Жаратылыу 21
21
Исхакъны туугъаны
1Раббий алгъын айтханыча Сарагъа эс буруп, анга берген сёзюн толтургъанды. 2Сара бууаз болгъанды эмда Ибрахимни къартлыгъында, Аллах анга айтхан заманда, анга улан тапханды. 3Ибрахим анга Сарадан туугъан уланына Исхакъ#21:3 Исхакъ атны магъанасы – «кюледи». атагъанды. 4Аллах анга фарыз этгенича Ибрахим уланы Исхакъгъа сегизинчи кюн сюннет этгенди. 5Уланы Исхакъ туугъан заманда, Ибрахим жюз жыллыкъ эди.
6Сара уа:
– Аллах мен кюлюрча этгенди, мени хапарымы ким эшитсе да кюллюкдю, – дегенди, 7эм дагъыда: – Сара сабийлеге эмчек салыр деп, Ибрахимге ким айтыр эди? Алай болгъанлыкъгъа, къартлыгъында анга улан тапханма, – дегенди.
Хажар бла Исмаил къысталадыла
8Сабий ёсюп, эмчекден айырылгъанды. Исхакъны эмчекден айыргъан кюн Ибрахим уллу къурманлыкъ этгенди. 9Алай а Сара, мисирли Хажар Ибрахимге тапхан уланы Исхакъны кюлкюлюк этгенин кёргенди да, 10Ибрахимге:
– Бу къарауашны да, уланын да къыстап ий. Бу къарауашны уланы мени уланым Исхакъ бла бирча мюлкге ие боллукъ тюйюлдю, – дегенди.
11Бу сёз ючюн Ибрахимни жаны бек къыйналгъанды, нек дегенде, Исмаил да аны уланы эди. 12Аллах а Ибрахимге:
– Жаш ючюн эмда къарауашынг ючюн жанынг къыйналмасын, – деди. – Сараны сёзлерине тынгыла да, ол айтханча эт, нек десенг, сени урлугъунг Исхакъ бла бардырыллыкъды. 13Къарауашны уланындан да миллет жаратырыкъма, нек десенг, ол да сени урлугъунгду.
14Экинчи кюн Ибрахим эрттенликде эртте тургъанды, Хажаргъа ётмек да, гыбыт бла суу да берип, имбашына кётюртгенди, сора жашны да берип, аны жиберип къойгъанды. Хажар кетип, Беэр-Шеба атлы къуу жерде ажашып къалгъанды. 15Гыбытда суу тауусулгъандан сора, Хажар жашны бир чырпы тюбюнде къойгъанды. 16Сора, жашны ёлгенин кёрмейим деп, арлакъгъа кетгенди да, садакъ атхан чакълы узакълыкъда олтургъанды. Ол алайда олтуруп тургъанында, къычырыкъ этип, сарнап жилягъанды.
17Аллах жашны ауазын эшитгенди да, кёкден Аллахны мёлеги Хажарны чакъырып, анга:
– Хажар, санга не болгъанды? Къоркъма, Аллах жашны тургъан жеринде жилягъанын эшитгенди. 18Тур, жашны къобар, аны къолундан тут. Мен андан уллу миллет жаратырыкъма, – дегенди.
19Аллах Хажарны кёзлерин ачханды да, ол сууу болгъан къую кёргенди. Барып, гыбытны суудан толтургъанды да, жашха ичиргенди.
20Жаш ёсюп тургъан заманда, Аллах аны бла эди. Жаш къуу жерде жашагъанды эм садакъ атыучу болгъанды. 21Ол Паран деген къуу жерде жашагъан заманда, анасы анга Мисирни жеринден къатын алгъанды.
Ибрахим бла Абимелекни келишиулери
22Ол кезиуде Абимелек, кесини аскер башчысы Пикол бла бирге, Ибрахимге келип, анга:
– Сен не этсенг да, Аллах хар не жаны бла да санга жакъ басады, – деди. – 23Энди уа сен мында не манга, не уланыма, не туудукъларыма аманлыкъ этмезлигинге, манга Аллах бла ант эт. Эмда мен санга игилик этгеним кибик, сен да манга эм сен къонакъда тургъан жериме алай игилик этеригинге сёз бер.
24– Ант этеме, – деди Ибрахим.
25Алай а, Ибрахим, Абимелекни къуллары сыйыргъан къую ючюн, Абимелекге гурушха этди. 26Абимелегʼа:
– Аны ким этгенин билмейме, – деди. – Сен да манга айтмагъанса. Бу сагъатха дери мен аны эшитген да этмегенме.
27Сора Ибрахим къой-эчки да, тууар мал да тутуп, Абимелекге берди, ала экиси да кесамат этдиле. 28Ибрахим сюрюуюнден жети тиши къозуну энчи салгъанды. 29Абимелегʼа Ибрахимге:
– Сен энчи салгъан бу жети къозуну магъанасы неди? – деди.
30Ибрахим анга:
– Бу жети къозуну мени къолумдан ал, бу къуюну мен къазгъаныма ала шагъатлыкъ болсунла, – деди.
31Ол себепден бу жерге ол Беэр-Шеба#21:31 Беэр-Шеба атны магъанасы – «келишиуню къуюсу» неда «жетини къуюсу». атагъанды, нек дегенде, ала экиси да мында ант этген эдиле.
32Алай бла ала Беэр-Шебада кесамат этгендиле. Абимелек да, аны аскер башчысы Пикол да туруп, Филистни жерине къайтхандыла. 33Сора Ибрахим Беэр-Шебада бир тамариск терек орнатханды эм анда Раббийни, ёмюрлюк Аллахны атын айтып, тилек этгенди. 34Ибрахим Филистни жеринде кёп заман жашап тургъанды.
נבחרו כעת:
Жаратылыу 21: МалкъСК
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Институт перевода Библии, 2020-2024