:bo Ru:tumkc taycng among lutad lunckonc Jusepmc lcngkansuto odokkc luto, “Darobtoka, kowaodcm odokkc bvk ancdcm gvbotok, Ijippc dugsila gvbokangka, odokkc ngok lukuma:dodo:pc ollung du:lang; kapila:nc Herodbv kowaodcm magabge:la mokepc cmna marobbomdung.”
14Odo bv darobto odokkc kowaodcmnang bvk ancdcm yummcm gvbokang, odokkc Ijippc gvpakbokang, 15odokkc Herodkc sidodo:pc ollung du:boto. Sc agom lungorla lunc tani:kvdv:dcm Ru:tumbv okodcm lutunganc cdcmpc ipcnamdcmpci ikang, “Ijipdokkcm ngok awodcm ngo goglentoku.”
Ko:kang Kvdv:dcm Mokenam
16Odo Herodbv po:lo takar do:yvng kinnc tani:kvdv:dc bvm yatto cmna kinto, dungkinyckinma:pc aglvng sangkang, odokkc odok dungko anin amo:dok dv:tak anyikoba cdcm ame:ya:nc milbong ko appv:dcm mokeamdopc tani:ycm mclvgto. 17Odo Jeremia: agom lungor luncbv okodcm lutaganc cdcmpc ikang:
18“Rama:do kabnamclang bottaru:pc jc:la kaban bannamko tadbegto,
Rahelbv bvk ommangkvdv:dok lcgangc kabla: kabla;
bv kabtcrsulv:tomang, kapila:nc bulu kangaptomang.”
Ijipdokkc Gvlatkunam
19Ckvdaggom cdvlo Herodbv sika:nc, ka:toka, Ijipolo Ru:tumkc taycng among lutad lunckonc ma:nyi:bo Jusepmc lcngkansuto, scmpc lula, 20“Darobtoka, kowaodcm odokkc bvk ancdcm gvbokang, odokkc Israel dungkopc gvkangkuk, kapila:nc sc:kobulu kowaodcm mokepc cmna madaganc bulu singabka:bong.” 21Odokkc bv darobto odokkc kowaodc:lang ancdc:sin, odokkc Israel dungko amo:do:pc gvkangku. 22Ckvdaggom Arkelaubv bvk abu Herodkc du:tc:lo dung cmna cdvlo bv tadtonc, bv odopc gvpc pcsokang, odokkc ma:nyi:bo lusv:la lutadla:yam Galil jilado:pc gvgcla gvto. 23Odokkc bv Najaret cmnam nogordo:pc gvto odokkc du:boto, cdc agom lungorla lunc tani:kvdv:dc okodcm lutaganc cdcmpc iycpc cmna, jc “Bvm Najaret dokkc cmna gogycpc.”
वर्तमान में चयनित:
METIU 2: MISIBSI
हाइलाइट
शेयर
कॉपी
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.